រាជធានីភ្នំពេញ ៖ ខុសពីកីឡាករភាគច្រើនដែលបង្អួតពីគម្រោងដើរកម្សាន្ត កីឡាករខ្សែប្រយុទ្ធរបស់ក្លិបណាហ្គាវើល លោកឃឹម បូរី បែរជាបង្អួតសកម្មភាពលក់កាបូប និងទឹកបរិសុទ្ធយ៉ាងសកម្មពេញរយៈពេល៣ថ្ងៃនៅខាងក្រោយសាលមហោស្រពកោះពេជ្រនៅថ្ងៃបុណ្យអុំទូកទៅវិញ ។ បើទោះជាលោកមិនបានបញ្ជាក់ថាទទួលបានចំណូលប៉ុន្មានពីការតាំងស្ដង់លក់កាបូប និងទឹកបរិសុទ្ធនោះ ប៉ុន្តែគ្មានអ្នកណាដែលដើរកាត់ស្តង់កីឡាកររូបនេះហើយ មិនឃើញលោក និងភរិយាខ្វែងដៃខ្វែងជើងក្នុងការលក់ដាច់នោះទេ ។
នៅលើបណ្ដាញសង្គមហ្វេសប៊ុក មិត្តភក្តិឃឹម បូរី សុទ្ធតែបានសរសើរថា កីឡាកររូបនេះមានឱកាសកើបប្រាក់ពីការលក់ដូរក្នុងរយៈពេល៣ថ្ងៃនៃពិធីអុំទូក ក្នុងពេលដែលពួកគេគ្រប់គ្នាសុទ្ធតែអស់លុយកាក់ជាមួយនឹងពិធីបុណ្យនេះ ។ នៅស្ដង់លេខ៣៥ ជួរខាងចំហៀងសាលមហោស្រពកោះពេជ្រនៅជិតកន្លែងកូនក្មេងជិះឡានបុកគ្នា និងជិះឧបករណ៍លេងកម្សាន្ត គេឃើញស្តង់តាំងលក់កាបូប និងទឹកបរិសុទ្ធយ៉ាងសាមញ្ញរបស់កីឡាករខ្សែប្រយុទ្ធល្បីឈ្មោះរូបនេះ ។ អ្នកធ្វើដំណើរឆ្លងកាត់ស្ទើរមិនបានដឹងថាអ្នកលក់គឺជាកីឡាករឃឹម បូរី ដែលមានឈ្មោះបោះសំឡេងនៅក្នុងវិស័យបាល់ទាត់នោះផង ដោយសារតែក្នុងថ្ងៃខ្លះលោកក៏ស្លៀកពាក់ស្អាតបាតជារបៀបថៅកែនាំចូលកាបូប និងពេលខ្លះស្លៀកពាក់ជាអ្នកលក់ដូរបែបសាមញ្ញមើលមិនដឹងថាជាកីឡាករល្បីឈ្មោះនោះទេ។ ប៉ុន្តែសម្រាប់អ្នកដែលបានដឹងថាម្ចាស់តូបឈ្មោះឃឹម បូរី សុទ្ធតែបានដើរសំដៅទៅកាន់កន្លែងលក់របស់លោក និងបានជជែកលេងជាមួយលោកក្នុងពេលដែលលោកឈរលក់ដោយផ្ទាល់នូវកាបូប និងទឹកបរិសុទ្ធនៅតាមចិញ្ចើមផ្លូវនោះផង ។
ពេញរយៈពេល៣ថ្ងៃតាំងពីរសៀលរហូតដល់យប់ជ្រៅ គេមិនឃើញតូបលក់ដូររបស់លោកស្ងាត់ភ្ញៀវនោះទេ ដោយកាបូប និងទឹកបរិសុទ្ធដែលលោកដាក់លក់ ត្រូវគេឃើញជញ្ជូនចូលមិនលស់ពេលនោះទេ ។ ម្នាក់ៗសុទ្ធតែមើលឃើញថា លោក និងភរិយាកើបលុយពីមុខរបរមួយនេះនៅថ្ងៃបុណ្យអុំទូក បើធៀបនឹងអ្នកមិនមានអាជីពផ្សេងទៀតដែលត្រូវយកលុយទៅចាយ ហើយមិនមានចំណូលនៅថ្ងៃពិធីបុណ្យដ៏ធំមួយនេះនោះ ។
