រាជធានីភ្នំពេញ ៖ នៅរសៀលថ្ងៃសៅរ៍ទី១២ វិច្ឆិកា ខានស្អែកនេះ ប្រដាល់អន្តរជាតិរបស់ក្រុមហ៊ុនខារ៉ាបាវ នៅតែបើកការប្រកួតរវាងកីឡាករកម្ពុជានិងបរទេសដដែលបើទោះជាព្រឹត្តិការណ៍នេះទើបតែបញ្ចប់ការប្រកួតដណ្ដើម
រាជធានីភ្នំពេញ ៖ នៅរសៀលថ្ងៃសៅរ៍ទី១២ វិច្ឆិកា ខានស្អែកនេះ ប្រដាល់អន្តរជាតិរបស់ក្រុមហ៊ុនខារ៉ាបាវ នៅតែបើកការប្រកួតរវាងកីឡាករកម្ពុជានិងបរទេសដដែលបើទោះជាព្រឹត្តិការណ៍នេះទើបតែបញ្ចប់ការប្រកួតដណ្ដើមជើងឯកអន្តរជាតិកាលពីសប្ដាហ៍មុន ។ នេះជាការប្រកួតមិត្តភាពអន្តរជាតិ ប៉ុន្តែអ្នកស្នេហាវិស័យប្រដាល់នៅតែមើលឃើញថា ជំនួបប៉ះគ្នារវាងកីឡាករ ឡៅ ចិត្ត្រា និង ផាន់ គ្រាន់ ជាមួយកីឡាករថៃនឹងធ្វើឱ្យកក្រើកមិនខុសគ្នានឹងសប្ដាហ៍ដែលមានការប្រកួតដណ្ដើមខ្សែក្រវាត់ ។
ការប្រកួតដែលនឹងធ្វើឡើងចាប់ពីម៉ោង២រសៀលខានស្អែកនេះ ក្រោមការរៀបចំរបស់ភេសជ្ជៈខារ៉ាបាវ នៅលើសង្វៀនទូរទស្សន៍អាស៊ីអាគ្នេយ៍នេះត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិកាលពីសប្ដាហ៍មុនៗនោះទេ ដោយសារតែភាពជាក់ស្ដែងគឺព្រឹត្តិការណ៍នេះធ្វើឡើងមុនការប្រកួតដណ្ដើមខ្សែក្រវាត់ដំណើរការ ។ កីឡាករកម្ពុជា២រូប គឺ ឡៅ ចិត្ត្រា និងផាន់ គ្រាន់ គឺជាគូប្រកួតស៊ីសាច់ហុតឈាមជាមួយកីឡាករថៃនៅរសៀលថ្ងៃសៅរ៍ខានស្អែកនោះ ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិខារ៉ាបាវឲ្យពួកគេប្រកួតគ្នានេះ ។ ក្នុងនោះ ភាគីកីឡាករកម្ពុជាបានទាំងសុំខ្លួនឯងសាកកណ្ដាប់ដៃគ្នា តាំងពីឮមានការផ្គូផ្គងនោះផង ។
លោក ញាណ សុធី អ្នករៀបចំកម្មវិធីប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ឱ្យឡៅ ចិត្ត្រា មកពីក្លិបកងទ័ពឆត្រយោង៩១១ ឱ្យឡើងប៉ះប្រកួតជាមួយកីឡាករថៃឈ្មោះ ផុន សាវ៉ាត់ ក្នុងនាមជាគូបើកឆាកអន្តរជាតិរបស់ព្រឹត្តិការណ៍នោះ បន្ទាប់ពីការប្រដាល់មួយនេះបានបញ្ចប់កាលពីសប្ដាហ៍មុន។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះតែម្ដង ដើម្បីកំដរសង្វៀនខារ៉ាបាវនៅពេលការប្រកួតដណ្ដើមខ្សែក្រវាត់វគ្គថ្មីមិនទាន់ចាប់ផ្ដើម។ លោកថា កីឡាករឡៅ ចិត្ត្រា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិខារ៉ាបាវដែលជាព្រឹត្តិការណ៍ចម្រុះកីឡាករខ្លាំងៗនៅក្នុងពិភពប្រដាល់តាំងពីមុនការប្រដាល់ដណ្ដើមខ្សែក្រវាត់រដូវកាលទី១មិនទាន់ចាប់ផ្ដើម ។
លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើជាថ្មី ក្នុងពេលដែលគេទើបនឹងឈ្នះកីឡាករថៃមុននោះ ។ លោកនិយាយថា៖«សម្រាប់គូនេះ កីឡាករថៃល្អ ប៉ុន្តែខ្ញុំពេញចិត្តកីឡាករឡៅ ចិត្ត្រា ដែលប្រកួតកាន់តែល្អទើបសម្រេចដាក់ឱ្យប្រកួតជាមួយនៅថ្ងៃសៅរ៍នេះទៀត!»។ លោកថា កីឡាករថៃ ផុន សាវ៉ាត់ ធ្លាប់ប្រកួត៧៤លើក ឈ្នះ៦៩លើក និងចាញ់៥លើក ក្នុងពេលកីឡាករកម្ពុជាទើបតែប្រកួតបាន៣១លើក ឈ្នះ២៥លើក ចាញ់៤លើក និងស្មើ២លើក តែលោកទុកចិត្តកីឡាករកម្ពុជាទើបដាក់ឱ្យប៉ះគ្នា ។
សម្រាប់កីឡាករ ផាន់ គ្រាន់ លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះ អ៊ួ ឡាន នៅក្នុងព្រឹត្តិការណ៍ប្រដាល់អន្តរជាតិខារ៉ាបាវ នៅរសៀលថ្ងៃសៅរ៍នោះដែរ ។ លោកថា ការប្រកួតរបស់គូនេះ នៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលកីឡាករ ផាន់ គ្រាន់ ត្រូវគេឃើញធ្លាក់ដៃជាងមុន បើធៀបនឹងមួយរយៈពេលមុន ។ លោកថា កីឡាករថៃធ្លាប់ប្រកួត៦០លើក ឈ្នះ៥០លើក និងចាញ់១០លើក រីឯកីឡាករកម្ពុជាធ្លាប់ប្រកួត៨០លើក ឈ្នះ៦៨លើក ចាញ់១៣លើក និងស្មើ១លើក ដែលបង្ហាញថា បទពិសោធន៍ប្រកួតរបស់កីឡាករកម្ពុជាច្រើនជាង ។
យ៉ាងណាក៏ដោយ កីឡាករកម្ពុជាមិនអាចមើលស្រាលសមត្ថភាពកីឡាករថៃបានទេ ដោយសារតែសមាសភាពកីឡាករថៃក៏មិនធម្មតា ។ គូនេះមានការរំពឹងខ្ពស់ថានឹងមានអ្នកជក់ចិត្តដិតអារម្មណ៍ភាគច្រើន ដោយសារតែផាន់ គ្រាន់ ក៏មិនចង់ធ្លាក់ចុះក្រេឌីត ហើយកីឡាករថៃក៏មិនចង់ចាញ់នាំឱ្យមានការរិះគន់ ។ ដោយឡែកនៅក្នុងព្រឹត្តិការណ៍ប្រដាល់នាយប់ថ្ងៃសុក្រនេះដែរ ក៏មានជំនួបប៉ះគ្នារវាងកីឡាករកម្ពុជា និងថៃដែលសុទ្ធតែជាជើងខ្លាំងនៅលើសង្វៀនទូរទស្សន៍អាស៊ីអាគ្នេយ៍ផងដែរ ៕
ចែករំលែកព័តមាននេះ