គោលដៅ គឺចង្អុលបង្ហាញឱ្យឃើញថា នឹងសន្សំប្រាក់ទាំងនេះសម្រាប់ធ្វើអ្វី ? មនុស្សខ្លះត្រូវការមានផ្ទះតាមសុបិន និងខ្លះទៀតមានផ្ទះហើយ ប៉ុន្តែត្រូវការប្រាក់ដើម្បីតុបតែងផ្ទះឱ្យស្អាតថែមទៀត ឬសូម្បីតែការទិញគ្រឿងសង្ហារិមដាក់ផ្ទះ សុទ្ធសឹងតែត្រូវចាយប្រាក់លើសពីការចាយវាយជាប្រចាំ ។ យើងសូមណែនាំ៦គន្លឹះងាយៗដែលជួយឱ្យអ្នកសន្សំប្រាក់បានងាយឡើងសម្រាប់យកទៅវិនិយោគតាមគោលដៅដែលត្រូវការ ។
១-កំណត់គោលដៅ ៖
នៅពេលណាក៏ដោយដែលចាំបាច់ត្រូវសន្សំប្រាក់ពីការចាយវាយទូទៅ វាសំខាន់ណាស់ដែលត្រូវដឹងថា ការសន្សំប្រាក់ក្នុងចំនួននេះសម្រាប់គោលដៅអ្វី ។ ការកំណត់គោលដៅចុងក្រោយដែលច្បាស់លាស់ នឹងជួយឱ្យអ្នកមានការតាំងចិត្តក្នុងការសន្សំច្រើនឡើងបាន ។
២-បែងចែកថវិកា ៖
ការបែងចែកថវិកា ជារឿងដំបូងដែលតែងគិតដល់ ពេលដែលត្រូវការសន្សំប្រាក់សម្រាប់គោលដៅអ្វីម្យ៉ាង គឺបដិសេធមិនបានថា ការតាំងចិត្តក្នុងការបែងចែកថវិកាគឺសំខាន់ ព្រោះជាញឹកញាប់ការដាក់ផែនការប្រាក់រយៈពេលវែងប្រចាំឆ្នាំ ចុងបញ្ចប់ ក៏មិនអាចធ្វើបានផល ។
ប៉ុន្តែសម្រាប់ការដាក់ផែនការប្រាក់រយៈពេលខ្លី ដូចជាប្រចាំខែ ឬតាមលក្ខណៈការចាយវាយ វាអាចជួយឱ្យអ្នកកែតម្រូវថវិកាបានយ៉ាងសមស្រប និងងាយស្រួលជាងពេលដែលត្រូវការចាយវាយច្រើន ឬតិចជាងពេលធម្មតា ។
៣-លះបង់ការចំណាយលើស ៖
សាកល្បងប៉ាន់ស្មានតួលេខមើលថា ការចំណាយលើសនៅក្នុងជីវិតប្រចាំថ្ងៃច្រើនតិចប៉ុនណា ។ កាហ្វេដែលមានតម្លៃថ្លៃ ទោះបីជាការចំណាយម្តងៗមិនច្រើនក្តី ប៉ុន្តែបើយកមករួមបញ្ចូលគ្នា វានឹងក្លាយជាតួលេខខ្ពស់ ដូចជា កាហ្វេ១កែវតម្លៃ១០០បាតក្នុង១ថ្ងៃ នឹងធ្វើឱ្យការចំណាយកើនឡើង៧០០បាតក្នុង១សប្តាហ៍ ឬ២.៨០០បាតក្នុង១ខែជាដើម។ វានឹងល្អជាងនេះ បើអ្នកប្តូរការចំណាយលើសទៅជាប្រាក់សន្សំដើម្បីសម្រេចគោលដៅដែលកំណត់ ។
៤-ផ្ញើប្រាក់នៅធនាគារ និងគ្រួសារ ៖
ប្រាប់ទៅក្រុមគ្រួសារ មិត្តភក្តិ ឬអ្នកជិតស្និទ្ធឱ្យដឹងថា អ្នកកំពុងតែសន្សំប្រាក់ ។ ប្រសិនបើអ្នករស់នៅជាមួយគ្រួសារ ជម្រើសដែលជួយឱ្យអ្នកអាចសន្សំប្រាក់នោះ គឺប្រញាប់ផ្ញើប្រាក់សន្សំរបស់អ្នកជាមួយសមាជិកគ្រួសារដែលទុកចិត្ត ឬយកប្រាក់ទៅផ្ញើនៅធនាគារ វានឹងជួយកាត់បន្ថយបញ្ហា មុនពេលអ្នកមិនអាចរង់ចាំបាន ហើយដកប្រាក់សន្សំទាំងនោះទៅចាយវាយ ។
៥-ផ្លាស់ប្តូរសេវាកម្មធនាគារ ៖
ធ្លាប់តាមដានស្ថានការណ៍ប្រាក់ក្នុងធនាគាររបស់ខ្លួនឬអត់ ? មិនចាំបាច់ប្លែកចិត្តទេ បើសិនជាចម្លើយតបនោះគឺ «អត់» ប៉ុន្តែទោះជាយ៉ាងណា រឿងនេះនឹងជួយឱ្យជួបនូវលក្ខខណ្ឌល្អៗដែលអាចកាត់បន្ថយការចំណាយ ឬបន្ថែមចំណូលដោយទទួលការប្រាក់ពីប្រាក់បញ្ញើ ។
ការផ្លាស់ប្តូរសេវាកម្មធនាគារ រួមទាំងប្រូម៉ូសិនផ្សេងៗដូចជា សេវាកម្មថ្មីរបស់ធនាគារ, ការប្តូរទៅធនាគារថ្មីដែលមានការចំណាយតិចជាង និងការផ្ញើប្រាក់តាមប្រូម៉ូសិនដែលផ្តល់អត្រាការប្រាក់ខ្ពស់ជាងតម្លៃទីផ្សារជាដើម ដែលទាំងអស់នេះនឹងជួយឱ្យអ្នកមានប្រាក់សន្សំច្រើនឡើង និងឆាប់រហ័ស ។
៦-ស្ម័គ្រជាសមាជិក VIP ៖
ហាងទំនិញមួយចំនួនតែងបង្កើត Brand និងផ្តល់សិទ្ធិពិសេសដល់អតិថិជនរបស់ខ្លួនដូចជា ប័ណ្ណសមាជិក ឬប័ណ្ណ VIP សម្រាប់បញ្ចុះតម្លៃទំនិញ ឬសេវាកម្ម ។ លើសពីនេះទៀត នៅទទួលបានសិទ្ធិពិសេសតាមរដូវកាលទៀតផង។ ការសន្សំពីតូចៗដោយកាត់បន្ថយការចំណាយទាំងនេះ នឹងជួយឱ្យអ្នកអាចសន្សំប្រាក់កើនឡើងដោយស្មានមិនដល់ ៕
ចែករំលែកព័តមាននេះ