ប្រទេសចិន ៖ មហាសេដ្ឋី និងអគ្គនាយកក្រុមហ៊ុន LeEco របស់ប្រទេសចិនបានទទួលស្គាល់ថា ក្រុមហ៊ុនបច្ចេកវិទ្យាដ៏ធំរបស់ខ្លួនកំពុងខ្វះខាតហិរញ្ញវត្ថុ ដើម្បីដំណើរការពង្រីកយ៉ាងលឿនចូលទៅក្នុងទីផ្សាររថយន្តអគ្គិសនី
ប្រទេសចិន ៖ មហាសេដ្ឋី និងអគ្គនាយកក្រុមហ៊ុន LeEco របស់ប្រទេសចិនបានទទួលស្គាល់ថា ក្រុមហ៊ុនបច្ចេកវិទ្យាដ៏ធំរបស់ខ្លួនកំពុងខ្វះខាតហិរញ្ញវត្ថុ ដើម្បីដំណើរការពង្រីកយ៉ាងលឿនចូលទៅក្នុងទីផ្សាររថយន្តអគ្គិសនី និងទូរស័ព្ទស្មាតហ្វូន ។
ក្នុងសំបុត្រដ៏វែងមួយទៅកាន់បុគ្គលិក លោក Jia Yueting បានសូមទោសទៅកាន់ម្ចាស់ភាគហ៊ុនផ្សេងៗ និងសន្យាថា នឹងកាត់ប្រាក់ខែរបស់លោកមកត្រឹម១យន់ ហើយពន្យារពេលការពង្រីកក្រុមហ៊ុន ។ លោកនឹងដឹកនាំក្រុមហ៊ុនឲ្យលូតលាស់ក្នុងល្បឿនដ៏ល្អស័ក្តិសមវិញ ។
គួរបញ្ជាក់ថា LeEco គឺជាក្រុមហ៊ុនធំដែលមានភាគហ៊ុនក្នុងអាជីវកម្មជាច្រើនរួមមាន ផ្នែកកីឡា រថយន្ត ទូរស័ព្ទស្មាតហ្វូន និងទូរទស្សន៍។ ក្រុមហ៊ុននេះល្បីល្បាញត្រង់សេវាកម្ម LeTV និងបានបន្តវិនិយោគយ៉ាងខ្លាំងក្លាលើអាជីវកម្មថ្មីៗដូចជា រោងចក្រផលិតរថយន្តអគ្គិសនីក្នុង Nevada និងទិញយកក្រុមហ៊ុនផលិតទូរទស្សន៍ Vizio Inc ក្នុងតម្លៃ២ប៊ីលានដុល្លារនៅ California ជាដើម ។
Sandy Shen ប្រធានផ្នែកស្រាវជ្រាវក្នុង Gartner Inc និយាយថា ៖ « ក្រុមហ៊ុននេះបានពង្រីកលឿនពេក ។ ពួកគេមានមហិច្ឆតាដ៏ធំក្នុងការបង្កើតប្រព័ន្ធ Ecosystem សម្រាប់ឧបករណ៍ផ្សេងៗគ្នា ។ វាមិនត្រឹមតែសម្រាប់ទូរស័ព្ទស្មាតហ្វូនប៉ុណ្ណោះទេ តែក៏សម្រាប់រថយន្តផងដែរ ។ ពួកគេមានមហិច្ឆតាធំជាងសមត្ថភាពរបស់ខ្លួនក្នុងពេលនេះ» ។
មហាសេដ្ឋីរូបនេះ ដំបូងឡើយបានចាប់ផ្តើមធ្វើការផ្នែក IT ក្នុងការិយាល័យពន្ធដារ ហើយលោកបានបង្កើតក្រុមហ៊ុន Leshi Internet Information & Technology ក្នុងឆ្នាំ២០០៤។ លោកក៏បានឈានទៅរកអាជីវកម្មទូរទស្សន៍អីុនធើរណេតក្នុងឆ្នាំ២០១៣ និងចូលក្នុងទីផ្សារទូរស័ព្ទស្មាតហ្វូនក្នុងឆ្នាំ២០១៥ផងដែរ ។ ប៉ុន្តែការប្រមូលថវិកាក្រុមហ៊ុនរបស់លោក គឺពិតជាមានហានិភ័យខ្ពស់ណាស់ ។
លោក Winston Cheng ប្រធានផ្នែកហិរញ្ញវត្ថុរបស់ LeEco និយាយថា ក្រុមហ៊ុន Leshi ត្រូវបានចុះឈ្មោះក្នុងទីផ្សារហ៊ុន Shenzhen ជាសាធារណៈ ហើយក៏ជាក្រុមហ៊ុនតែមួយគត់ដែលទទួលបានផលចំណេញ ។ លើសពីនេះ លោក Jia បានខ្ចីប្រាក់ពី Leshi ដើម្បីយកទៅវិនិយោគក្រុមហ៊ុនផ្សេងទៀតរបស់លោក ។
ការអនុវត្តដូចនេះបានធ្វើឲ្យសហរដ្ឋអាមេរិកត្រួតពិនិត្យយ៉ាងតឹងរ៉ឹង ខណៈលោក Jia ព្យាយាមចាប់ផ្តើមដំណើរការរោងចក្រផលិតរថយន្តអគ្គិសនី Faraday Future ។
លោក Jia បានសរសេរនៅក្នុងសំបុត្រនោះថា ៖ « សមត្ថភាពប្រមូលថវិការបស់ពួកយើង គឺមិនទាន់រឹងមាំគ្រប់គ្រាន់សម្រាប់ការពង្រីកយ៉ាងលឿននោះឡើយ » ៕
ចែករំលែកព័តមាននេះ