ប្រទេសជប៉ុន ៖ ជប៉ុនបានព្រមានដល់នាយករដ្ឋមន្ត្រីប្រទេសអង់គ្លេស អ្នកស្រី Theresa May ថា រដ្ឋាភិបាលរបស់អ្នកស្រីត្រូវតែបង្កើតការទំនាក់ទំនងនឹង Brexit បើមិនដូច្នេះទេ នឹងប៉ះពាល់ដល់ការវិនិយោគទៅ
ប្រទេសជប៉ុន ៖ ជប៉ុនបានព្រមានដល់នាយករដ្ឋមន្ត្រីប្រទេសអង់គ្លេស អ្នកស្រី Theresa May ថា រដ្ឋាភិបាលរបស់អ្នកស្រីត្រូវតែបង្កើតការទំនាក់ទំនងនឹង Brexit បើមិនដូច្នេះទេ នឹងប៉ះពាល់ដល់ការវិនិយោគទៅកាន់ចក្រភពអង់គ្លេស ។
ទើបតែប៉ុន្មានថ្ងៃបន្ទាប់ពីអ្នកស្រី May បានចេញមុខបញ្ចុះបញ្ចូលក្រុមហ៊ុន Nissan Motor Co ដើម្បីឲ្យបន្តផលិតរថយន្តក្នុង Sunderland អគ្គរាជទូតជប៉ុនក្នុងទីក្រុងឡុងដ៍ ក៏បានទាមទារឲ្យមានការប្រជុំជាប្រចាំ ដើម្បីពិភាក្សាទៅលើយុទ្ធសាស្ត្ររបស់អង់គ្លេសក្នុងការចាកចេញពីសហភាពអឺរ៉ុប ។
លោក Koji Tsuruoka បានប្រាប់ទៅកាន់អង្គនីតិប្បញ្ញត្តិរួមមាន ប្រធានអ្នកចរចារបស់អង់គ្លេស លោក David Davis ថា ៖ «ប្រាកដណាស់ប្រទេសជប៉ុននឹងមិនចូលរួមក្នុងការចរចារវាងចក្រភពអង់គ្លេស និង EU ទេ។ ប៉ុន្តែពួកយើងគឺជាមិត្ត និងជាម្ចាស់ភាគហ៊ុនធំៗផងដែរសម្រាប់អង់គ្លេស ដោយវត្តមានផ្នែកសេដ្ឋកិច្ចរបស់ជប៉ុននៅចក្រភពអង់គ្លេស ពិតជាខ្លាំងក្លា ។ ដូច្នេះហើយវត្តមានដ៏សំខាន់នេះនឹងមានឥទ្ធិពលដល់ការសម្រេចកិច្ចចរចានោះជាមិនខាន » ។
អ្នកស្រី May ត្រូវបានដាក់សម្ពាធពីប្រទេសជប៉ុនផងដែរ តាមរយៈឯកសារ១៥ទំព័រដែលបានបង្ហាញនូវការព្រួយបារម្ភពី Brexit ដើម្បីឲ្យអ្នកស្រីផ្តល់ជំនឿទុកចិត្តដល់វិនិយោគិន ។
លោក Tsuruoka អះអាងថា ប្រទេសជប៉ុនមានចំណែកដ៏ធំក្នុងសេដ្ឋកិច្ចរបស់ចក្រភពអង់គ្លេស ដែលធ្វើឲ្យអាជីវកម្មរបស់ជនជាតិជប៉ុនទាំងនោះជាចំណុចដ៏សំខាន់ក្នុងការចរចាពី Brexit ។ លោកក៏បានសរសើរដល់ក្រុមហ៊ុន Nissan ដែលបានបង្ហាញភាពក្លាហាន ក៏ដូចជាសរសើរដល់ការសម្រេចចិត្តរបស់អ្នកស្រី May ផងដែរ ។
Haruki Hayashi ប្រធានក្នុងសភាពាណិជ្ជកម្ម និងឧស្សាហកម្មជប៉ុននៅចក្រភពអង់គ្លេស និងជាអគ្គនាយកក្នុងតំបន់អឺរ៉ុបរបស់ Mitsubishi និយាយថា ៖ « មានវិធីច្រើនជាងការផ្តល់ជំនឿទុកចិត្តឡើងវិញទៅទៀត ត្រូវបានស្នើឲ្យអនុវត្តក្នុងដំណាក់កាលនេះដើម្បីធានាថា វត្តមានការវិនិយោគរបស់ជប៉ុននៅចក្រភពអង់គ្លេសនឹងមិនបាត់បង់ទៅ ព្រោះតែមានកង្វះខាតផ្នែកប្រឹក្សាយោបល់ និងការចែករំលែកព័ត៌មាន » ។
លោកបន្ថែមថា ក្រុមហ៊ុនជប៉ុនទាំងនោះកំពុងត្រូវបានទាក់ទងដោយប្រទេសដទៃ ដែលមានគោលបំណងអញ្ជើញពួកគេឲ្យផ្លាស់ប្តូរទៅទីនោះ ។
លោក Hayashi និយាយថា ចក្រភពអង់គ្លេសត្រូវតែយល់ដឹងពីសារសំខាន់នៃសមាជិក EU របស់ពួកគេសម្រាប់ដៃគូការវិនិយោគសកលទាំងនោះ ដោយវាបានបើកផ្លូវទៅកាន់ទីផ្សាររួមរបស់ EU ក៏ដូចជាសមត្ថភាពរបស់ពលករក្នុងការចល័តដោយសេរីផងដែរ ។
លោក Davis បានឆ្លើយតបទៅលោក Tsuruoka ដោយមិនបានលើកឡើងពីការព្រមាន និងសំណើឲ្យមានកិច្ចប្រជុំរបស់លោកអគ្គរាជទូតរូបនេះឡើយ ។ ផ្ទុយមកវិញ លោកបែរជាព្យាយាមអះអាងថា ប្រទេសអង់គ្លេសនៅថ្ងៃអនាគតនឹងក្លាយជាកន្លែងទាក់ទាញសម្រាប់ការវិនិយោគពីបរទេសទៅវិញ ។ លោកនិយាយថា ៖ « ប្រទេសអង់គ្លេសនឹងក្លាយជាសញ្ញានៃការធ្វើពាណិជ្ជកម្មសេរី ។ រដ្ឋាភិបាលនេះបានយល់ដឹងរួចមកហើយថា ការផ្តល់ជំនឿទុកចិត្តដល់អាជីវកម្ម និងវិនិយោគិន គឺពិតជាសំខាន់។ លោកពិតជាចង់ឃើញទំនាក់ទំនងពាណិជ្ជកម្មដ៏ទូលំទូលាយរវាងចក្រភពអង់គ្លេស និង EU ផងដែរ » ៕
ចែករំលែកព័តមាននេះ