ប្រទេសមីយ៉ាន់ម៉ា ៖ អនុប្រធានាធិបតី លោក Henry Van Thio បានបើកកិច្ចប្រជុំសម្របសម្រួលកាលពីថ្ងៃទី៩ វិច្ឆិកា ដើម្បីពិភាក្សាអំពីគម្រោងទិញស្រូវដោយផ្ទាល់ពីកសិករ ។ ការទប់ស្កាត់របស់ចិនលើការនាំចូលតាមព្រំដែនបានបណ្តាលឲ្យមានផលលើសនៃអង្ករ និងស្រូវ ដែលជំរុញឱ្យតម្លៃស្រូវធ្លាក់ចុះ។ លើសពីនេះទៀត ភ្លៀងធ្លាក់ខ្លាំងបានបង្កផលប៉ះពាល់កាន់តែអាក្រក់ ដែលធ្វើឲ្យសើមដល់ការប្រមូលផល និងតម្លៃស្រូវកាន់តែចុះថ្លៃថែមទៀត ។
ច្បាប់មីយ៉ាន់ម៉ាស្តីពីសិទ្ធិការពារកសិករ និងលើកកម្ពស់អត្ថប្រយោជន៍ បានអនុញ្ញាតឱ្យមានការបង្កើតក្រុមគ្រប់គ្រងផ្នែកកសិកម្ម និងក្រុមការងារតាមដានតម្លៃទិញដំណាំ ដើម្បីរៀបចំការទិញដំណាំដោយរដ្ឋ ។
លោក Henry Van Thio ឱ្យដឹងថា ក្រុមការងារទាំងពីរត្រូវបានបង្កើតឡើងដើម្បីជួយគ្រប់គ្រងស្ថានភាពនេះ ។ ក្រុមទាំងពីរនឹងសម្រេចចិត្តពីតំបន់ដែលត្រូវទិញស្រូវ និងរៀបចំការទិញ ។ លោកនិយាយថា ៖ « ឃ្លាំង និងរោងម៉ាស៊ីនកិនស្រូវគួរតែប្រើជាកន្លែងលក់ ប៉ុន្តែយើងចាំបាច់ត្រូវមានផែនការសម្រាប់ការដឹកជញ្ជូន ការរក្សាទុក ការកិនស្រូវ និងការចែកចាយបន្ទាប់ពីរដ្ឋាភិបាលទិញស្រូវ » ។
យោងតាមជំពូកទី៧នៃច្បាប់នេះ ក្រុមអ្នកដឹកនាំអាចទាមទារមូលនិធិពីរដ្ឋាភិបាលសហភាព ដែលអាចបម្រុងទុកហិរញ្ញប្បទានពីប្រាក់ចំណូលសហភាព ។ ស្រូវអាចត្រូវបានទិញដោយមធ្យោបាយសមរម្យ រួមទាំងប្រព័ន្ធដេញថ្លៃ ។ នេះបើយោងតាមច្បាប់ ប៉ុន្តែរបៀបក្នុងការទិញស្រូវ គឺមិនត្រូវបានលើកឡើងក្នុងកិច្ចប្រជុំនេះទេ ។
ការទិញអង្ករបន្ថែមពីលើការទិញស្រូវ ក៏មិនត្រូវបានពិភាក្សាដែរ ទោះបីជាលោក Ye Tint អគ្គនាយកនៃនាយកដ្ឋានកសិកម្ម ដែលបានចូលរួមកិច្ចប្រជុំឱ្យដឹងថា រឿងនេះនឹងត្រូវពិភាក្សានៅពេលក្រោយ ។ លោកបានប្រាប់កាសែត The Myanmar Times ថា ៖ «បញ្ហាស្ថិរភាពតម្លៃក្នុងរយៈពេលវែង និងការវិនិយោគហេដ្ឋារចនាសម្ព័ន្ធ ក៏ត្រូវបានលើកឡើងក្នុងអំឡុងពេលពិភាក្សាផងដែរ ។ យើងបានពិភាក្សាពីការវិនិយោគម៉ាស៊ីនសម្ងួតស្រូវ និងការសាងសង់ឃ្លាំងផ្ទុកស្រូវ » ។
លោក Henry Van Thio និយាយថា សម្ភារបរិក្ខារសម្ងួតស្រូវមានសារសំខាន់សម្រាប់វិស័យអង្ករទាំងមូល ។
លោក Maung Soe កសិករមកពីទីក្រុងណៃពិដោ និយាយថា កសិករកំពុងប្រឈមមុខនឹងការខូចខាតស្រូវ ដោយសារតែភ្លៀងធ្លាក់ខ្លាំងក្នុងអំឡុងពេលប្រមូលផលនេះ ។ លោកនិយាយថា ៖ « នៅពេលមានភ្លៀងធ្លាក់ក្នុងរដូវកាលប្រមូលផល ស្រូវដែលខូចខាតមានបរិមាណខ្ពស់ ហើយកសិករត្រូវផ្លាស់ប្តូរទីតាំងផ្ទុកស្រូវ ។ ស្ថានភាពអាក្រក់បំផុតនោះ គឺការផ្លាស់ប្តូរទីតាំងផ្ទុកស្រូវ និងត្រូវបង្កើនការចំណាយទៅលើកម្លាំងពលកម្ម » ។
លោក Ko Nay Soe ម្ចាស់ម៉ាស៊ីនកិនស្រូវនិយាយថា ៖ « ភ្លៀងនៅតែធ្លាក់ ។ ដូច្នេះ សំណើមអាចធ្វើឱ្យមានបញ្ហា ។ ម្ចាស់រោងម៉ាស៊ីនកិនស្រូវ និងអាជីវករដែលបានរក្សាទុកស្រូវ ពួកគេមិនហ៊ានទិញស្រូវបន្ថែមទៀតទេ » ។
រដ្ឋាភិបាលក៏បានប្រកាសពីផែនការអនុញ្ញាតឱ្យមានការនាំចេញស្រូវជាបណ្តោះអាសន្ននៅក្នុងខែវិច្ឆិកាផងដែរ ដែលជាធម្មតាត្រូវបានហាមឃាត់ ៕
ចែករំលែកព័តមាននេះ