រាជធានីភ្នំពេញ ៖ ប្រជាជនជប៉ុនមានទម្លាប់មួយ គឺមិនបរិភោគច្រើន ហើយអាហារដែលនៅលើតុត្រូវបរិភោគកុំឱ្យសល់ ដូចនេះយូរៗទៅជប៉ុនបរិភោគមិនខ្ជះខ្ជាយ ឬមិនលើសចំណុះ ។ បើតាមក្បួនវិជ្ជសាស្ត្រ បរិភោគគ្រប់គ្រាន់នឹងតម្រូវការលូតលាស់របស់សារពាង្គកាយ ។
តាមអ្វីដែលអ្នកធ្លាប់ទៅប្រទេសជប៉ុនបានរៀបរាប់ និងបានឃើញច្បាស់នោះ រៀងរាល់ពេលញ៉ាំអាហារប្រជាជនជប៉ុនមិនចោលទេនូវបន្លែ និងសាច់ត្រី ហើយសាច់ត្រីទៀតសោតក៏សុទ្ធសឹងតែជាប្រភេទត្រីដែលផ្ដល់ប្រូតេអ៊ីន និងវីតាមីនសម្រាប់ការលូតលាស់ប្រព័ន្ធសារពាង្គកាយ ជាក់ស្ដែងប្រភេទត្រីសាល់ម៉ុន ដែលមនុស្សទូទៅស្គាល់ថា ជាប្រភេទត្រីដែលមានរសជាតិឆ្ងាញ់អាចបរិភោគបានទាំងឆៅ និងឆ្អិន ហើយនៅតាមភោជនីយដ្ឋានរបស់ជប៉ុនមិនថា នៅក្នុងប្រទេសកម្ពុជា ឬប្រទេសផ្សេងឡើយ តែងតែមានប្រភេទត្រីនេះ ដូចនេះវាអាចចាត់ទុកថា ជាអាហារសម្គាល់របស់ជនជាតិជប៉ុនផងដែរ ។
មួយវិញទៀត សម្រាប់អាហាររបស់ប្រជាជនជប៉ុន ចំពោះបាយវិញ គេមិនសូវបរិភោគច្រើនទេ ក្នុងមួយពេលម្នាក់ត្រឹម១កូនចានប៉ុណ្ណោះ ខុសប្លែកពីប្រជាជនខ្មែរ ជាក់ស្ដែងនៅតាមជនបទអ្នកទីក្រុងមួយចំនួនបរិភោគបាយច្រើនជាងសាច់ និងបន្លែ ។
អាហារជប៉ុនភាគច្រើនជាប្រភេទអាហារដែលសំបូរទៅដោយហ្វាយប៊ើ ដែលអាចសម្រួលដល់ពោះវៀនធំ និងការបន្ទោរបង់ ។ នៅក្នុងរបបអាហាររបស់ជប៉ុននេះដែរ មិនសូវជាមានសារជាតិខ្លាញ់ដែលបណ្ដាលធាត់ ឬបង្កជាបញ្ហាសម្រាប់សុខភាពនោះទេ ដូចនេះបញ្ជាក់ថា ប្រជាជនតែងតែគិតចំពោះសុខភាពខ្លួនជាប់ជានិច្ច។ ក្រៅពីរបបអាហារនេះដែរ ប្រជាជនជប៉ុននៅទីក្រុងតែងធ្វើដំណើរដោយថ្មើរជើង ឬជិះកង់ពីកន្លែងស្នាក់នៅទៅកន្លែងធ្វើការដែលនៅជិតៗ ដូចនេះវាជាការហាត់ប្រាណមួយផងដែរ ដែលជំរុញឱ្យសុខភាពរបស់ពួកគេនៅល្អរឹងមាំ ហើយបើមើលពីដំណើររបស់ប្រជាជនជប៉ុនវិញហាក់មានការប្រញ៉ាប់រហ័សរហួន ហើយបើតាមក្បួនវិជ្ជសាស្ត្រវិញក៏បានបញ្ជាក់ផងដែរថា ការដើរបានច្រើនក៏អាចជួយសុខភាពបេះដូងរបស់មនុស្សផងដែរ ។ ដូចនេះទាំងរបបអាហារ ទាំងកាយវិការ និងទម្លាប់រស់នៅរបស់ប្រជាជនជប៉ុន សុទ្ធតែមានប្រយោជន៍ដល់សុខភាព ដែលជាកត្តាគួបផ្សំមួយជំរុញឱ្យប្រជាជនជប៉ុនកាន់ច្រើនមានអាយុលើសពី១០០ឆ្នាំ។
គួរបញ្ជាក់ផងដែរ បើតាមសាស្ត្រាចារ្យ Hideo Kimura ជាសាស្ត្រាចារ្យមួយរូបនៅប្រទេសជប៉ុនបានឱ្យដឹងថា សព្វថ្ងៃនេះ ក្នុងចំណោមប្រជាជនទូទាំងប្រទេសចំនួនជាង១២៧លាននាក់ មានប្រជាជនចំនួន65.692នាក់ មានអាយុលើសពី១០០ឆ្នាំ ៕
ចែករំលែកព័តមាននេះ