អង្គការអូតង់កាលពីថ្ងៃទី២៤ មីនា បានយល់ព្រមទទួលយកតួនាទីបញ្ជាការអនុវត្តតំបន់ហាមហោះហើរនៅប្រទេសលីប៊ី ហើយពេលនេះកំពុងពិចារណាពីការទទួលយកការគ្រប់គ្រង និងត្រួតពិនិត្យបេសកកម្មយោធា ដែលគាំទ្រដោយអង្គការសហប្រជាជាតិទៀត ។ នេះបើតាមការឱ្យដឹងពីអគ្គលេខាធិការអង្គការអូតង់ លោក Anders Fogh Rasmussen ។
លោក Rasmussen ថ្លែងក្នុងបទសម្ភាសន៍មួយថា «អ្វីដែលយើងបានសម្រេចចិត្តធ្វើនៅថ្ងៃនេះ គឺថាអង្គការអូតង់នឹងអនុវត្តព្រមទាំងពង្រឹងតំបន់ហាមហោះហើរនៅលីប៊ី ហើយអូតង់នឹងពិចារណាថា តើគួរតែទទួលយកការទទួលខុសត្រូវទាំងស្រុង ឬក៏យ៉ាងណា?» ។ លោក Ras-mussen ថ្លែងទៀតថា អង្គការអូតង់នឹងទទួលយកការត្រួតត្រាពេញលេញលើការអនុវត្តតំបន់ហាមហោះហើរនៅលីប៊ីរយៈពេល២-៣ថ្ងៃ ខាងមុខទៀតនេះ ហើយនឹងសម្រេចលើបញ្ហាទទួលខុសត្រូវពេញលេញរយៈពេលប៉ុន្មានថ្ងៃខាងមុខទៀត ។
មន្ត្រីរដ្ឋបាលអង្គការអូតង់មួយរូបនិយាយថា ឯកអគ្គរដ្ឋទូតអង្គការអូតង់បានធ្វើការ
សម្រេចចិត្តលើបញ្ហា២ កាលពីថ្ងៃទី២៤ មីនា កន្លងមក គឺទី១-យល់ព្រមទទួលយកតួនាទីបញ្ជាការសម្រាប់តំបន់ហាមហោះហើរ និងទី២-ជាការសម្រេចចិត្តផ្នែកនយោបាយទទួលយកការទទួលខុសត្រូវចំពោះការអនុវត្តដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិដែលអនុញ្ញាតឱ្យមានបេសកកម្មយោធានៅលីប៊ី។
កិច្ចព្រមព្រៀងកាលពីថ្ងៃទី២៤ មីនា សម្រេចបាននៅក្នុងសន្និសីទមួយដែលរៀបចំឡើងរវាងរដ្ឋមន្ត្រីការបរទេសអាមេរិក លោកស្រីហ៊ីឡារី គ្លីនតុន និងសមភាគីមកពីប្រទេសបារាំង អង់គ្លេស និងទួរគី ។ នេះបើតាមការឱ្យដឹងដោយមន្ត្រីរដ្ឋបាលជាន់ខ្ពស់មួយរូប ។
ក្រោយពីការប្រកាសរបស់លោក Rasmus-sen ដែលថា អង្គការអូតង់យល់ព្រមទទួលយកការបញ្ជាលើតំបន់ហាមហោះហើរនៅលីប៊ី លោកស្រីរដ្ឋមន្ត្រីការបរទេសអាមេរិក ហ៊ីលឡា រី គ្លីនតុន ថ្លែងប្រាប់អ្នកកាសែតថា អង្គការអូតង់ដែលមានប្រទេស២៨ជាសមាជិក អនុញ្ញាតឱ្យយោធាបង្កើតផែនការសម្រាប់អង្គការអូតង់ទទួលយកបេសកកម្មធំទូលាយមួយដើម្បីការពារជនស៊ីវិលនៅលីប៊ី ៕
ចែករំលែកព័តមាននេះ