ប្រទេសចិន ៖ ការវិនិយោគវិស័យអចលនទ្រព្យនៅក្រៅប្រទេសចិន នៅតែមានភាពរឹងមាំក្នុងឆមាសទី១ឆ្នាំនេះជាមួយនឹងកំណើនក្នុងទីក្រុងមួយចំនួន ។ នេះបើតាមរបាយការណ៍ចេញផ្សាយដោយ
ប្រទេសចិន ៖ ការវិនិយោគវិស័យអចលនទ្រព្យនៅក្រៅប្រទេសចិន នៅតែមានភាពរឹងមាំក្នុងឆមាសទី១ឆ្នាំនេះជាមួយនឹងកំណើនក្នុងទីក្រុងមួយចំនួន ។ នេះបើតាមរបាយការណ៍ចេញផ្សាយដោយក្រុមហ៊ុនផ្តល់សេវាកម្មអចលនទ្រព្យអន្ដរជាតិ Knight Frank ។
របាយការណ៍ឱ្យដឹងថា ក្នុងចន្លោះពីខែមករា និងមិថុនា មូលធនវិនិយោគក្នុងវិស័យអចលនទ្រព្យក្រៅប្រទេសរបស់ជនជាតិចិន សរុបចំនួន១០,៧ប៊ីលានដុល្លារអាមេរិក ធ្លាក់ចុះ១៣,៦% បើធៀបនឹងរយៈពេលដូចគ្នាឆ្នាំមុន។ ការវិនិយោគក្រៅស្រុកកាលពីដើមឆ្នាំមុនរួមមាន ការទិញសណ្ឋាគារ Waldorf Astoria នៅទីក្រុងញូវយ៉ក ក្នុងតម្លៃ១,៩ប៊ីលានដុល្លារសហរដ្ឋអាមេរិក ។
របាយការណ៍បញ្ជាក់ថា ការវិនិយោគក្រៅស្រុករបស់ចិនទាំងមូលកំពុងមានសន្ទុះ ដោយសារការជំរុញច្រើនជាងគេពីសេដ្ឋកិច្ចចិន ។ ទីតាំងជាសកលទទួលបានការចាប់អារម្មណ៍ពីវិនិយោគិនចិន ដោយសារលក្ខខណ្ឌទីផ្សារក្នុងស្រុកអំណោយផលដូចជា ការរំពឹងទុកកំណើននៃការជួល និងលុយផោនរបស់អង់គ្លេសមានតម្លៃថោកជាដើម។
សហរដ្ឋអាមេរិកបានទាក់ទាញការវិនិយោគពីចិន មានតម្លៃ៥,១ប៊ីលានដុល្លារក្នុងរយៈពេល៦ខែ កើនឡើង២១%ប្រចាំឆ្នាំ ដែលនេះជាគោលដៅសំខាន់បំផុតសម្រាប់មូលធនចិន ។ ទីក្រុងញូវយ៉កបានទាក់ទាញការវិនិយោគពីចិន៨០% ជាពិសេស ទៅលើការិយាល័យ ។
ចំណែកការវិនិយោគនៅប្រទេសអង់គ្លេសវិញ បានកើនឡើងគួរឲ្យចាប់អារម្មណ៍មានអត្រា៧៥%ក្នុងអំឡុងពេលដូចគ្នា ។ ធនាគារឯកជន និងក្រុមពាណិជ្ជករបានក្លាយជាផ្នែកមួយសំខាន់ក្នុងវិស័យវិនិយោគ ដែលពីមុនត្រូវបានត្រួតត្រាដោយក្រុមហ៊ុនធានារ៉ាប់រងធំៗ ។
លោក Bunny Wang នាយកជាន់ខ្ពស់ និងជាប្រធានផ្នែកទីផ្សារមូលធនអន្ដរជាតិ ព្រមទាំងទីផ្សារគម្រោងអន្តរជាតិនៃក្រុមហ៊ុន Knight Frank ប្រទេសចិន ជឿជាក់ថា វិនិយោគិនចិននឹងបន្តចាប់អារម្មណ៍នៅក្នុងទីផ្សារប្រពៃណី។ លោកថ្លែងថា ៖ « ការរីកដុះដាលនៃការទិញនេះបណ្ដាលមកពីការធ្លាក់ថ្លៃយឺតៗនៃប្រាក់យន់ធៀបនឹងប្រាក់ដុល្លារអាមេរិក ដែលជាសញ្ញាល្អសម្រាប់ទីផ្សារ យ៉ាងហោចណាស់ក្នុងរយៈពេលខ្លី ។ ម្យ៉ាងទៀត ទីផ្សារអចលនទ្រព្យក្នុងស្រុកមានការប្រកួតប្រជែងខ្ពស់ ជាហេតុធ្វើឱ្យវិនិយោគិន និងក្រុមហ៊ុនអភិវឌ្ឍន៍ជាច្រើនចាប់អារម្មណ៍ពង្រីកការវិនិយោគរបស់ខ្លួននៅបរទេស » ៕
ចែករំលែកព័តមាននេះ