រាជធានីភ្នំពេញ ៖ កម្ពុជាកំពុងត្រៀមខ្លួនធ្វើម្ចាស់ផ្ទះរៀបចំការប្រកួតកីឡាចំបាប់រើសជើងឯកអាស៊ីអាគ្នេយ៍នៅដើមខែក្រោយនេះហើយ ។
លោក ធិន វិចិត្រ អគ្គលេខាធិការសហព័ន្ធកីឡាចំបាប់កម្ពុជាបានឱ្យដឹងថា កម្ពុជាកំពុងត្រៀមខ្លួនធ្វើជាម្ចាស់ផ្ទះរៀបចំការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ជាលើកដំបូងចាប់ពីថ្ងៃទី៤ ដល់ថ្ងៃទី៨ ធ្នូ ខាងមុខនេះ។ លោកថា តាមពិតព្រឹត្តិការណ៍មួយនេះគ្រោងរៀបចំធ្វើនៅថ្ងៃទី១៤ដល់ថ្ងៃទី១៩ វិច្ឆិកា ប៉ុន្តែដោយសារតែបណ្ដាប្រទេសមួយចំនួនស្នើសុំពន្យារពេលទើបការប្រកួតនេះមិនអាចដំណើរការទៅបានតាមការកំណត់ ។ ប្រទេសដែលត្រូវចូលរួមប្រកួតពេលនេះ មានកម្ពុជា (ម្ចាស់ផ្ទះ), សិង្ហបុរី, ថៃ, ម៉ាឡេស៊ី, ឡាវ, វៀតណាម និងហ្វ៊ីលីពីន ។ កម្ពុជាបានត្រៀមកីឡាករជម្រើសជាតិចំនួន១៥រូប និងកីឡាករថ្នាល១០រូបសម្រាប់ចូលរួមប្រកួតនៅក្នុងព្រឹត្តិការណ៍នេះ ។ លោកបានបញ្ជាក់ទៀតថា ការប្រកួតនេះពិតជាមានសារសំខាន់ខ្លាំងណាស់សម្រាប់កម្ពុជា ព្រោះវាជាការប្រកួតមួយដើម្បីស្វែងរកបទពិសោធន៍ដើម្បីត្រៀមខ្លួនប្រកួតកីឡាស៊ីហ្គេមលើកទី៣២ឆ្នាំ២០២៣ ពេលដែលកម្ពុជាទទួលធ្វើជាម្ចាស់ផ្ទះលើកដំបូង ។
លោកអគ្គលេខាធិការសហព័ន្ធកីឡាចំបាប់រូបនេះបានបន្តថា កម្ពុជាសង្ឃឹមយ៉ាងហោចណាស់ដណ្ដើមបានមេដាយមាសពី១ទៅ២គ្រឿងដែរ ។ ម្យ៉ាងវិញទៀត ចាប់តាំងពីដើមខែវិច្ឆិកាកន្លងមកនេះ កម្ពុជាត្រៀមខ្លួនបានយ៉ាងល្អ និងខិតខំហ្វឹកហាត់គ្មានពេលសម្រាកឡើយ។ ក្នុងចំណោមបណ្ដាប្រទេសដែលមកចូលរួមទាំងអស់នោះមានតែវៀតណាម និងសិង្ហបុរីទេ ដែលខ្លាំងមិនងាយយកឈ្នះឡើយ ។ ប៉ុន្តែក្នុងឋានៈជាម្ចាស់ផ្ទះ កម្ពុជានឹងប្រឹងប្រែងឱ្យអស់ពីសមត្ថភាព ដើម្បីដណ្ដើមយកមេដាយពីការប្រកួតលើកនេះឱ្យទាល់តែបាន គ្រាន់តែមិនទាន់ដឹងថា ច្រើនឬតិចប៉ុណ្ណោះ ៕
ចែករំលែកព័តមាននេះ