ប្រជាពលរដ្ឋ ១២៣គ្រួសារ សំណូមពរដល់អាជ្ញាធរក្រុងសិរីសោភ័ណ ចុះពិនិត្យប្រឡាយទឹក ដែលលោក ឈឹម សារឿន ហៅ ចិនខ្មៅ ចាក់ដីលុប
- បន្ទាយមានជ័យ
បន្ទាយមានជ័យ៖ លោក ឈឹម សារឿន ហៅ ចិនខ្មៅ ម្ចាស់ផ្សារចិនខ្មៅ កំពុងចាក់ដី លុបប្រឡាយទឹក ដើម្បីត្រៀមអង្កន់ពុះដីឡូត៍លក់។…
បន្ទាយមានជ័យ៖ លោក ឈឹម សារឿន ហៅ ចិនខ្មៅ ម្ចាស់ផ្សារចិនខ្មៅ កំពុងចាក់ដី លុបប្រឡាយទឹក ដើម្បីត្រៀមអង្កន់ពុះដីឡូត៍លក់។…
បន្ទាយមានជ័យ៖ លោក ឈឹម សារឿន ហៅ ចិនខ្មៅ ម្ចាស់ផ្សារចិនខ្មៅ កំពុងចាក់ដី លុបប្រឡាយទឹក ដើម្បីត្រៀមអង្កន់ពុះដីឡូត៍លក់។ ការចាក់ដីលុបប្រឡាយទឹកហូរចូលស្រែរបស់ប្រជាកសិករនោះ ធ្វើឱ្យប៉ះពាល់ដល់ការធ្វើស្រែរបស់ប្រជាកសិករ ចំនួន ១២៣គ្រួសារ នៅក្នុង ៤ភូមិ រួមមាន ភូមិព្រះពន្លា ភូមិព្រៃឬស្សី ភូមិតាទុង និងភូមិកោះពងសត្វ ក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។
ប្រជាកសិករ បានស្នើសុំដល់អាជ្ញាធរក្រុងសិរីសោភ័ណ ឱ្យពិនិត្យមើលការចាក់ដីលុបប្រឡាយរបស់លោក ឈឹម សារឿន ហៅ ចិនខ្មៅ ម្ចាស់ផ្សារចិនខ្មៅនេះផង។
ប្រជាពលរដ្ឋម្នាក់ សុំមិនបញ្ចេញឈ្មោះ រស់នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ តំណាងឱ្យប្រជាពលរដ្ឋទាំង ១២៣គ្រួសារនោះ បាននិយាយថា ប្រជាពលរដ្ឋធ្វើស្រែខាងកើតផ្សារចិនខ្មៅ និងស្ពានតាផាន់ រាប់រយហិកតាឯណោះ រំពឹងលើប្រឡាយខាងកើតស្ពានតាផាន់ហូរកាត់ទៅស្ពានតាប៉ក់តាំងពីជំនាន់បារាំង ព្រោះប្រជាពលរដ្ឋធ្វើស្រែនៅខាងកើតផ្សារចិនខ្មៅ និងស្ពានតាផាន់ទាំង ៤ភូមិនេះ គាត់បានបូមទឹកពីប្រឡាយនេះ មកដាក់ស្រែគាត់ទាំងខែប្រាំង និងវស្សាជារៀងរាល់ឆ្នាំកន្លងមក។
ប្រជាពលរដ្ឋរូបនោះ បានបញ្ជាក់ទៀតថា នៅឆ្នាំ២០១៦ លោក ឈឹម សារឿន ហៅ ចិនខ្មៅ បានចាក់ដីលុបប្រឡាយនេះ ស្ទើរអស់ទាំងស្រុង ហើយរហូតបន្តចាក់លុបប្រឡាយនៅខាងជើងផ្សារចិនខ្មៅ ជាប់នឹងផ្លូវរថភ្លើង ជិតអស់ទៀត ហើយបានដាក់លូមុខកាត់តូច មកជំនួសវិញ ធ្វើឱ្យទឹកមិនអាចហូរចូលមកដល់ប្រឡាយមេបាន។ ម្យ៉ាងទៀត ប្រឡាយ ដែលលោកចិនខ្មៅ ចាក់លុបនោះ នៅចំណុចខាងជើងផ្សារចិនខ្មៅ ជាប់នឹងផ្លូវរថភ្លើង ស្ថិតក្នុងភូមិព្រៃឬស្សី សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ មានទទឹងប្រហែល ២០ម៉ែត្រ និងបណ្តោយរាប់ ១០០ម៉ែត្រឯណោះ។
ប្រជាពលរដ្ឋ ស្នើសុំឲ្យអាជ្ញាធរក្រុង សិរីសោភ័ណ ពិសេសលោក ហ៊ិល រ៉ាយ៉ា មេត្តាចុះពិនិត្យមើលទីតាំងដែលលោក ឈឹម សារឿន ហៅចិនខ្មៅ ចាក់ដីបិទប្រព័ន្ធប្រឡាយនោះផង ព្រោះវាជាបេះដូងរបស់ប្រជាពលរដ្ឋ ក្នុងសង្កាត់ព្រះពន្លានេះត្រូវការទឹក ចាំចាច់ខ្លាំងណាស់ សំរាប់ធ្វើស្រែរបស់ពួកគាត់។
ចំណែកលោក ឈឹម សារឿន បានបញ្ជាក់ដោយខ្លីថា ការអភិវឌ្ឍន៍លំនៅដ្ឋាន នៅកន្លែងណាមួយនោះ វាតែងតែមានការប៉ះទង្គិចគ្នារវាងអ្នកអភិវឌ្ឍន៍ និងប្រជាពលរដ្ឋ ជៀសមិនផុតពីការមានទំនាស់នោះឡើយ។ ដោយឡែកអាជ្ញាធរសមត្ថកិច្ចក្រុងសិរីសោភ័ណ មិនទាន់មានអត្ថាធិប្បាយ បែបណានៅឡើយទេ៕ ណុប រក្សា
ចែករំលែកព័តមាននេះ