ខេត្តមណ្ឌលគិរី៖ ចាប់តាំងពីពាក់កណ្តាលខែឧសភា រហូតដល់ខែមិថុនានេះ ផ្លែប័រធម្មជាតិខេត្តមណ្ឌលគិរី កំពុងទុំបណ្តើរៗ សម្រាប់ផ្គត់ផ្គង់ទីផ្សារ និងលក់បានតម្លៃថ្លៃ នាដើមរដូវវស្សាឆ្នាំ២០២២នេះ។
ប្រជាពលរដ្ឋ រស់នៅក្រុងសែនមនោរម្យ បានឲ្យដឹងថា សព្វថ្ងៃ គាត់មានដើមប័រជាង ១០ដើមប៉ុណ្ណោះ កំពុងប្រមូលផល បានបីបួនឆ្នាំមកហើយ តែគាត់អាចទទួលប្រាក់ចំណូលមិនក្រោមប្រាំលានរៀលឡើយ ព្រោះប័ររបស់គាត់ដាំ មានរសជាតិឆ្ងាញ់ និងលក់បានតម្លៃថ្លៃ។ រាល់ថ្ងៃនេះ ផ្លែប័រ ដែលគាត់បេះលក់ឲ្យទៅគេ បានតម្លៃចាប់ពី ៨០០០រៀល ទៅមួយម៉ឺនរៀល ក្នុង ១គ.ក តាមពូជ និងទំហំប័រ។ ក្នុងមួយដើមប័រ អាយុចាស់ឆ្នាំ អាចផ្តល់ផលចាប់ពី ៥០គីឡូក្រាម ទៅជាង ១០០គីឡូក្រាម អាស្រ័យលើការថែទាំខ្លះដែរ។
បងស្រី រ័ត្ន អ្នកលក់ផ្លែឈើ នៅជិតរង្វង់មូលគោព្រៃ បានឲ្យដឹងថា ពួកគាត់ប្រមូលទិញផ្លែប័រតាមផ្ទះអ្នកភូមិ ឬពីចំការនានា ចន្លោះតម្លៃបីពាន់រៀល ទៅប្រាំមួយពាន់រៀល ហើយលក់ចេញរាយ បានតម្លៃប្រមាណប្រាំពីរពាន់រៀល ទៅមួយម៉ឺនរៀល។
គាត់បានបន្តថា ចំពោះការលក់ដូរផលផ្លែឈើសព្វថ្ងៃ មិនដាច់ច្រើនរាល់ថ្ងៃឡើយ ប៉ុន្តែនៅថ្ងៃឈប់សម្រាក ឬបុណ្យទានម្តងៗ ពួកគាត់ស្ទើររកផ្លែប័រ ឬស្ពៃក្តោបលក់ឲ្យភ្ញៀវសឹងមិនបាន។ទោះយ៉ាងណា នៅពេលគ្មានភ្ញៀវទេសចរដើរលេងកម្សាន្ត ពួកគាត់ក៏នៅអាចបោះដុំផ្លែប័រទៅកាន់ទីផ្សារក្រៅខេត្ត ឬទៅភ្នំពេញ ជាដើម។
ប្រធានមន្ទីរកសិកម្ម ខេត្តមណ្ឌលគិរី លោក សុង ឃាង បានឲ្យដឹងថា បច្ចុប្បន្ន ខេត្តមណ្ឌលគិរី មានចំការដំណាំប័រ អនុវត្តបានសរុបចំនួន ២៨៧ ហិកតា កើនលើសឆ្នាំមុន ៤៨ ហិកតា។ ចំណែកផ្ទៃដីប្រមូលផល ២០៥ហិកតា បរិមាណផល ១ ៩៥៨ តោន និងផល ៩,៥៥១ តោន /ហិកតា ដែលតម្លៃលក់នៅតាមទីផ្សារ ចន្លោះ ៤ ០០០៛ ទៅ ៨ ០០០៛ ប្រែប្រួលតាមពូជ។
លោកប្រធានមន្ទីរបន្តថា ដោយខេត្តមណ្ឌលគិរី មានសក្តានុពលអំណោយផល ទាំងដីមានជីវជាតិ អាកាសធាតុល្អ កសិករអាចដាំដុះដំណាំស្ទើរគ្រប់ប្រភេទ សម្រាប់បំពេញតម្រូវការទីផ្សារ។ ក្នុងនោះ ដំណាំប័រ និងស្ពៃក្តោប បានក្លាយជាដំណាំដ៏ល្បីប្រចាំខេត្ត ដែលអាចទាក់ទាញមហាជន ឱ្យគាំទ្រកសិផល ដែលដាំដុះក្នុងខេត្ត និងជួយដល់ជីវភាពកសិករកាន់តែប្រសើរ៕
ចែករំលែកព័តមាននេះ