ខេត្តស្វាយរៀង ៖ ទីបំផុត សមត្ថកិច្ចជំនាញបានធ្វើការស៊ើបអង្កេតករណីសាកសពអណ្ដែតទឹកក្នុងទន្លេវ៉ៃគោហើយ ដោយបានស្គាល់អត្តសញ្ញាណសាកសព គឺជាជនជាតិវៀតណាមមានឈ្មោះឡេ វ៉ាន់ទ្រុង អាយុ៣៣ឆ្នាំ ភេទប្រុស មានទីលំនៅឃុំមីគ្វីតី ស្រុកឌឹកវ៉េ ខេត្តឡុងអាន ។
បើតាមសមត្ថកិច្ចបានឱ្យដឹងថា ក្រោយតាមការពិនិត្យរបស់ក្រុមការងារបច្ចេកទេស និងគ្រូពេទ្យជំនាញសន្និដ្ឋានថា ជនរងគ្រោះស្លាប់ដោយករណីឃាតកម្ម ទើបឈានដល់ស៊ើបអង្កេតស្រាវជ្រាវ ក្រោមការបញ្ជាផ្ទាល់ពីលោកឧត្តមសេនីយ៍កឹង ឃន ស្នងការនៃស្នងការដ្ឋាននគរបាលខេត្ត បានដាក់បទបញ្ជាមក រហូតគិតត្រឹមវេលាម៉ោង០៧ និង១០នាទីព្រឹកថ្ងៃទី០៧ វិច្ឆិកា បានធ្វើការ ឃាត់ខ្លួនជនសង្ស័យ២នាក់ ១-ឈ្មោះសួស ចាន់រ៉ា (ហៅងោយ) ភេទប្រុស អាយុ៣២ឆ្នាំ មានទីលំនៅភូមិចេក ឃុំសំរោង ស្រុកចន្ទ្រា និង២-ឈ្មោះឆា ក្រី ភេទប្រុស អាយុ២៩ឆ្នាំ មានទីលំនៅ ភូមិដូនទៃ ឃុំទួលស្តី ស្រុកចន្ទ្រា ។
ប្រភពដដែលបន្តទៀតថា តាមចម្លើយរបស់ជនសង្ស័យបានសារភាពថា បក្សពួករបស់គេមានគ្នា៣នាក់ បានធ្វើសកម្មភាពចាប់ ជនរងគ្រោះដាក់ក្នុងរថយន្តនៅចំណុចមុខកាស៊ីណូដាលីន ស្ថិតនៅក្នុងភូមិចេក ឃុំសំរោង ស្រុកចន្ទ្រា ខេត្តស្វាយរៀង ហើយដឹកយកមកវាយឱ្យសន្លប់រួចបោះក្នុងទឹកទន្លេវ៉ៃគោ ស្ថិតក្នុងភូមិមេភ្លើង សង្កាត់ស្វាយរៀង ក្រុងស្វាយរៀង នៅវេលាម៉ោង០១ និង១០នាទីរំលងអាធ្រាតចូលថ្ងៃទី០៣ វិច្ឆិកា ២០១៦ ពិតប្រាកដមែន ។
បច្ចុប្បន្ន ជនសង្ស័យទាំងពីរនាក់ កំពុងកសាងសំណុំរឿងបញ្ជូនមកស្នងការដ្ឋាននគបាលខេត្តចាត់ការតាមនីតិវិធីច្បាប់ និងកំពុងតាមរក ចាប់ខ្លួនជនសង្ស័យម្នាក់ទៀត ។
គួររំលឹកថា មានការភ្ញាក់ផ្អើលទាំងព្រឹកទៀតហើយ ដោយសាកសពមនុស្សប្រុសម្នាក់ បានអណ្តែតទឹកក្នុងអាងទន្លេវ៉ៃគោបង្កឱ្យភ្ញាក់ផ្អើល កាលពីវេលាម៉ោង០៨ និង៣០នាទីព្រឹកថ្ងៃទី០៤ វិច្ឆិកា ស្ថិតនៅចំណុចខាងមុខទ្វារទឹកស្ពានតាហោ ក្នុងភូមិក្បាលស្ពាន សង្កាត់ពោធិតាហោ ក្រុងស្វាយរៀង ដោយមិនស្គាល់អត្តសញ្ញាណទេ ។
បើតាមការសន្និដ្ឋានាពីសមត្ថកិច្ចនគបាលខេត្តបានឲ្យដឹងថា សាកសពជនរងគ្រោះ អាចធ្លាក់ទឹកលង់ស្លាប់ ក្នុងអំឡុងម៉ោង៨ព្រឹកថ្ងៃទី៣ វិច្ឆិកា ២០១៦ ដោយសពអណ្តែតវេលាម៉ោង០៨ និង៣០នាទីព្រឹក គឺអាចស្លាប់២៤ម៉ោង ទើបអណ្តែត ។ ហើយត្រូវបានប្រជានេសាទប្រទះឃើញពេលទៅដោះមង ក៏ប្តឹងសមត្ថកិច្ចឲ្យមកពិនិត្យមើល ក៏ប៉ុន្តែពុំមានអ្នកណាម្នាក់បានស្គាល់អត្តសញ្ញាណឡើយ។
ក្រោយពីក្រុមគ្រូពេទ្យ និងអ្នកបច្ចេកទេសស្នងការនគបាលខេត្តពិនិត្យរួចមក លទ្ធផលឃើញថា មានរបួសក្បាលពីក្រោយ ដែលសង្ស័យអាចជាអំពើឃាតកម្ម ឬក៏ធ្លាក់ទឹកហូរកួចបោក និងទ្វារទឹក បណ្តាលឲ្យរបួសក្បាលធ្ងន់ធ្ងរ សន្លប់គ្មានអ្នកបានឃើញ ក៏លង់ទឹកស្លាប់ ។
សមត្ថកិច្ចនៅពុំទាន់ហ៊ានសន្និដ្ឋានថា ជាអំពើឃាតកម្ម ឬក៏លង់ទឹកស្លាប់ទេ ។ សពមានកំពស់១ម៉ែត្រ៧៣ អាយុប្រហែលជាង៣០ឆ្នាំ សម្បុរសមានស្លៀកពាក់ខោខូវប៊យ ពណ៌ខៀវ ខ្សែក្រវ៉ាត់ទាហាន ពាក់អាវតេតតារ៉ុងដៃវែង ពណ៌ផ្កាឈូក ស្លៀកខោខ្លីពណ៌ក្រហម។
ចែករំលែកព័តមាននេះ