ប្រទេសវៀតណាម ៖ ប្រភពមួយចំនួនបានឲ្យដឹងកាលពីថ្ងៃអាទិត្យថា គណបក្សកុំមុយនីស្តវៀតណាមបានបញ្ជាទៅកាន់អាជ្ញាធរកាលពីខែតុលា ឲ្យធ្វើកំណែទម្រង់លើគម្រោងសាងសង់វារីអគ្គិសនីនុយក្លេអ៊ែរ ដែលត្រូវបានផ្តល់ជំនួយដោយប្រទេសរុស្ស៊ី និងជប៉ុន ដើម្បីពន្យារពេលគម្រោងទាំងនោះ ព្រោះរដ្ឋាភិបាលកំពុងជួបប្រទះនឹងវិបត្តិហិរញ្ញវត្ថុ ។
យោងតាមប្រភពខាងលើឲ្យដឹងថា រដ្ឋាភិបាលកំពុងតែធ្វើការលើកំណែទម្រង់គម្រោងនេះ និងមានបំណងស្នើសេចក្តីរាយការណ៍ទៅកាន់សភាជាតិផងដែរ ។
គួរបញ្ជាក់ថា កាលពីឆ្នាំ២០១០ ប្រទេសវៀតណាមបានសម្រេចចុះកិច្ចសន្យាជាមួយប្រទេសជប៉ុន លើការសាងសង់វារីអគ្គិសនីនុយក្លេអ៊ែរពី២ទៅ៤ ក្នុងខេត្ត Ninh Thuan នៅដើមឆ្នាំ២០២០ ដើម្បីដោះស្រាយបញ្ហាកង្វះខាតថាមពល ។
យោងតាមគម្រោងអភិវឌ្ឍន៍ថាមពលជាតិ ដែលបានសម្រេចកាលពីខែមីនា ឱ្យដឹងថា ការចាប់ដំណើរការនៃវារីអគ្គិសនីនុយក្លេអ៊ែរដំបូងគេ ត្រូវបានពន្យារពេលរហូតដល់ឆ្នាំ២០២៨វិញ ។
យ៉ាងណាក្តី សមាជិកមួយចំនួននៃគណបក្សកុំមុយនីស្តវៀតណាម ក៏បានបង្ហាញពីក្តីបារម្ភលើការសាងសង់វារីអគ្គិសនីនុយក្លេអ៊ែរនេះដែរ ដោយសារបំណុលសាធារណៈបន្តនៅខ្ពស់ និងព្រួយបារម្ភពីសុវត្ថិភាពថាមពល ។ ក្នុងការប្រជុំសភាលើកទី៤ ក្នុងខែតុលានេះ សភាបានសម្រេចថា នឹងពិចារណាលើគម្រោងនេះម្តងទៀតថា នឹងពន្យារពេលឬយ៉ាងណា ។
ទោះយ៉ាងណា មន្ត្រីក្នុងក្រសួងឧស្សាហកម្ម និងពាណិជ្ជកម្មនិយាយថា នឹងគ្មានការរំសាយគម្រោងសាងសង់នេះទាំងមូលឡើយ ។ ជំនួយសម្រាប់គម្រោងនេះរឹងមាំនៅឡើយក្នុងរដ្ឋាភិបាល ព្រោះតែមានការកើនឡើងនៃតម្រូវការអគ្គិសនី និងបញ្ហាបរិស្ថានពាក់ព័ន្ធនឹងវារីអគ្គិសនីប្រើប្រាស់ធ្យូងថ្មផងដែរ ។
គួរបញ្ជាក់ថា តាមគម្រោងបច្ចុប្បន្ន វារីអគ្គិសនីនុយក្លេអ៊ែរទី១របស់វៀតណាម គឺ Ninh Thuan 1 Nuclear Power Plant នឹងត្រូវបានសាងសង់ដោយប្រទេសរុស្ស៊ី ហើយចាប់ផ្តើមដំណើរការក្នុងឆ្នាំ២០២៨ ។ ចំណែករោងចក្រទី២ នឹងត្រូវបានសាងសង់ដោយប្រទេសជប៉ុន ហើយចាប់ដំណើរការក្នុងឆ្នាំ២០២៩ ប៉ុន្តែមិនទាន់សម្រេចពីពេលចាប់ផ្តើមសាងសង់ទេ ៕
ចែករំលែកព័តមាននេះ