រាជធានីភ្នំពេញ ៖ លទ្ធផលប្រជុំពេញមួយរសៀលថ្ងៃទី០៨ វិច្ឆិកា ជាមួយអ្នករស់នៅអគារប៊ូឌិញ ដោយមានក្រុមហ៊ុនវិនិយោគជប៉ុនចូលរួមផងដើម្បីរកដំណោះស្រាយរួមមួយមិនទាន់ចេញផ្លែផ្កានៅឡើយទេ ។
ក្នុងកិច្ចប្រជុំធំនេះអ្នកដែលកំពុងរស់នៅអគារប៊ូឌិញស្ថិតក្នុងសង្កាត់ទន្លេបាសាក់ ខណ្ឌចំការមន ទទូចស្នើដល់លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ ក៏ដូចជារាជរដ្ឋាភិបាលសុំឱ្យក្រុមហ៊ុនជប៉ុនដែលមានបំណងអភិវឌ្ឍអគារប៊ូឌិញនោះ ធ្វើការដោះស្រាយនូវថវិកាជូនពួកគាត់ទៅតាមតម្លៃទីផ្សារបច្ចុប្បន្ន ជាថ្នូរនៃការចាកចេញពីអគារប៊ូឌិញ ហើយប្រគល់ទីតាំងដីអគារប៊ូឌិញទាំងមូលឱ្យក្រុមហ៊ុនជប៉ុនធ្វើការវិនិយោគជាលក្ខណៈឯកជនតែម្តង ។
គួរបញ្ជាក់ថាគោលការណ៍នៃការប្រជុំនេះ តំណាងក្រុមហ៊ុនជប៉ុនបានសម្តែងសុឆន្ទៈថា ក្រុមហ៊ុនមានលទ្ធភាពគ្រប់គ្រាន់ ពិសេសមានថវិកាចំនួន៨០លានដុល្លារដើម្បីធ្វើការវិនិយោគអគារប៊ូឌិញជូនប្រជាពលរដ្ឋស្នាក់នៅគឺសង់ផ្ទះប្រវាសចែកគ្នា ។
ជំហររបស់ក្រសួងរៀបចំដែនដីនគរូបនីយកម្ម និងសំណង់លោកទេសរដ្ឋមន្ត្រី ជា សុផារ៉ា ក៏បានគាំទ្រជាមួយនឹងគម្រោងរបស់ក្រុមហ៊ុនជប៉ុនហើយទទូចស្នើឱ្យបងប្អូនដែលកំពុងស្នាក់នៅធ្វើការពិចារណាគ្នាអោយបានល្អិតល្អន់ និងលើកយកមកពិភាក្សាគ្នាជាលើកទី២ នៅក្រោយថ្ងៃបុណ្យអុំទូកខាងមុខនេះ ។
មន្ត្រីរាជការ និងប្រជាពលរដ្ឋដែលរស់នៅក្នុងអគារប៊ូឌិញសរុបទាំងអស់មានចំនួនស្មើនឹង៥២៤គ្រួសារបានទទូចស្នើឱ្យលោកទេសរដ្ឋមន្ត្រី ជា សុផារ៉ា ពិសេសរាជរដ្ឋាភិបាលជាមួយក្រុមហ៊ុនជប៉ុនសុំធ្វើការដោះស្រាយជាថវិកាជូនពួកគាត់តែម្តង ជាថ្នូរនៃការចាកចេញពីអគារប៊ូឌិញ ដោយក្នុង១គ្រួសារស្មើនឹង៧ម៉ឺនដុល្លារតាមតម្លៃនៃទីផ្សារនាពេលបច្ចុប្បន្ន ដោយបងប្អូនទាំងអស់មិនត្រូវការដោះដូរជាទីលំនៅមកវិញនោះឡើយ ។
លោកទេសរដ្ឋមន្ត្រី ជា សុផារ៉ា បានមានប្រសាសន៍ជាលើកចុងក្រោយជាមួយបងប្អូនអ្នកប៊ូឌិញថា បងប្អូនប្រជាពលរដ្ឋសម្រេច យកលុយ ឬសម្រេចយកផ្ទះជាសិទ្ធិរបស់បងប្អូនប៉ុន្តែទាមទារឱ្យមានការគិតឱ្យវែងឆ្ងាយចំពោះអនាគតរបស់ខ្លួនទៅពេលខាងមុខ ៕
ចែករំលែកព័តមាននេះ