ខេត្តបាត់ដំបង ៖ ទណ្ឌិតម្នាក់ដែលត្រូវតុលាការកាត់ទោសកំបាំងមុខឲ្យជាប់គុកចំនួន០៣ឆ្នាំពីបទ«ជួញដូរគ្រឿងញៀ.ន» ត្រូវសមត្ថកិច្ចចាប់ខ្លួនបញ្ជូនទៅកាន់ទ្វារខ្មៅ(គុក) នៅវេលាម៉ោង១០ព្រឹក ថ្ងៃទី ១០ មិថុនា ដោយអនុវត្តតាម «ដីកាបង្គាប់ឲ្យចាប់ខ្លួន…
ខេត្តបាត់ដំបង ៖ ទណ្ឌិតម្នាក់ដែលត្រូវតុលាការកាត់ទោសកំបាំងមុខឲ្យជាប់គុកចំនួន០៣ឆ្នាំពីបទ«ជួញដូរគ្រឿងញៀ.ន» ត្រូវសមត្ថកិច្ចចាប់ខ្លួនបញ្ជូនទៅកាន់ទ្វារខ្មៅ(គុក) នៅវេលាម៉ោង១០ព្រឹក ថ្ងៃទី ១០ មិថុនា ដោយអនុវត្តតាម «ដីកាបង្គាប់ឲ្យចាប់ខ្លួន និងឃុំខ្លួន» របស់ចៅក្រមជំនុំជំរះសាលាដំបូងខេត្តបាត់ដំបង ។
លោក សេង លុច អធិការនគរបាលស្រុកថ្មគោលបានឲ្យដឹងថា ទណ្ឌិតដែលតុលាការកាត់ទោសកំបាំងមុខម្នាក់នេះ ឈ្មោះ មុត ត្រា ប្រុសអាយុ៤៤ឆ្នាំ រស់នៅភូមិគោកឃ្មុំ ឃុំគោកឃ្មុំ ស្រុកថ្មគោល ។ ជននេះត្រូវកម្លាំងជំនាញរបស់លោកចាប់ខ្លួនតាម«ដីកាបង្គាប់ឲ្យចាប់ខ្លួន និង ឃុំខ្លួន» លេខ៣០៧ ត ព្រ ចុះថ្ងៃទី១៣ ឧសភា ឆ្នាំ២០២២ របស់លោក ជា វណ្ណៈ ចៅក្រមជំនុំជំរះសាលាដំបូងខេត្ត ក្នុងសំណុំរឿង«ជួញដូរគ្រឿងញៀ.ន»។
បើយោងតាម «ដីកាបង្គាប់ឲ្យចាប់ខ្លួន និងឃុំខ្លួន» របស់លោក ជា វណ្ណៈ ចៅក្រមជំនុំជំរះខាងលើនេះ ដែលបានសរសេរយោងសម្រង់សាលក្រមព្រហ្មទណ្ឌលេខ ៤២៥ ក ចុះថ្ងៃទី២៥ ឧសភា ឆ្នាំ២០២២ របស់សាលាដំបូងខេត្តបាត់ដំបង ដែលបានសម្រេចផ្ដន្ទាទោសដាក់ពន្ធនាគារឈ្មោះ មុត ត្រា រយៈពេល០៣ឆ្នាំ គិតចាប់ពីថ្ងៃចាប់ខ្លួនបាន យកមកអនុវត្តទោសនៅក្នុងពន្ធនាគារ និងពិន័យជាប្រាក់ចំនួន៦លានរៀល ។
សាលក្រមព្រហ្មទណ្ឌខាងលើនេះ បានជំនុះជំរះទោសជនជាប់ចោទឈ្មោះ មុត ត្រា នេះកំបាំងមុខពីបទ«ជួញដូរដោយខុសច្បាប់នូវសារធាតុញៀន» ដែលប្រព្រឹត្តនៅភូមិច្រនៀង ឃុំគោកឃ្មុំ ស្រុកថ្មគោល កាលពីថ្ងៃទី០៥ កក្កដា ឆ្នាំ២០២១ ។
លោក សេង លុច បានបញ្ជាក់ថា បើតាមសំណុំរឿងនេះជនជាប់ចោទរូបនេះបានគេចខ្លួនផុតពីដៃសមត្ថកិច្ចនៅពេលខ្លួនមានជាប់ពាក់ព័ន្ធនឹងអំពើជួញដូរគ្រឿងញៀននៅពេលនោះទើបត្រូវចៅក្រមកាត់ទោសកំបាំងមុខ លុះក្រោយមកក៏ត្រូវចាប់ខ្លួនតាមដីកាតែម្ដង ។ ពេលនេះកម្លាំងរបស់លោកបានបញ្ជូនខ្លួនទណ្ឌិតរូបនេះទៅកាន់តុលាការហើយ ៕
ចែករំលែកព័តមាននេះ