ប្រទេសមីយ៉ាន់ម៉ា ៖ គណៈប្រតិភូព្រុយណេនឹងធ្វើទស្សនកិច្ចនៅប្រទេសមីយ៉ាន់ម៉ា ដើម្បីពិភាក្សាអំពីការទិញអង្ករ និងស្រូវ ។ នេះបើតាមមន្ត្រីក្រសួងកសិកម្មបានឲ្យដឹង ខណៈដែលរដ្ឋាភិបាលបន្តស្វែងរកទីផ្សារនាំចេញថ្មី ។
គណៈប្រតិភូព្រុយណេនឹងធ្វើទស្សនកិច្ចនៅមីយ៉ាន់ម៉ាចុងខែនេះ ដើម្បីពិភាក្សាអំពីការនាំចូលអង្ករ និងស្រូវដែលមានគុណភាពខ្ពស់ និងការផលិតស្រូវកូនកាត់ ។ នេះបើតាមសេចក្តីថ្លែងការណ៍មួយពីក្រសួងកសិកម្ម បសុសត្វ និងប្រព័ន្ធធារាសាស្ត្រ កាលពីថ្ងៃទី២ វិច្ឆិកា ។
ការនាំចេញស្រូវនឹងតម្រូវឱ្យមានការផ្លាស់ប្តូរបទប្បញ្ញត្តិមីយ៉ាន់ម៉ា ដោយសារជាធម្មតា រដ្ឋាភិបាលបានដាក់កម្រិតលើការនាំចេញអង្ករ ។
រដ្ឋមន្ត្រីក្រសួងទេសចរណ៍ និងធនធានបឋមព្រុយណេ លោក Dato Ali bin Apong បានលើកឡើងពីលទ្ធភាពនៃការនាំចូលអង្ករ ជាមួយរដ្ឋមន្ត្រីក្រសួងកសិកម្មមីយ៉ាន់ម៉ា លោក Aung Thu នៅក្នុងកិច្ចប្រជុំអាស៊ាន ស្តីពីវិស័យកសិកម្ម និងព្រៃឈើនៅប្រទេសសិង្ហបុរី ដែលបានប្រារព្ធធ្វើឡើងពីថ្ងៃទី៦-៨ តុលា ។
លោក Aung Moe អគ្គនាយករងនៃក្រសួងកសិកម្មមីយ៉ាន់ម៉ា ថ្លែងថា ៖ « ព្រុយណេមិនអាចផលិតអង្ករគ្រប់គ្រាន់ទេ ដូច្នេះ ពួកគេចង់ទិញអង្ករ និងស្រូវពីប្រទេសមីយ៉ាន់ម៉ា។ បន្ទាប់ពីការចរចាជាមួយគណៈប្រតិភូ យើងនឹងចុះហត្ថលេខាលើកិច្ចព្រមព្រៀងជាផ្លូវការក្នុងការធ្វើពាណិជ្ជកម្មស្រូវអង្ករ » ។
ប្រទេសមីយ៉ាន់ម៉ាត្រូវការគោលដៅនាំចេញថ្មីសម្រាប់ការលក់ស្រូវ និងអង្ករ ខណៈតម្លៃស្រូវ និងអង្ករបានធ្លាក់ចុះនាពេលថ្មីៗនេះ បន្ទាប់ពីចិនដែលជាគោលដៅទីផ្សារអង្ករបរទេសតែមួយគត់របស់មីយ៉ាន់ម៉ា ចាប់ផ្តើមបង្ក្រាបការធ្វើពាណិជ្ជកម្មតាមព្រំដែនខុសច្បាប់ ។
លោក Ko Nay Soe ម្ចាស់រោងម៉ាស៊ីនក្នុងសង្កាត់ Pyinmana ទីក្រុងណៃពិដោ បានស្វាគមន៍ទីផ្សារថ្មី ខណៈការធ្លាក់ចុះនៃតម្លៃអង្ករកំពុងរីករាលដាល ។ ប៉ុន្តែលោកសង្ស័យថា តម្រូវការរបស់ព្រុយណេនឹងមានមិនច្រើនទេ។ លោកនិយាយថា ៖ « វាជាដំណឹងល្អសម្រាប់កសិករដែលកំពុងមានអារម្មណ៍សោកសង្រេង ដោយសារអ្នកទិញកាន់តែតិចនៅក្នុងទីផ្សារស្រូវ។ ប៉ុន្តែខ្ញុំគិតថា ប្រទេសព្រុយណេនឹងមិនទិញអង្ករឬស្រូវច្រើនទេ ។ ក្រសួងពាណិជ្ជកម្មគួរតែពិភាក្សាជាមួយបណ្តាប្រទេសផ្សេងទៀតអំពីការនាំចេញនេះ » ។
ចំនួនប្រជាជននៅប្រទេសព្រុយណេមានប្រហែល៤០ម៉ឺននាក់ ។ នេះបើតាមធនាគារពិភពលោក ។ ខេត្តយូណានរបស់ប្រទេសចិន ដែលបាននាំចូលអង្ករឆ្លងកាត់ព្រំដែនពីប្រទេសមីយ៉ាន់ម៉ា មានប្រជាជនជាង៤០លាននាក់ ។
នៅដើមខែតុលា សហលេខាធិការនៃសហព័ន្ធស្រូវអង្ករមីយ៉ាន់ម៉ា លោក Nay Lin Zin បានប្រាប់កាសែត The Myanmar Times ថា ការនាំចេញអង្កររបស់មីយ៉ាន់ម៉ាតាមច្រកព្រំដែន Muse បានធ្លាក់ចុះពី៥.០០០ទៅក្រោម១.០០០តោនក្នុង១ថ្ងៃ ។
ក្រសួងពាណិជ្ជកម្មកំពុងបន្តកូតានាំចេញជាផ្លូវការជាមួយរដ្ឋាភិបាលចិន និងព្យាយាមធានាកិច្ចព្រមព្រៀងនាំចេញជាមួយប្រទេសឥណ្ឌូណេស៊ី សហភាពអឺរ៉ុប និងហ្វ៊ីលីពីន ។ នេះបើតាមមន្ត្រីក្រសួងពាណិជ្ជកម្ម ។
រដ្ឋមន្ត្រីក្រសួងពាណិជ្ជកម្ម លោក Than Myint ថ្លែងថា ៖ « រដ្ឋាភិបាលកំពុងឆ្លើយតបជាផ្លូវការដើម្បីដោះស្រាយបញ្ហាការធ្លាក់ចុះនៃតម្លៃស្រូវ និងការពារកសិករពីការធ្លាក់ចុះនេះ » ៕
ចែករំលែកព័តមាននេះ