ប្រទេសថៃ ៖ ថវិកាប្រមាណ៤,៦ប៊ីលានបាតសម្រាប់ចំណាយលើការផ្សព្វផ្សាយពាណិជ្ជកម្ម ត្រូវបានលុបចោលកាលពីខែមុន បន្ទាប់ពីការចូលទិវង្គតរបស់ព្រះមហាក្សត្រនៅថ្ងៃទី១៣ តុលា ។
ប្រទេសថៃ ៖ ថវិកាប្រមាណ៤,៦ប៊ីលានបាតសម្រាប់ចំណាយលើការផ្សព្វផ្សាយពាណិជ្ជកម្ម ត្រូវបានលុបចោលកាលពីខែមុន បន្ទាប់ពីការចូលទិវង្គតរបស់ព្រះមហាក្សត្រនៅថ្ងៃទី១៣ តុលា ។ នេះបើតាមទិន្នន័យពីក្រុមហ៊ុន Nielsen ។
តួលេខនេះស្មើនឹង៤៥%ប៉ុណ្ណោះនៃការចំណាយសរុបសម្រាប់ការផ្សព្វផ្សាយពាណិជ្ជកម្មក្នុងខែដូចគ្នានៅឆ្នាំមុន ដែលស្មើនឹង១០,២៤ប៊ីលានបាត ។
ក្រុមហ៊ុនស្រាវជ្រាវប្រព័ន្ធផ្សព្វផ្សាយធំមួយបានរាយការណ៍ថា ការចំណាយសរុបសម្រាប់ផ្សព្វផ្សាយពាណិជ្ជកម្មកាលពីខែមុនស្មើនឹង៥,៦១ប៊ីលានបាត ។
បន្ទាប់ពីការចូលទិវង្គតរបស់ស្ដេច រដ្ឋាភិបាលបានបញ្ជាឱ្យប្រព័ន្ធផ្សព្វផ្សាយទាំងអស់បញ្ឈប់ការផ្សព្វផ្សាយពាណិជ្ជកម្ម ប្រគំតន្ត្រី និងព្រឹត្តិការណ៍អាជីវកម្មផ្សេងទៀតដែលបានបង់ថ្លៃរួច ដើម្បីបង្ហាញពីការគោរពដល់ព្រះមហាក្សត្រថៃ រយៈពេល៣០ថ្ងៃ ។
ការផ្លាស់ប្តូរនេះបានប៉ះពាល់យ៉ាងខ្លាំងទៅដល់ស្ថានីយទូរទស្សន៍ ។ ការផ្សាយពាណិជ្ជកម្មបង់ប្រាក់តាមរយៈស្ថានីយទូរទស្សន៍ analog បានធ្លាក់ចុះ៦០,៣៨% ឬស្មើនឹង១,៨៥ប៊ីលានបាតកាលពីខែមុន និងធ្លាក់ចុះយ៉ាងហោចណាស់២,៨២ប៊ីលានបាតក្នុងខែដូចគ្នាឆ្នាំមុន ។
ប្រាក់ចំណូលពីការផ្សាយពាណិជ្ជកម្មខ្សែកាប និងផ្កាយរណបបានធ្លាក់ចុះ៦៧,១១% ឬស្មើនឹង១៧៣លានបាត ខណៈប្រាក់ចំណូលផ្សាយពាណិជ្ជកម្មតាមទូរទស្សន៍ឌីជីថល ធ្លាក់ចុះ៤៧,៨៣% ឬស្មើនឹង៩៥០លានបាត ។
ប្រាក់ចំណូលផ្សាយពាណិជ្ជកម្មតាមវិទ្យុបានធ្លាក់ចុះ៤៥% ឬស្មើនឹង២៨៧លានបាត ខណៈប្រាក់ចំណូលផ្សាយពាណិជ្ជកម្មតាមទស្សនាវដ្តី ធ្លាក់ចុះ៣៨% ឬស្មើនឹង២៣១លានបាត ។ ការចំណាយលើការផ្សាយពាណិជ្ជកម្មក្នុងកាសែត បានធ្លាក់ចុះ២៦,៤៨% ឬស្មើនឹង៧៣៣លានបាត ។ ចំណែកការចំណាយលើការផ្សាយពាណិជ្ជកម្មតាម
ប្រព័ន្ធអនឡាញ ធ្លាក់ចុះ១០,៤៣% ឬស្មើនឹង១០៣លានបាត ។
ផ្ទុយទៅវិញ ការចំណាយសម្រាប់ផ្សាយពាណិជ្ជកម្មឆ្លងកាត់ប្រព័ន្ធផ្សព្វផ្សាយបានកើនឡើង៩,៩៥% ឬស្មើនឹង៤២០លានបាត និងការចំណាយសម្រាប់ផ្សាយពាណិជ្ជកម្មក្នុងហាងកើនឡើង៦,០៦% ឬស្មើនឹង៣៥លាន បាត ៕
ចែករំលែកព័តមាននេះ