ហ្វ៊ុនស៊ិនប៉ិចប្តូររូបសញ្ញាគណបក្សនិងទង់
រាជធានីភ្នំពេញ ៖ គណបក្សហ្វ៊ុនស៊ិនប៉ិចដែលអស់ទីតាំងឈរជើងទាំងស្រុងនៅក្នុងរដ្ឋសភា នាអាណត្តិទី៥ បានធ្វើសមាជវិសាមញ្ញមួយ
រាជធានីភ្នំពេញ ៖ គណបក្សហ្វ៊ុនស៊ិនប៉ិចដែលអស់ទីតាំងឈរជើងទាំងស្រុងនៅក្នុងរដ្ឋសភា នាអាណត្តិទី៥ បានធ្វើសមាជវិសាមញ្ញមួយ នៅថ្ងៃទី១១ វិច្ឆិកា ដើម្បីផ្លាស់ប្តូររូបសញ្ញា (Logo) និងទង់គណបក្សដោយរំពឹងថា នឹងទទួលបានការគាំទ្រជាថ្មីពីអ្នកបោះឆ្នោត។ នៅក្នុងសមាជវិសាមញ្ញជាលើកទី៣ ក្រោយការយាងមកដឹកនាំគណបក្សហ្វុ៊នស៊ិនប៉ិចជាថ្មីកាលពីឆ្នាំ២០១៥នោះ សម្តេចក្រុមព្រះ នរោត្តម រណឫទ្ធិ ក៏បានធ្វើការអំពាវនាវឲ្យមានការរួបរួមគ្នារវាងគណបក្សនយោបាយចំនួន៣នៅកម្ពុជាផងដែរ ។
សមាជវិសាមញ្ញរបស់គណបក្សរាជានិយមហ្វុ៊នស៊ិនប៉ិច (FUN) ដែលរៀបចំធ្វើឡើងនៅកោះពេជ្រ កាលពីព្រឹកថ្ងៃទី១១ វិច្ឆិកានេះ បានអនុម័តជាឯកច្ឆន្ទលើវិសោធនកម្មលក្ខន្តិកៈរបស់គណបក្ស ដោយបានសម្រេចផ្លាស់ប្តូររូបសញ្ញា (Logo) គណបក្សថ្មីស្រឡាង ។ ជារូបសញ្ញាថ្មី ដែលបានរំលេចនូវព្រះឆាយាល័ក្ខណ៍របស់សម្តេចក្រុមព្រះផ្ទាល់ បានចារឹកនៅចំពីលើកាំរស្មីចំនួន២៥ពណ៌ តំណាងឲ្យរាជធានី-ខេត្តទាំង២៥នៅកម្ពុជា ទ្រដោយបូពណ៌លឿងតំណាងឲ្យភាពបរិសុទ្ធ និងព័ទ្ធជុំវិញដោយរង្វង់មូលពណ៌លឿង ពណ៌ស និងមានផ្ទៃពណ៌ខៀវ។ រីឯរូបសញ្ញាថ្មីនេះគឺជំនួសឲ្យរូបសញ្ញាចាស់ដែលគ្មានព្រះឆាយាល័ក្ខណ៍របស់ព្រះអង្គ។ សម្តេចក្រុមព្រះ មានបន្ទូលថា ការដែលបក្សហ្វុ៊នសុិនបុិចមិនបានទទួលអាសនៈក្នុងពេលកន្លងមកនេះដោយសារតែហ្វុ៊នស៊ិនប៉ិច បែកបាក់គ្នា ។
ព្រះអង្គមានបន្ទូលថា ហ្វុ៊នស៊ិនប៉ិចខ្លួនឯងទេ ដែលធ្វើឲ្យមានការបែកបាក់គ្នាដែលបានធ្វើឲ្យគណបក្សហ្វុ៊នស៊ិនប៉ិច មិនទទួលបានអាសនៈក្នុងរដ្ឋសភា ។ ព្រះអង្គបានស្នើដល់អ្នកសីហនុនិយមត្រូវរួមគ្នា ដើម្បីឲ្យមានការទទួលបានអាសនៈក្នុងសភាឡើងវិញ ដោយរួមគ្នាជាមួយអ្នកស្នេហាជាតិដទៃទៀត ។
