រាជធានីភ្នំពេញ៖ សេចក្តីរាយការណ៍ឱ្យដឹងថា នៅអធិការដ្ឋាននគរបាលខណ្ឌពោធិ៍សែនជ័យ កាលពីម៉ោង០៣រសៀលថ្ងៃទី១២ វិច្ឆិកា នេះ មានរៀបចំបើកសន្និសីទកាសែតមួយ បង្ហាញមុខក្រុមចោរប្លន់ជនជាតិចិន២នាក់ ពាក់ករណីប្លន់ចិនគ្នាឯងនៅក្នុងបណ្ណាគារ ស៊ីនហួរ ។ បន្ទាប់ពីកម្លាំងស្រាវជ្រាវចាប់បានពួកគេ នៅក្នុងផ្ទះលេខ46H ដែលមានទីតាំងក្នុងបុរីអាកាសចរណ៍ ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
ប្រភពឱ្យដឹងទៀតថា ក្រោយចាប់ខ្លួនទាំង២នាក់ ត្រូវកម្លាំងនាំទៅសាកសួរចម្លើយតាមជំនាញ ក៏បានបែកធ្លាយឱ្យដឹងថា ការពិតជនសង្ស័យម្នាក់ គឺជាមេខ្លោងក្នុងការរៀបចំគម្រោងប្លន់នោះ គឺឈ្មោះចាវ ជីវ៉ី អាយុ៤០ឆ្នាំ ស្នាក់នៅផ្ទះលេខ46H (ផ្ទះចាប់ខ្លួន) នោះ មានមុខរបរទំនាក់ទំនងការទិញ-លក់ដីក្នុងស្រុកខ្មែរនេះ ។
គួររំលឹកថា រយៈពេល៣ថ្ងៃកន្លងមកហើយ ដែលកម្លាំងនគរបាលខណ្ឌពោធិ៍សែនជ័យ និងកម្លាំងនគរបាលព្រហ្មទណ្ឌនៃស្នង ការដ្ឋាននគរបាលរាជធានី បានតាមប្រមាញ់ក្រុមចោរប្លន់ប្រដាប់អាវុធជនជាតិចិន ដែលបានធ្វើសកម្មភាពបាញ់ប្លន់យកកាបូបលុយ និងខ្សែ.កមាសពីជនជាតិចិនដូចគ្នា នៅក្នុងបណ្ណាគារ ស៊ីន ហួរ ព្រមទាំងបាញ់សម្លាប់ខ្មែរម្នាក់ដែលជាយោធាកងពលតូចលេខ៧០ និងម្នាក់ទៀតរបួសស្រាល ។
រហូតមកដល់វេលាម៉ោង៩ព្រឹកថ្ងៃទី៩ វិច្ឆិកា បន្ទាប់ពីធ្វើការស្រាវជ្រាវទទួលបានព័ត៌មានពីទីតាំងដែលជនសង្ស័យជាក្រុមចោរកំពុងលាក់ខ្លួននោះ កម្លាំងខាងលើបានបន្តទៅធ្វើការឡោមព័ទ្ធផ្ទះល្វែងមួយកន្លែងលេខ៤៦H ដែលមានទីតាំងស្ថិតនៅក្នុងបុរីអាកាសចរណ៍ ក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
បន្ទាប់មក កម្លាំងបានធ្វើការឃាត់ខ្លួន ជនសង្ស័យដែលជាជនជាតិចិនបានចំនួន២នាក់ និងធ្វើការឆែកឆេរផ្ទះនោះ រកឃើញប្រអប់កាំភ្លើងខ្លី១ម៉ាកបេរតា ដែលសង្ស័យថា ជាប្រអប់ដាក់កាំភ្លើង ដែលធ្វើសកម្មភាពបាញ់ប្លន់ និងបាញ់សម្លាប់ជនរងគ្រោះ រួចហើយជនសង្ស័យទាំងពីរនាក់នោះ ត្រូវបានបញ្ជូនខ្លួនទៅធ្វើការសាកសួរ នៅអធិការដ្ឋាននគរបាលខណ្ឌ ហើយកម្លាំងនគរបាល ក៏បានដកចេញពីទីនោះនាវេលាម៉ោង១២ និង៣០នាទីរសៀលថ្ងៃដដែលនោះ ។
