រាជធានីភ្នំពេញ ៖ ខ្សែភាពយន្តភាគថ្មីរបស់ទូរទស្សន៍ប៉ុស្តិ៍លេខ៥ បានរៀបចំពិធីក្រុងពលីថតរឿង«ចន្ទវង្វេងមេឃ»កាលពីព្រឹកថ្ងៃទី៨ វិច្ឆិកា ឆ្នាំ២០១៦ នៅសណ្ឋាគារសូហ្វីតែលភូគីត្រា រាជធានីភ្នំពេញ ដោយមានផលិតករ
រាជធានីភ្នំពេញ ៖ ខ្សែភាពយន្តភាគថ្មីរបស់ទូរទស្សន៍ប៉ុស្តិ៍លេខ៥ បានរៀបចំពិធីក្រុងពលីថតរឿង«ចន្ទវង្វេងមេឃ»កាលពីព្រឹកថ្ងៃទី៨ វិច្ឆិកា ឆ្នាំ២០១៦ នៅសណ្ឋាគារសូហ្វីតែលភូគីត្រា រាជធានីភ្នំពេញ ដោយមានផលិតករតារាសម្តែងក្នុងសាច់រឿងជាច្រើនដួងចូលរួម ។ ខ្សែភាពយន្តនេះជាការសម្តែងលើកដំបូងរវាងកញ្ញាព្រះកាយច័ន្ទ និងលោកភឹម តារាវិបុល ដែលពួកគេទាំងពីរមិនធ្លាប់ជួបគ្នាពីមុនទេ ។
សម្រាប់ខ្សែភាពយន្តភាគរបស់ស្ថានីយទូរទស្សន៍ប៉ុស្តិ៍លេខ៥ នេះជាប្រភេទរឿងភាគទីបីបន្ទាប់ពីរឿង«កូនក្រមុំលោកមេភូមិ» «ហង្សបាក់ស្លាប» និងរឿង «ចន្ទវង្វេងមេឃ» ដែលបើកពិធីក្រុងពលីកាលពីពេល ថ្មីៗកន្លងមក ។ ការរៀបចំផលិតខ្សែភាពយន្តភាគនេះដើម្បីតម្រូវតាមទីផ្សារកុនខ្មែរឲ្យទាន់តម្រូវការ និងដើម្បីយកមកចាក់ផ្សាយក្នុងម៉ោងពិសេស ។
កញ្ញាព្រះកាយច័ន្ទ តារាសម្តែងនិងពិធីការិនីវ័យក្មេងសម្តែងជាតួអង្គឯកឈ្មោះដួងចន្ទ ឲ្យដឹងថានេះជាលើកទី១ ដែលនាងសម្តែងជាតួឯកស្រីឱ្យទូរទស្សន៍ប៉ុស្តិ៍លេខ៥ ។ ព្រះកាយរីករាយដែលបានក្រុមផលិតករនៅទូរទស្សន៍ប៉ុស្តិ៍លេខ៥សម្រេចចិត្តជ្រើសរើសនាងជាតួឯកស្រីក្រោមការធ្វើតេស្តយ៉ាងផ្ចិតផ្ចង់មិនមែនជាការរើសដាក់តាមការនឹកឃើញទេ ។
«នេះជារឿងពិសេសមួយដែលនាងខ្ញុំបានជួបគ្នាប៉ះសម្តែងជាមួយលោកភឹម តារាវិបុល ជាលើកដំបូង ព្រោះថាមិនដឹងជាយ៉ាងម៉េចនោះទេ ពួកយើងទាំងពីរមិនធ្លាប់ជួបគ្នានៅខាងក្រៅឡើយ សូម្បីតែទៅកម្មវិធីនានាក៏មិនដែលបានជួបគ្នា ស្រាប់តែមកប៉ះគ្នាលេងកុនក្នុងរឿងដែលមានឈុតឆាកកាច់កុងគ្នាទៅវិញ ។ បើទោះជាមិនធ្លាប់ជួបគ្នា ប៉ុន្តែក្នុងនាមជាតារាសម្តែងត្រូវតែខំធ្វើឲ្យបាន ហើយរំពឹងថា នាងខ្ញុំនិងលោកភឹម តារាវិបុល ពិតជារួមសហការគ្នាធ្វើការងារនេះឲ្យបានល្អដើម្បីបម្រើអារម្មណ៍ទស្សនិកជន» ។
ចំពោះលោកភឹម តារាវិបុល ដែលមួយរយៈនេះឡើងកូដបានតំណែងតួឯកច្រើនរឿងបញ្ជាក់ថា លោកមិនដែលជួបសម្តែងជាមួយព្រះកាយចន្ទទេកន្លងមក សូម្បីតែនៅខាងក្រៅក៏មិនដែលជួបគ្នាសោះ ។ «តាមរយៈបទពិសោធន៍សម្តែងរបស់ព្រះកាយចន្ទ លោកយល់ថា ពួកយើងទាំងពីរពិតជាអាចធ្វើបាន ឆ្លងកាត់ការសម្តែងយូរឆ្នាំកន្លងមកដូចគ្នា ហើយពួកយើងនឹងរៀបចំខ្លួនឲ្យបានស្និទ្ធស្នាលគ្នាជាមុនដើម្បីសម្តែងឲ្យបានល្អ » ។
ក្នុងខ្សែរឿង«ចន្ទវង្វេងមេឃ» លោកភឹម តារាវិបុល ជាតួអង្គឈ្មោះ«រាជ» មានទ្រព្យសម្បត្តិ ទឹកចិត្តល្អ ចេះជួយអ្នកដទៃ ស្រឡាញ់យុត្តិធម៌ ។ ការសម្តែងកន្លងមករបស់លោកវិបុលធ្លាប់តែជាមួយភឹន សុដាលីស កញ្ញាបេប៊ី និងកញ្ញាមាន សូនីតា ពេលនេះជាមួយព្រះកាយចន្ទ ជាតារាស្រីល្បី ដូច្នេះលោករំពឹងថា ទស្សនិកជននឹងគាំទ្រខ្សែរឿងភាគនៅទូរទស្សន៍ប៉ុស្តិ៍លេខ៥នេះ ។
លោកភិមូ ជាអ្នកដឹកនាំរឿងនៅទូរទស្សន៍ប៉ុស្តិ៍លេខ៥ ឱ្យដឹងថា សម្រាប់រឿង«ចន្ទវង្វេងមេឃ»ដែលទស្សនិកជនខ្មែរស្គាល់ច្បាស់កាលពីប្រហែលដប់ឆ្នាំមុនគឺរឿង«ផ្កាយព្រឹក» បានទិញសិទ្ឋិពីប្រទេសថៃ យកមករៀបចំថតជាថ្មីឲ្យមានលក្ខណៈជាសាច់រឿងខ្មែរបង្ហាញពីជីវិតបច្ចុប្បន្ននេះ ។ រឿងនេះនឹងផលិតឱ្យល្អជាងមុន បើមិនល្អដូចក៏ឲ្យស្មើដែរ ។ ចំពោះតារាខ្មែរចូលរួមសម្តែងរំពឹងថាសម្តែងបានល្អព្រោះជ្រើសរើសក្នុងរយៈពេលយូរ ។ ភាពយន្តរឿង «ចន្ទវង្វេងមេេឃ» មាន៤៩ភាគ ដំណើរការថតប្រមាណ៦ទៅ៨ខែ និងត្រៀមចាក់បញ្ចាំងនៅដើមឆ្នាំក្រោយ៕
ចែករំលែកព័តមាននេះ