ខេត្តកំពង់ចាម ៖ «មណ្ឌលកីឡាហែលទឹកតេជោសែនកំពង់ចាម» មានទីតាំងស្ថិតនៅសង្កាត់កំពង់ចាម ក្រុងកំពង់ចាម ដែលបានសាងសង់ឡើង ដោយមានលក្ខណៈស្តង់ដាrអន្តរជាតិ ត្រូវបានគេមើលឃើញមានពលរដ្ឋមកពីគ្រប់ទិសទី កំពុងតែចាប់អារម្មណ៍ នាំគ្នាមកហែលទឹកលេង ដើម្បីឱ្យបានសុខភាពមាំមួន ។
លោកគ្រូម៉ក់ អោម ក្នុងវ័យ៧៨ឆ្នាំ ជាគ្រូបង្រៀនហែលទឹក មានស្រុកកំណើតនៅភូមិរកាធំ ឃុំជីរោទ៏ទី១ ស្រុកត្បូងឃ្មុំ ខេត្តត្បូងឃ្មុំ បានមានប្រសាសន៍ថា កាលពីពេលដែលរូបគាត់បានឈប់សិក្សាក្នុងវ័យ២២ឆ្នាំ ក៏បានស្រលាញ់ចូលចិត្តវិស័យកីឡាហែលទឹក មានពេលមួយមិត្តភក្តិបាន ហៅឲ្យចូលរៀនហែលទឹកនៅមន្ទីរទេសចរណ៍ចាស់បាន៣ទៅ៤ខែ ក៏ចាប់ផ្តើមបានចូលរួមប្រលងប្រណាំងជាបន្តបន្ទាប់ ។
ដោយសារតែមានភាពលេចធ្លោនោះ រូបគាត់ត្រូវបានគេបញ្ជូនឲ្យទៅរៀននៅប្រទេសចិនបន្ថែមទៀត៧ ទៅ៨ខែបំប៉នជំនាញហែលទឹកក្នុងចន្លោះឆ្នាំ១៩៦៤-១៩៦៥ បានទៅចូលរួមហែលទឹកនៅប្រទេសម៉ាឡេស៊ី គឺទទួលបានមេដាយប្រាក់ចំនួន២ មកជូនជាតិផងដែរ ។
លោកគ្រូម៉ក អោម ទោះបីជាមានវ័យរាងច្រើនបន្តិច តែកម្លាំងនៅរឹងមាំ បានឱ្យដឹងបន្តថា លុះពេលដែលប្រទេសកម្ពុជា បានឆ្លងកាត់ភ្លើងសង្គ្រាមក្នុងរបប៣ឆ្នាំ៨ខែ និង២០ថ្ងៃនោះ គ្រួសារគាត់ត្រូវបានគេចល័តទៅដល់ខេត្តកំពង់ធំ ។ ដែលសំណាងមិនស្លាប់លុះក្រោយឆ្នាំ១៩៧៩ ពេលដែលប្រទេសបានរំដោះក៏មករស់នៅស្រុកកំណើតវិញ ។
បន្ទាប់មកគាត់បានទៅភ្នំពេញ ជួបមិត្តភក្តិចាស់ឈ្មោះហែម ថុន ក៏បានរៀនវិស័យកីឡាបន្ថែម ដល់ឆ្នាំ១៩៨៥ ត្រឡប់មកខេត្តកំពង់ចាម ទទួលបង្ហាត់កីឡាហើយឆ្នាំ២០០៤ចូលនិវត្តន៏ ។ តែកីឡាគាត់នូវតែចូលចិត្តដដែលមិនបានបោះបង់នោះទេ ក្នុងពេលដែលអាងហែលទឹកក្រុងកំពង់ចាម មិនទាន់បានសាងសង់នោះ គាត់បានបង្រៀនសិស្សក្នុងពេលខែប្រាំងត្រូវបង្រៀនឲ្យសិស្សហែលទឹកទន្លេមេគង្គ លុះពេលដល់រដូវវស្សាត្រូវឲ្យសិស្សហែលនៅបឹងទន្សោង ។
ក្រោយពីមណ្ឌលកីឡាហែលទឹកតេជោសែនកំពង់ចាម បានសម្ពោធហើយគាត់បានមកជួយបង្ហាត់បង្រៀនសិស្ស១៤នាក់ ក្នុងនោះមាន២នាក់ បានប្រកួតជាប់មេដាយជាតិ និងកំពុងតែបង្ហាត់ឱ្យសិស្សកាន់តែមានជំនាញល្អប្រសើរឡើង ត្រៀមនឹងប្រកួតកីឡាស៊ីហ្គេមក្នុងឆ្នាំ២០២៣ខាងមុខ ដែលនឹងត្រូវបានប្រារព្ធឡើង នៅក្នុងប្រទេសកម្ពុជា ដែលធ្វើជាម្ចាស់ផ្ទះ ។
ចែករំលែកព័តមាននេះ