គេហទំព័រ MCOT របស់ថៃផ្សាយជាភាសាអង់គ្លេសនៅថ្ងៃទី៤ មីនា ឱ្យដឹងថា ក្រុមសម្ព័ន្ធភាពប្រជាជនដើម្បីលទ្ធិប្រជាធិបតេយ្យហៅក្រុមអាវលឿងពេលនេះមានផែនការប្រមូលហត្ថលេខាឱ្យបាន២០.០០០ ក្នុងកិច្ចខិតខំប្រឹងប្រែងរបស់ពួកគេ ដើម្បីប្តឹងទម្លាក់លោកនាយករដ្ឋមន្ត្រីអាប់ភីស៊ីត ចេញពីតំណែងដោយក្រុមនេះចោទប្រកាន់ថា លោកអាប់ភីស៊ីត មិនបានបំពេញកាតព្វកិច្ចរបស់ខ្លួនធ្វើឱ្យថៃបាត់បង់ទឹកដីទៅកម្ពុជា ។
លោក Prapan Koonmee ជាសមាជិកសំខាន់មួយរូបរបស់ក្រុមអាវលឿងនិយាយថា ក្រុមរបស់ខ្លួននឹងប្រើប្រាស់មធ្យោបាយស្របច្បាប់ដាក់សម្ពាធលើរដ្ឋាភិបាលលោកអាប់ភីស៊ីត ដោយប្រមូលហត្ថលេខាឱ្យបាន២០.០០០ដែលតម្រូវដោយរដ្ឋធម្មនុញ្ញ ។ Prapan និយាយថា លោកនាយករដ្ឋមន្ត្រីអាប់ភីស៊ីត នឹងត្រូវប្តឹងទម្លាក់ចេញពីតំណែងពីបទមិនបំពេញកាតព្វកិច្ចរបស់ខ្លួន ។
លោកចម្លងស្រ៊ីមឿង មេដឹកនាំចលនាអាវលឿងនិយាយថា ឥឡូវនេះក្រុមរបស់ខ្លួននឹងបង្កើនយុទ្ធនាការ ដើម្បីជូនដំណឹងដល់ពលរដ្ឋថៃថា ប្រសិនបើថៃបាត់បង់ទឹកដីមានជម្លោះ៤,៦គីឡូម៉ែត្រការ៉េ ទៅកម្ពុជា ថៃនឹងបាត់បង់ដីទំហំ១៨០.០០០រ៉ៃ ទៀតទៅកម្ពុជា ៕
ចែករំលែកព័តមាននេះ