លោក ឃឹម បូរី មិនត្រឹមតែពូកែស៊ុតបាល់ប៉ុណ្ណោះទេ ប៉ុន្តែបើក្រឡេកមើលពីវោហារស័ព្ទក្នុងការរាក់ទាក់ភ្ញៀវ និងភាពរហ័សរហួនក្នុងពេលលក់កាបូប ក៏មិនអន់ជាងអ្នករកស៊ីដែលអត់ជំនាញខាងទាត់បាល់នោះផងដែរ ។ លោកត្រូវបានគេអះអាងថាប្រមូលលុយបានមិនតិចនោះទេ ដោយសារតែកាបូបដែលលោក និងភរិយាដាក់លក់ពេញរយៈពេល៣ថ្ងៃនៃពិធីបុណ្យអុំទូក គឺលក់ដាច់ខ្លាំងបើធៀបនឹងថ្ងៃធម្មតា ។ យ៉ាងណាមិញ លោក និងភរិយាមិនមែនទើបតែប្រកបអាជីវកម្មមួយនេះនាពេលថ្មីៗនោះទេ គឺមានរយៈពេលយូរគួរសមមកហើយ ដោយសារតែភរិយារបស់លោកគឺអ្នកនាង លី ដាវណ្ណ គឺជាអាជីវករលក់ស្បែកជើងនៅផ្សារអូឡាំពិកតាំងពីមិនទាន់រៀបការ ។ អ្នកទាំងពីរបានចាប់ដៃគ្នាជាប្ដីប្រពន្ធចំនួន៣ឆ្នាំមកហើយ គឺបន្ទាប់ពីឃឹម បូរី ត្រូវបានទទួលស្គាល់ថាជាកីឡាករល្បីនៅក្នុងពិភពបាល់ទាត់ និងត្រូវបានផ្លាស់មកលេងឱ្យក្លិបណាហ្គាវើលនាពេលចុងក្រោយ ។
អាជីវកម្មរបស់លោកថ្វីត្បិតថាមើលទៅសាមញ្ញ ប៉ុន្តែចំណូលដែលទទួលបានក៏ក្រាស់ក្រែលណាស់ដែរជារៀងរាល់ថ្ងៃ ។ អ៊ីចឹងហើយទើបគេកត់សម្គាល់ថាកម្រិតជីវភាពរបស់កីឡាកររូបនេះល្អប្រសើរជាងគេ បើទោះជាលោកមិនមានទីផ្សារថតស្ពត និងទទួលបានរង្វាន់លើកទឹកចិត្តច្រើនដូចគ្នានឹងមិត្តរួមអាជីពគឺកីឡាករប្រាក់ មុន្នីឧត្តម និងកីឡាករ ចាន់ វឌ្ឍនាកា ដែលមានសន្ទុះឡើងដូចគ្នាដាច់ឆ្ងាយពីលោកក្ដី ។ មានការបញ្ជាក់ថា ក្នុងពេលមមាញឹកនឹងការហ្វឹកហាត់ លោកក៏មិនសូវមានពេលជួយលក់ដូរភរិយាផងដែរ ទើបការបង្ហាញខ្លួនឈរលក់ដោយផ្ទាល់នូវកាបូប និងទឹកបរិសុទ្ធក្នុងពិធីបុណ្យអុំទូក គឺជាការចាប់អារម្មណ៍មួយចំពោះអ្នកស្នេហាវិស័យបាល់ទាត់ ។ នៅលើបណ្ដាញសង្គមហ្វេសប៊ុក គេឃើញអ្នកដែលបានជួបលោកក្នុងពេលលក់ដូរថតរូបលោកបង្ហោះដោយមិនភ្លេចសរសើរពីការកាក់កបរបស់លោកលើមុខរបរនោះផង ។
គួរបញ្ជាក់ថា លោក ឃឹម បូរី គឺជាខ្សែប្រយុទ្ធរបស់កម្ពុជាដែលមានឱកាសបានទៅលេងឱ្យក្លិបមួយរបស់ថៃកាលពីពេលកន្លងទៅក្នុងនាមខ្ចីជើង និងបានក្លាយជាកីឡាករល្បីឈ្មោះក្នុងក្រុមហ៊ុនណាហ្គាវើលនាពេលថ្មីៗ ។ លោកត្រូវគេដឹងមានរបួសបាក់ឆ្អឹងដៃ បណ្ដាលឱ្យម្ចាស់អាវលេខ៧របស់ក្លិបណាហ្គាវើលរូបនេះ អវត្តមានពីការប្រកួតមិនតិចជាង២ខែ ។ ក្រោយសម្ងំព្យាបាលលោកបានត្រឡប់មកហ្វឹកហាត់ឡើងវិញ ហើយឆ្លៀតពេលទំនេរក្នុងថ្ងៃបុណ្យអុំទូក ក៏ឈរលក់កាបូប និងទឹកបរិសុទ្ធយ៉ាងសាមញ្ញនៅកោះពេជ្រ ដែលធ្វើឱ្យរូបភាពលក់ដូររបស់លោកត្រូវគេបង្ហោះឡើងក្នុងន័យកោតសរសើរ ៕
ចែករំលែកព័តមាននេះ