ក្រុមហ៊ុន Facebook Inc បាននិយាយកាលពីថ្ងៃចន្ទថា ពួកគេកំពុងសាកល្បងលក្ខណៈមួយដែលអនុញ្ញាតឲ្យអ្នកចាត់ចែង Page (Admin) អាចបង្កើតការផ្សព្វផ្សាយពីការងារ និងទទួលលិខិតសុំការងារពីបេក្ខជន ។ នេះជាជំហានមួយអាចដាក់សម្ពាធដល់អាជីវកម្មស្វែងរកបុគ្គលិករបស់ក្រុមហ៊ុន LinkedIn Corp ។
អ្នកនាំពាក្យរបស់ក្រុមហ៊ុននិយាយថា៖ «តាមដែលពួកយើងសង្កេតឃើញនៅលើ Facebook មានអាជីវកម្មតូចៗជាច្រើនបានផ្សព្វផ្សាយពីការងារលើ Page របស់ខ្លួន ។ ពួកយើងកំពុងសាកល្បងសម្រាប់ Admin អាចផ្សព្វផ្សាយពីការងារ និងទទួលយកលិខិតសុំការងារពីបេក្ខជនផងដែរ » ។
គួរបញ្ជាក់ថា ប្រាក់ចំណូលរបស់ LinkedIn មួយភាគធំបានមកពីអ្នកស្វែងរកការងារ និងអ្នកស្វែងរកបុគ្គលិក ដែលបង់ប្រាក់ប្រចាំខែដើម្បីផ្សព្វផ្សាយពីប្រវតិ្តរូបការងាររបស់ខ្លួន ។
ជាមួយនឹងលក្ខណៈពិសេសថ្មីរបស់ Facebook មួយនេះ ក្រុមហ៊ុនដទៃអាចទាក់ទាញអ្នកចូលមើលជាច្រើនក្នុង Page របស់ពួកគេនៅលើ Facebook និងអនុញ្ញាតឲ្យមានការបង់ប្រាក់ទៅកាន់ Facebook ដើម្បីទទួលបានឱកាសការងារនេះមុនបេក្ខជនដទៃទៀត ។
កាលពីខែតុលា Facebook បានចាប់ដំណើរការ Marketplace ដែលអនុញ្ញាតឲ្យមានការទិញ និងលក់ទំនិញក្នុងស្រុក ។ នេះជាផ្នែកមួយបន្តធ្វើឲ្យអ្នកប្រើប្រាស់របស់ខ្លួនមានចំណាប់អារម្មណ៍ផងដែរ ៕
ចែករំលែកព័តមាននេះ