រដ្ឋមន្ត្រីការពារប្រទេសអាមេរិក លោករ៉ូប៊ែត ហ្គេត បានអញ្ជើញទៅដល់ប្រទេសអេហ្ស៊ីប កាលពីល្ងាចថ្ងៃទី២៣ មីនា កន្លងមក សម្រាប់ដំណើរទស្សនកិច្ចលើកដំបូងរបស់លោកនៅប្រទេសនេះ ចាប់តាំងពីពួកបាតុករបង្ខំឱ្យសម្ព័ន្ធមិត្តអាមេរិក លោកប្រធានាធិបតីហូស្នី មូ បារ៉ាក់ ដែលកាន់អំណាចអស់រយៈពេលយ៉ាងយូរ ចុះចេញពីតំណែងមក ។ វាក៏ជាការឈប់សំចតលើកដំបូងរបស់លោករ៉ូប៊ែត ហ្គេត នៅក្នុងតំបន់ចាប់តាំងពីសហរដ្ឋអាមេរិក និងប្រទេសជាសម្ព័ន្ធមិត្ត បើកការវាយប្រហារតាមអាកាសប្រឆាំងមេដឹកនាំផ្តាច់ការលីប៊ី លោកមូអាម៉ា កាដាហ្វី មក ។
លោករ៉ូប៊ែត ហ្គេត ដែលជួយពង្រឹងទំនាក់ទំនងផ្នែកយោធារវាងអាមេរិក និងអេហ្ស៊ីបនេះនឹងជួបជាមួយមេដឹកនាំយោធា និងមន្ត្រីអេហ្ស៊ីប ទាំងឡាយ។
អេហ្ស៊ីបទទួលជំនួយផ្នែកយោធាជាប្រាក់១,៣ពាន់លានដុល្លារ ក្នុងមួយឆ្នាំពីសហរដ្ឋអាមេរិក ។
ប្រមុខមន្ទីរប៉ង់តាហ្គោនបានអញ្ជើញទៅកាន់ប្រទេសអេហ្ស៊ីបក្រោយពីពលរដ្ឋអេហ្ស៊ីប បោះប្រជាមតិលើកំណែទម្រង់រដ្ឋធម្មនុញ្ញ ដើម្បីរិះរកមធ្យោបាយឱ្យប្រទេសធ្វើដំណើរឆ្ពោះទៅមុខ ។ លោករ៉ូប៊ែត ហ្គេត នឹងជួបជាមួយនាយករដ្ឋមន្ត្រីអេហ្ស៊ីប លោក Essam Sharaf និងរដ្ឋមន្ត្រីការពារប្រទេស លោក Mohamed Hussein Tantawi ផងដែរ ។
មន្ត្រីមន្ទីរប៉ង់តាហ្គោនជាន់ខ្ពស់មួយរូបនិយាយប្រាប់អ្នកកាសែតដែលធ្វើដំណើរជាមួយលោករ៉ូប៊ែតហ្គេតថា ក្នុងទស្សនកិច្ចនៅប្រទេសអេហ្ស៊ីប លោករ៉ូប៊ែត ហ្គេត និងសមភាគីអេហ្ស៊ីប នឹងពិភាក្សាគ្នាអំពីការវាយប្រហារតាមអាកាសជាបន្តនៅលីប៊ី ។
លោករ៉ូប៊ែត ហ្គេត បានអញ្ជើញទៅកាន់ប្រទេសអេហ្ស៊ីប ក្រោយពីបំពេញទស្សនកិច្ចរយៈពេល២ថ្ងៃនៅប្រទេសរុស្ស៊ី ៕
ចែករំលែកព័តមាននេះ