សម្តេចក្រុមព្រះ បានលើកឡើងថា នៅក្នុងប្រទេសកម្ពុជាមានគណបក្សចំនួន៣ គឺគណបក្សប្រជាជនកម្ពុជា គណបក្សហ្វុ៊ស៊ិនប៉ិច និងគណបក្សសង្គ្រោះជាតិ ។ សម្តេចក្រុមព្រះ បានស្នើដល់សមាជិកសមាជិកាគណបក្សហ្វុ៊នស៊ិនប៉ិច ត្រូវតែស្បថចំពោះវិញ្ញាណក្ខន្ធសម្ដេចឪសម្តេចតានរោត្តម សីហនុ ថានឹងខិតខំធ្វើឲ្យទៅជាគណបក្សទី១នៅកម្ពុជា ។
ព្រះអង្គ បានបញ្ជាក់ថា ព្រះបិតារបស់ព្រះអង្គ សម្តេចឪ នរោត្ដម សីហនុ បានមានបន្ទូលថា យើងមានសំណាងណាស់កើតជាខ្មែរ ។ គណបក្សហ្វុ៊នស៊ិនប៉ិច បាននាំមកនូវបាវចនាជាតិ សាសនា ព្រះមហាក្សត្រ រហូតដល់ពេលនេះ ។ ខ្មែរចេះរួបរួមគ្នា ទឹកដីនៅគង់វង្ស តែបើគេបំផ្លាញវប្បធម៌ជាតិយើងបានហើយ យើងចាំតែប្រុងទៅ ។ គ្មានអ្វីសំខាន់ជាងជាតិនិងវប្បធម៌ជាតិនោះទេ ។
សម្តេចក្រុមព្រះ បានលើកឡើងថា មានគេមិនចង់ឲ្យយើងធ្វើដូចនេះទេ ។ យើងត្រូវសន្យាការពាររបបរាជានិយមរបស់យើង និងបូរណភាពទឹកដី ។ ចង់ដោះស្រាយបញ្ហាទឹកដីកម្ពុជាត្រូវរួបរួមគ្នា ។ យើងមិនអាចធ្វើតែម្នាក់ឯងនោះឡើយ ។
សម្តេចក្រុមព្រះ មានបន្ទូលផ្លែផ្កាទៅរកបក្សប្រឆាំងថា គណបក្សមួយឈ្មោះគណបក្សសង្គ្រោះជាតិខ្មែរ តែមានគេថាជាគណបក្សបំផ្លាញជាតិខ្មែរ ។ លោក សម រង្ស៊ី កុំភ្លេចហ្វុ៊នស៊ិនប៉ិច តែលោក សម រង្ស៊ី ថា «ហ្វុ៊នស៊ិនប៉ិចខ្សោយណាស់» តែបើចង់ដោះស្រាយបញ្ហាជាតិត្រូវរួមគ្នាទើបអាចធ្វើទៅបាន ។
សម្តេចក្រុមព្រះ មានបន្ទូលថា នរណាក៏ដឹងថា នៅកម្ពុជាមានបក្សធំបី គឺគណបក្សប្រជាជនកម្ពុជាដឹកនាំប្រទេស គណបក្សសង្គ្រោះជាតិ និងគណបក្សរាជានិយមហ្វុ៊នស៊ិនប៉ិច ។ សន្តិភាពនៅកម្ពុជាកើតឡើងក្រោយឆ្នាំ១៩៩៣ ដែលពេលនោះមានគណបក្សហ្វុ៊នស៊ិនប៉ិចផងដែរ ។ ការដោះស្រាយបញ្ហាជាតិខ្មែរ ត្រូវតែខ្មែររួមគ្នា ។ បើសិនជាខ្មែរអង្គុយនិយាយគ្នា អាចដោះស្រាយបញ្ហាជាតិបានមិនខាន ។
