ប្រទេសប៉ាគីស្ថាន ៖ អ្នកដឹកនាំធំៗរបស់ប៉ាគីស្ថានបានធ្វើដំណើរទៅកាន់ប៉ែកនិរតីនៃប្រទេសកាលពីថ្ងៃអាទិត្យកន្លងមក ដើម្បីបើកផ្លូវពាណិជ្ជកម្មអន្តរជាតិថ្មីមួយ ដោយមើលការចាកចេញរបស់នាវាចិន ដែលមានដឹកជញ្ជូន
ប្រទេសប៉ាគីស្ថាន ៖ អ្នកដឹកនាំធំៗរបស់ប៉ាគីស្ថានបានធ្វើដំណើរទៅកាន់ប៉ែកនិរតីនៃប្រទេសកាលពីថ្ងៃអាទិត្យកន្លងមក ដើម្បីបើកផ្លូវពាណិជ្ជកម្មអន្តរជាតិថ្មីមួយ ដោយមើលការចាកចេញរបស់នាវាចិន ដែលមានដឹកជញ្ជូនផលិតផលទៅកាន់មជ្ឈិមបូព៌៌ា និងអាហ្វ្រិកពីកំពង់ផែ Gwadar ថ្មី ។
រដ្ឋាភិបាលបាននិយាយក្នុងសេចក្តីប្រកាសមួយថា ក្បួនរថយន្តដឹកទំនិញរបស់ចិន ដែលដឹកជញ្ជូនផលិតផលដើម្បីយកទៅលក់នៅបរទេស បានមកដល់ប៉ាគីស្ថានដោយឆ្លងកាត់ផ្លូវភ្ជាប់ Gwadar ទៅកាន់ប៉ែកពាយ័ព្យនៃតំបន់ Xinjiang របស់ប្រទេសចិន ។
លោកនាយករដ្ឋមន្ត្រី Nawaz Sharif ថ្លែងថា ៖ « ប្រទេសប៉ាគីស្ថាននឹងផ្តល់សន្តិសុខឲ្យអស់ពីលទ្ធភាពទៅដល់វិនិយោគិនបរទេស ដើម្បីអនុញ្ញាតឲ្យពួកគេប្រើប្រាស់កំពង់ផែឧបត្ថម្ភដោយប្រទេសចិននេះក្នុងការធ្វើពាណិជ្ជកម្ម » ។
ខណៈពលករមកពីបរទេសព្រួយបារម្ភលើបញ្ហាសន្តិសុខ កងយោធារបស់ប៉ាគីស្ថានបានបង្កើតកងពិសេសមួយសម្រាប់យាមផ្លូវពាណិជ្ជកម្ម និងកំពង់ផែថី្មនេះ ដែលមានទីតាំងនៅខេត្ត Baluchistan ជាកន្លែងមានព្រឹត្តិការណ៍បំផ្ទុះគ្រាប់បែកបានសម្លាប់មនុស្សជិត៥០នាក់ ។
ការវាយប្រហារនោះត្រូវបានអះអាងថា ធ្វើឡើងដោយក្រុមរដ្ឋអ៊ិស្លាម ហើយមន្ត្រីរបស់ប៉ាគីស្ថាននិយាយថា ការវាយប្រហារនោះមានគោលដៅកម្ទេចគម្រោងដែលត្រូវបានឧបត្ថម្ភដោយប្រទេសចិន ក្នុងប៉ែកនិរតី និងផ្នែកដទៃនៃប្រទេស ។
ប្រទេសចិនកំពុងសាងសង់បណ្តាញផ្លូវ និងវារីអគ្គិសនីនៅក្រោមគម្រោងមួយដែលមានឈ្មោះថា ច្រករបៀងសេដ្ឋកិច្ចរវាងចិន និងប៉ាគីស្ថាន ដែលត្រូវបានគិតថា នឹងទាក់ទាញការវិនិយោគពីប្រទេសចិនប្រមាណ៤៦ប៊ីលានដុល្លារក្នុងប៉ុន្មានទសវត្សរ៍ខាងមុខ ។
ប្រទេសចិន និងប៉ាគីស្ថានបានរក្សាទំនាក់ទំនងជិតស្និទ្ធផ្នែកនយោបាយ និងសេដ្ឋកិច្ចជាយូរណាស់មកហើយ ព្រោះប្រទេសទាំងពីរសុទ្ធតែមានកំហឹងទៅលើប្រទេសឥណ្ឌា។ កំពង់ផែ Gwadar មានទីតាំងនៅលើសមុទ្រអារ៉ាប់ ស្ថិតនៅចន្លោះអាស៊ីអាគ្នេយ៍ អាស៊ីកណ្តាល និងមជ្ឈិមបូព៌ា ។
ប្រទេសចិនកំពុងស្វែងរកផ្លូវដ៏ងាយស្រួល និងគួរឲ្យទុកចិត្តមួយក្នុងការចូលមកកាន់សមុទ្រអារ៉ាប់ និងសមុទ្រឥណ្ឌា ។ ប៉ុន្តែក្នុងពេលនេះ នាវារបស់ចិនអាចប្រើប្រាស់ច្រកសមុទ្រម៉ាឡាកា ដែលជាផ្លូវតូចមួយរវាងឧបទ្វីបម៉ាឡេ និងឥណ្ឌូណេស៊ីបានទៀតផង ។ ផ្លូវថ្មីនេះនឹងអនុញ្ញាតឲ្យប្រទេសចិនចូលទៅក្នុងតំបន់ឈូងសមុទ្រពែរ និងមជ្ឈិមបូព៌ាផងដែរ ៕
ចែករំលែកព័តមាននេះ