រាជធានីភ្នំពេញ ៖ ក្នុងកិច្ចប្រជុំសាមញ្ញលើកទី៣០ អាណត្តិទី២ របស់ក្រុមប្រឹក្សារាជធានីភ្នំពេញ កាលពីរសៀលថ្ងៃទី០៨ វិច្ឆិកា ប្រធានក្រុមប្រឹក្សារាជធានីភ្នំពេញ លោកម៉ប់ សារិន បានណែនាំទៅមន្ត្រីជុំនាញសាធារណការរាជធានីភ្នំពេញ និងអាជ្ញាធរដែនដីពាក់ពន្ធ័ឲ្យរកវិធានការដោះស្រាយបញ្ហាកកស្ទះចរាចរណ៍ នៅលើកំណាត់ផ្លូវជាតិលេខ៤ ចាប់ពីរង្វង់មូលចោមចៅ ដល់ព្រំប្រទល់ខេត្តកណ្តាល ដែលបង្កឡើងដោយរថយន្តដឹកកម្មករ និងរថយន្តធុនធំមួយចំនួនទៀត បានឈប់ ឬចតយ៉ាងអាណាធិបតេយ្យ ។
លោកម៉ប់ សារិន បានឱ្យដឹងថា មន្ត្រីជំនាញរដ្ឋបាលរាជធានីភ្នំពេញ ត្រូវតែមានវិធានការសមស្រប ចំពោះការប្រើប្រាស់ផ្លូវមិនត្រឹមត្រូវ ជាពិសេសក្នុងឱកាសព្រះរាជពិធីបុណ្យអុំទូក ។
លោកបន្តថា ដើម្បីកាត់បន្ថយការកកស្ទះចរាចរណ៍ក្នុងរាជធានីភ្នំពេញ រដ្ឋបាលរាជធានីភ្នំពេញបានចេញសេចក្តីជូនដំណឹងស្តីពីការពង្វាងចរាចរក្នុងពិធីបុណ្យអុំទូកថ្ងៃទី១៣-១៤-១៥ វិច្ឆិកា ដោយហាមរថយន្តធុនធ្ងន់ រថយន្តដឹកទំនិញគ្រប់ប្រភេទ រថយន្តលាយបេតុង ចរាចរចេញចូលក្នុងរាជធានីភ្នំពេញ និងផ្អាកការដ្ឋានសំណង់ទាំងអស់ ក្នុងរាជធានីភ្នំពេញ ចាប់ពីថ្ងៃទី១២ ដល់ថ្ងៃទី១៦ វិច្ឆិកា ។
លោកបញ្ជាក់ថា ជាមួយគ្នានេះ រដ្ឋបាលរាជធានីភ្នំពេញ ក៏បានដាក់បម្រាមរថយន្តឈ្នួលដឹកអ្នកដំណើរ និងម៉ូតូសណ្តោងរ៉ឺម៉កធ្វើចរាចរចេញ-ចូលរាជធានីភ្នំពេញ ចាប់ពីម៉ោង១០ព្រឹក រហូតដល់ម៉ោង១០យប់ ចាប់ពីថ្ងៃទី១២ ដល់ថ្ងៃទី១៦ វិច្ឆិកា ។
ចែករំលែកព័តមាននេះ