សម្តេចក្រុមព្រះ បានមានបន្ទូលថា ខ្មែរនៅតែក្រចាញ់ប្រទេសសិង្ហបុរី ដែលគេគ្មានទាំងទឹកផឹកផង គេរីកចម្រើនតែយើងធ្វើមិនបាន ។ចំពោះបញ្ហាអ្នកដែលចេញពីគណបក្សហ្វុ៊នស៊ិនប៉ិច គឺពួកអ្នករត់ចោលជួរ ។ សម្តេចក្រុមព្រះមានបន្ទូលថា ព្រះអង្គមិនដែលដេញនរណាចេញពីបក្សទេ ទោះបីជាគេទម្លាក់ទ្រង់ចេញពីប្រធានបក្សក្តី ។ ព្រះអង្គបានស្នើសុំដល់មេដឹកគណបក្សធំៗនៅកម្ពុជា រួមគ្នាដើម្បីដោះស្រាយជូនប្រជាពលរដ្ឋខ្មែរប្រមាណ១៤លាននាក់ ត្រូវការឲ្យអ្នកនយោបាយជួយពួកគេ ។ យើងមិនដឹងថាពេលណាចេះរួមគ្នានោះទេ ។ ព្រះអង្គសង្កត់ធ្ងន់ថា ចំពោះអ្នកហ្វុ៊ុនស៊ិនប៉ិច នៅពេលដកទ្រង់ចេញពេលបោះឆ្នោត២០១៣ ទទួលបានសូន្យកៅអី ព្រោះតែការមិនរួមគ្នា មិនដឹងថាពេលណាខ្មែរចេះរួមគ្នានោះទេ ។
សម្តេចក្រុមព្រះ នរោត្តម រណឫទ្ធិ ដែលបច្ចុប្បន្នមានព្រះជន្ម៧៣ព្រះវស្សាទៅហើយនោះ បានហៅលទ្ធផលនៃសមាជវិសាមញ្ញរបស់គណបក្សហ្វុ៊នស៊ិនប៉ិច កាលពីព្រឹកថ្ងៃទី១១ វិច្ឆិកា ឆ្នាំ២០១៦នេះថា គឺជាគណបក្សហ្វុ៊នស៊ិនប៉ិចថ្មី ដែលមានបាវចនា «រាស្ត្រធិបតេយ្យ សាសនា នីតិរដ្ឋ និងរាជបល្ល័ង្ក » ហើយជាអ្វីដែលព្រះអង្គរំពឹងទុកថា នឹងទទួលបានការគាំទ្រជាថ្មី ។
គួរកត់សម្គាល់ថា បន្ទាប់ពីមានការយាងសម្តេចក្រុមព្រះ នរោត្តម រណឫទ្ធិ មកធ្វើជាព្រះប្រធានគណបក្សហ្វុ៊នស៊ិនប៉ិចជាថ្មី កាលពីឆ្នាំ២០១៥ នេះ គឺជាលើកទី៣ហើយ ដែលគណបក្សរាជានិយមមួយនេះបានធ្វើសមាជវិសាមញ្ញ ក្រោយពីការបាក់បែកគ្នាដ៏ជូរចត់រយៈពេលជាច្រើនឆ្នាំ និងរហូតបាត់បង់ទីតាំងឈរជើងទាំងស្រុងនៅក្នុងរដ្ឋសភា ។ ទោះបីជាបែបណា នៅទីបំផុតសម្តេចក្រុមព្រះ នរោត្តម រណឫទ្ធិ និងលោក ញឹក ប៊ុនឆៃ នៅតែមិនអាចរួបរួមគ្នាបានដដែល ដោយលោក ញឹក ប៊ុនឆៃ ក៏បានចេញទៅបង្កើតគណបក្សនយោបាយថ្មីមួយទៀត គឺ «គណបក្សខ្មែររួបរួមជាតិ » ៕
ចែករំលែកព័តមាននេះ