នគរបាលមិនទាន់បានប្រាប់ឱ្យដឹងពីអត្តសញ្ញាណជនសង្ស័យ ដែលត្រូវឃាត់ខ្លួនទាំងពីរនាក់នោះនៅឡើយទេ ដោយគ្រាន់តែបង្ហើបឲ្យដឹងខ្លះៗថា ជនសង្ស័យដែលឃាត់ខ្លួននោះ មានម្នាក់សង្ស័យថា បានកាន់ឆត្រឈរចាំមើលផ្លូវខាងក្រៅ ខណៈបក្សពួកកំពុងចូលធ្វើសកម្មភាពបាញ់ប្លន់ក្នុងបណ្ណាគារនោះ ។ ចំណែកម្នាក់ទៀតនៅមិនទាន់ដឹងថា យ៉ាងណានៅឡើយទេ ប៉ុន្តែទោះបីបែបណាពួកគេកំពុងស្ថិតក្នុងការ សង្ស័យតែប៉ុណ្ណោះ ។ រីឯជនដៃដល់តែម្ដងនៅតែបន្តគេចខ្លួន។
ដោយឡែកផ្ទះលេខ៤៦Hនោះក៏មានការសង្ស័យថាជាផ្ទះដែលជនត្រូវឃាត់ខ្លួន និងជនដៃដល់ស្នាក់នៅជាមួយគ្នាទៀតផង ។ គួរបញ្ជាក់ផងដែរថា ក្រុមចោរខាងលើបានធ្វើសកម្មភាពភ្ជង់ប្លន់យកកាបូបលុយពីជនជាតិចិនដូចគ្នា នៅក្នុងបណ្ណាគារ យីហោ ស៊ីន ហួរ ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ កាលពីវេលាម៉ោង១និង៥៥នាទីរសៀលថ្ងៃទី៦ វិច្ឆិកា ។
ជនជាតិចិនដែលជាម្ចាស់បណ្ណាគារត្រូវចោរប្លន់យកកាបូបលុយនោះឈ្មោះ លូ បាយហេង ភេទប្រុស អាយុ៥៤ឆ្នាំ ។ ជនរងគ្រោះដែលស្លាប់ ឈ្មោះ យ៉េន រីណង់ អាយុ២៣ឆ្នាំជាមន្ត្រីយោធានៅកងពលតូចលេខ៧០ និងជាសិក្ខាកាមផ្នែកគីមីសាស្ត្រមានទីលំនៅក្នុងភូមិសំរោង ឃុំបារាយណ៍ ស្រុកបារាយណ៍ ខេត្តកំពង់ធំ ហើយក៏ទើបតែមកលេងនៅកន្លែងកើតហេតុបានរយៈពេល២ថ្ងៃប៉ុណ្ណោះ ក៏ត្រូវបានស្លាប់ និងអ្នករងរបួសឈ្មោះ យី សុខហេង អាយុ២៦ឆ្នាំជាយោធានៅអង្គភាពជាមួយគ្នានោះដែរ ។
ប្រភពពីនគរបាលបានបញ្ជាក់សាជាថ្មីថា បើតាមការបាយការណ៍របស់ជនរងគ្រោះដែលជាជនជាតិចិនម្ចាស់បណ្ណាគារកើតហេតុ គឺក្រុមចោរមានគ្នាតែ២នាក់ទេ ប៉ុន្តែក្រោយការត្រួតពិនិត្យកាមរ៉ាសុវត្ថិភាពគឺ ចោរមានគ្នាចំនួន៣នាក់ក្នុងនោះ២នាក់ចូលធ្វើសកម្ម ភាពប្លន់នៅខាងក្នុង និងសង្ស័យមានម្នាក់ទៀតកាន់ឆត្រឈរចាំផ្លូវនៅខាងក្រៅ ។ មិនតែប៉ុណ្ណោះពួកចោរបានដើរចូលទៅធ្វើសកម្មភាពប្លន់មិនមែនជិះម៉ូតូ ឬរ៉ឺម៉កកង់បីទៅប្លន់ដូចដែលព័ត៌មានទទួលបានដំបូងៗនោះឡើយ ហើយប្លន់យកបានតែកាបូបលុយចំនួន៥០០ដុល្លារ និងខ្សែកមាសជាង១តម្លឹងប៉ុណ្ណោះ ។
ចែករំលែកព័តមាននេះ