រាជធានីភ្នំពេញ ៖ កម្មវិធីប្រកួតប្រដាល់វគ្គសន្សំពិន្ទុឈានទៅដណ្ដើមខ្សែក្រវាត់គោជល់ក្នុងប្រភេទទម្ងន់៦៥គីឡូក្រាមនៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ទី១២ វិច្ឆិកា ស្អែកនេះឈានចូលដល់សប្ដាហ៍ទី៥ហើយ ។ ឃុន សំខាន់ មកពីក្លិបកងពលតូចលេខ៧០ និងផង់ សុភាព មកពីក្លិបតាឡីដំរីមានរិទ្ធ ដែលមាន៦ពិន្ទុនៅក្នុងដៃរួចទៅហើយនោះ សុទ្ធតែបង្ហាញជំនឿចិត្តរៀងខ្លួនក្នុងការស្វែងរក៣ពិន្ទុបន្ថែមពីការប្រកួតលើកនេះដូចគ្នា ។
ឃុន សំខាន់ ដែលធ្លាប់ប្រកួតបាន៨៣ដង ឈ្នះ៦២ដង ចាញ់១៨ដង ស្មើ៣ដង និងផ្ដួលគូប្រកួតឱ្យសន្លប់បាន១៣ដង ត្រូវជួបប្រកួតជាមួយកីឡាករថៃឈ្មោះចមភព ស.វិរ៉ាវ៉ាន់ ដែលធ្លាប់ប្រកួតបាន៨៧ដង ឈ្នះ៧៥ដង ចាញ់១០ដង ស្មើ២ដង និងផ្ដួលគូប្រកួតឱ្យសន្លប់បាន១៥ដង ។ កីឡាករទាំងពីរប្រកួតបាន២លើករួចមកហើយនិងឈ្នះទាំងពីរលើកមាន៦ពិន្ទុដូចគ្នា។ លើកនេះពួកគេទាំងពីរសុទ្ធតែមានបំណងចង់បាន៣ពិន្ទុបន្ថែមដូចគ្នាដើម្បីឆ្លងផុតពីវគ្គជម្រុះនេះ ។ ដូច្នេះ ឃុន សំខាន់ អាចនឹងជួបការលំបាក ព្រោះគូប្រកួតរបស់គេគឺជាជើងខ្លាំងដែលមានថ្វីដៃប្រកួតនៅលើសង្វៀនមិនអន់នោះទេ ។ ពេលនេះអ្នកខ្លាំងជួបអ្នកខ្លាំងហើយ ចាំមើលអ្នកណាជាអ្នកមានសំណាងរកបាន៣ពិន្ទុបន្ថែមទៀត ។
ចំណែកផង់ សុភាព ដែលធ្លាប់ប្រកួតបាន៧៧ដង ឈ្នះ៦២ដង ចាញ់១៣ដង ស្មើ២ដង និងផ្ដួលគូប្រកួតឱ្យសន្លប់បាន១៣ដង នឹងជួបប្រកួតជាមួយកីឡាករថៃឈ្មោះត្រាកាន ក.កាមន្តវ៉ាត ដែលធ្លាប់ប្រកួតបាន៩៧ដង ឈ្នះ៨១ដង ចាញ់១១ដង ស្មើ៥ដង និងផ្ដួលគូប្រកួតឱ្យសន្លប់បាន១៥ដង ។ គូនេះប្រកួតបាន២លើកម្នាក់រួចមកហើយ ដោយផង់ សុភាព ឈ្នះទាំង២លើកមាន៦ពិន្ទុ រីឯត្រាកាន ក.កាមន្តវ៉ាត ឈ្នះ១ ចាញ់១ មាន៤ពិន្ទុ។ ប្រកួតលើកនេះ ផង់ សុភាព ប្រហែលជាពិបាកបន្តិចហើយដោយសារកីឡាករថៃមានបទពិសោធន៍ប្រកួតនៅលើសង្វៀនមិនអន់នោះទេ ។ អ្វីដែលសំខាន់ជាងនេះទៅទៀតនោះគឺកីឡាករថៃរូបនេះមានកម្ពស់ខ្ពស់ជាងរូបគេទៀតផង ។ ទោះបីយ៉ាងណា ផង់ សុភាព នៅតែមានជំនឿចិត្តថាអាចយកឈ្នះកីឡាករថៃដដែល ។
ចំណែកគូប្រកួតមិត្តភាពរវាងកីឡាករកម្ពុជា និងកម្ពុជាវិញ កីឡាករខេម ចាន់ មកពីក្លិបកងទ័ពពិសេសឆត្រយោង៩១១ នឹងជួបប្រកួតជាមួយកីឡាករឡុង វ៉ាន់ត មកពីក្លិបសាលវ័ន្តកីឡា និងគូចុងក្រោយកីឡាករ ម៉ឺន ដា មកពីក្លិបខ្លារខិនមានរិទ្ធ ប្រកួតជាមួយកីឡាករហ៊ែល វ៉ា មកពីក្លិបឃ្លាំងមឿងកីឡា ៕
ចែករំលែកព័តមាននេះ