រាជធានីភ្នំពេញ ៖ ជនសង្ស័យ២នាក់ ក្នុងនោះមានម្នាក់ គឺជាបុគ្គលិកស្ថាប័នមីក្រូហិរញ្ញវត្ថុ «បំណងប្រាថ្នា» ដែលបានក្លែង Facebook ដោយប្រើឈ្មោះសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ត្រូវនគរបាលនាយកដ្ឋានប្រឆាំងភេវរកម្មក្រសួងមហាផ្ទៃ បញ្ជូនទៅកាន់សាលាដំបូងរាជធានីភ្នំពេញ កាលពីម៉ោង១០ និង៣០នាទីព្រឹកថ្ងៃទី១១ វិច្ឆិកា ដែលសំណុំរឿងនោះ លោកសៀង សុខ ព្រះរាជអាជ្ញារង បានចុះអនុវត្តផ្ទាល់ សម្រេចចោទប្រកាន់លើជនត្រូវចោទចំនួន២បទល្មើស ១-ក្លែងលិខិតសាធារណ: និង២-ប្រើប្រាស់លិខិតសាធារណ:ក្លែង បទចោទនេះ តាមមាត្រា៦២៩.៦៣០ នៃក្រមព្រហ្មទណ្ឌ ។
គួរបញ្ជាក់ថា កាលពីរសៀលថ្ងៃទី១០ វិច្ឆិកា សមត្ថកិច្ចនគរបាលនាយកដ្ឋានប្រឆាំងភេរវកម្មបានធ្វើការបង្ហាញមុខជាសាធារណៈ បន្ទាប់ពីជនសង្ស័យ ត្រូវបានចាប់ខ្លួនកាលពីថ្ងៃទី៩ វិច្ឆិកា ។ ជនសង្ស័យទាំង២នាក់ នឹងត្រូវបញ្ជូនទៅកាន់សាលាដំបូង រាជធានីភ្នំពេញ ក្រោយពេលនាយកដ្ឋានប្រឆាំងភេរវកម្ម និងឧក្រិដ្ឋឆ្លងដែន បំពេញសំណុំបែបបទចប់ ។
នៅក្នុងសន្និសីទកាសែត ដែលធ្វើឡើងនៅអគ្គស្នងការដ្ឋាននគរបាលជាតិប្រព្រឹត្តទៅ ក្រោមវត្តមានលោកឧត្តមសេនីយ៍ឯក អ៊ី សុខឃី ប្រធាននាយកដ្ឋានប្រឆាំងភេរវកម្ម និងឧក្រិដ្ឋឆ្លងដែន ព្រមទាំងមានការចូលរួមពីលោកសៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ ដែលដឹកនាំសម្របសម្រួលតាមផ្លូវច្បាប់ ។
នៅក្នុងសន្និសីទកាសែត លោកឧត្តមសេនីយ៍ឯក អ៊ី សុខឃី បានថ្លែងថា ជនសង្ស័យទី១-ឈ្មោះឈួន សារុន អាយុ៣៩ឆ្នាំ មានស្រុកកំណើតនៅ ភូមិដីក្រហម ឃុំមៀន ស្រុកព្រៃឈរ ខេត្តកំពង់ចាម បច្ចុប្បន្នជាបុគ្គលិកនៅស្ថាប័ន មីក្រូហិរញ្ញវត្ថុ «បំណងប្រាថ្នា» ត្រូវបានចាប់ខ្លួន នៅភូមិសែនសុខ៣ សង្កាត់ឃ្មួញ ខណ្ឌសែនសុខ នៅថ្ងៃទី៩ វិច្ឆិកា និងជនសង្ស័យទី២-ឈ្មោះសួន ចាន់រតនៈ អាយុ២៤ឆ្នាំ រស់នៅភូមិទី៣ សង្កាត់ឃ្មួញ ខណ្ឌសែនសុខ ត្រូវបានចាប់ខ្លួន នៅព្រឹកថ្ងៃទី១០ វិច្ឆិកា នេះ ។
លោកឧត្តមសេនីយ៍បានបញ្ជាក់ថា ជនសង្ស័យទាំង២នាក់បានបង្កើត Account Facebook ដោយប្រើឈ្មោះប្រមុខរាជរដ្ឋាភិបាល ដាក់ថា «សម្តេចហ៊ុន សែន» ហើយបានឧទ្ទេសខ្លួនឯងថា ជាទីប្រឹក្សារដ្ឋលេខាធិការនៃទីស្តីការគណៈរដ្ឋមន្ត្រី ដោយបានក្លែងត្រា និងហត្ថលេខសម្តេចតេជោ ហ៊ុន សែន ទៀតផង ។
ចែករំលែកព័តមាននេះ