អតីតស្ពានឈើ វត្តព្រះពន្លា ដែលទឹកជំនន់បំផ្លាញ នឹងជំនួស ដោយស្ពានថ្ម
- បន្ទាយមានជ័យ
ខេត្តបន្ទាយមានជ័យ៖ លោក សុក ចាន់ថា ប្រធានមន្ទីរសាធារណការ និងដឹកជញ្ជូន ខេត្តបន្ទាយមានជ័យនិងលោក ហ៊ិល រ៉ាយ៉ា អភិបាលក្រុងសិរីសោភ័ណ…
ខេត្តបន្ទាយមានជ័យ៖ លោក សុក ចាន់ថា ប្រធានមន្ទីរសាធារណការ និងដឹកជញ្ជូន ខេត្តបន្ទាយមានជ័យនិងលោក ហ៊ិល រ៉ាយ៉ា អភិបាលក្រុងសិរីសោភ័ណ…
ខេត្តបន្ទាយមានជ័យ៖ លោក សុក ចាន់ថា ប្រធានមន្ទីរសាធារណការ និងដឹកជញ្ជូន ខេត្តបន្ទាយមានជ័យនិងលោក ហ៊ិល រ៉ាយ៉ា អភិបាលក្រុងសិរីសោភ័ណ បានឲ្យដឹងថា ស្ពានឈើវត្តព្រះពន្លា ដែលមានអាយុកាល ៦០ឆ្នាំហើយនោះ ស្ថិតនៅក្នុងសង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ត្រូវបំផ្លាញដោយទឹកជំនន់ បានបាក់ស្រុតចូលទៅក្នុងស្ទឹងព្រះពន្លា កាលពីព្រឹកថ្ងៃទី១៣ ខែតុលា ឆ្នាំ២០២០។ រហូតមកដល់សព្វថ្ងៃ ប្រហែលមានសង្ឃឹមថា នឹងជំនួសមកវិញ ដោយស្ពានថ្ម។
លោកបន្តថា ឯកឧត្តមឧបនាយករដ្ឋមន្ត្រី កែ គឹមយ៉ាន សមាជិកគណៈកម្មាធិការកណ្តាល ជាប្រធានក្រុមការងារគណប្សប្រជាជនកម្ពុជា ចុះមូលដ្ឋានខេត្តបន្ទាយមានជ័យ និងលោកជំទាវ ម៉ៅ ម៉ាល័យ កែ គឹមយ៉ាន នឹងស្ថាបនាស្ពាននេះ ជាស្ពានចាក់បេតុងឡើងវិញ នៅពេលឆាប់ៗនេះ។
លោក ហ៊ិល រ៉ាយ៉ា បានមានប្រសាសន៍ នៅថ្ងៃទី២៨ ខែឧសភា ឆ្នាំ២០២២ ថា លោកបានដឹកនាំក្រុមការងារចុះសិក្សាពិនិត្យវាស់វែង បោះតម្រុយ សម្រាប់គម្រោងស្ថាបនាស្ពានបេតុងព្រះពន្លា ឆ្លងស្ទឹងសិរីសោភ័ណ ដែលមានបណ្តោយប្រវែង ១២០ម៉ែត្រ ទទឹង ៨ម៉ែត្រ ដែលជាអំណោយរបស់ឯកឧត្តមឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ កែ គឹមយ៉ាន ជំនួសស្ពានឈើ ចាស់ទ្រុឌទ្រោម ដែលបានបាក់ដួលរលំខូចខាត ដោយទឹកជំនន់ កាលពីថ្ងៃទី១៣ ខែតុលា ឆ្នាំ២០២០ កន្លងមកនេះ ។
លោក សុក ចាន់ថា លើកឡើងថា លោកបានដឹកនាំក្រុមការងារ បន្ទាប់ពីមានសំណូមពរដ៏ទទូចពីព្រះសង្ឃ ពុទ្ធបរិស័ទ ប្រជាពលរដ្ឋ សិស្សានុសិស្ស និងឯកឧត្តមឧបនាយករដ្ឋមន្ត្រី កែ គឹមយ៉ាន បានចុះពិនិត្យជាក់ស្តែង និងសួរសុខទុក្ខប្រជាពលរដ្ឋនៅទីនោះ កាលពីថ្ងៃទី២៧ ខែឧសភា ឆ្នាំ២០២២ មក។
ព្រះតេជគុណ យឿន សាមឿន ព្រះគ្រូចៅអធិការ វត្តព្រះពន្លា បានមានសង្ឃដិកាថា ស្ពានឈើចាស់ទីនោះ ត្រូវបានសាងសង់ដោយព្រះសង្ឃ នៅគ.ស១៩៦២ លុះដល់ឆ្នាំ១៩៩៣ ស្ពានត្រូវបានជួសជុលកែលម្អ និងប្រក់ដំបូលស័ង្កសី ដោយសម្តេចក្រុមព្រះ នរោត្តម រណឫទ្ធិ និងសប្បុរសជន។ ប៉ុន្តែដោយស្ពាននេះ វាចាស់ទ្រុឌទ្រោមខ្លាំងពេក បានបាក់ដួលរលំខូចខាតទាំងស្រុង ដោយទឹកជំនន់ កាលពីថ្ងៃទី១៣ ខែតុលា ឆ្នាំ២០២០។ ស្ពាននេះ មានសារសំខាន់ណាស់ សម្រាប់ប្រជាពលរដ្ឋពុទ្ធបរិស័ទ ឆ្លងកាត់ មាន៖ ភូមិ ១/ភូមិព្រះពន្លា, ២/ភូមិ ព្រៃឬស្សី, ៣/ភូមិ៣, ៤/ភូមិ៤។
ព្រះគ្រូចៅអធិការវត្ត បានមានសង្ឃដិកាបន្តថា ចាប់ពីស្ពានបាក់មកព្រះអង្គ មានបំណងស្នើឲ្យមានការស្ថាបនាឡើងវិញដែរ ប៉ុន្តែដោយសារមានវិបត្តិសាកលនៃជំងឺកូវីដ.១៩ ទើបត្រូវផ្អាកវិញ និងម្យ៉ាងទៀតដោយសារមានស្ពានបេតុងមួយ ជាអំណោយរបស់សម្តេចតេជោ ហ៊ុន សែន នាយរដ្ឋមន្ត្រី ស្ថិតនៅខាងជើងនោះ ស្ពាននេះហើយ សម្រាប់ឆ្លងស្ទឹងសិរីសោភ័ណ វាមិនអាចធ្វើឲ្យកកស្ទះប្រជាជនឆ្លងកាត់ ទៅមកផង។
គួរបញ្ជាក់ថា នៅថ្ងៃទី២៧ ខែឧសភា ឆ្នាំ២០២២ នេះ បានដំណឹងថា ឯកឧត្តមឧបនាយករដ្ឋមន្ត្រី កែ គឹមយ៉ាន និងលោកជំទាវ ម៉ៅ ម៉ាល័យ បានផ្តល់អំណោយសាងសង់ជាស្ពានបេតុងថ្មី សំរាប់ជូនដល់ព្រះសង្ឃ ប្រជាពលរដ្ឋ ធ្វើដំណើរទៅមកបានស្រួល សង្ឃឹមថា ប្រជាជនរស់នៅ ៤ភូមិ ១/ភូមិព្រះពន្លា ,២/ភូមិព្រៃឬស្សី, ៣/ភូមិ៣, ៤/ភូមិ៤ ពិតជាសប្បាយចិត្ត និងប្រជាពលរដ្ឋទូទៅធ្វើដំណើរបានស្រួលផងដែរ និងដោយឡែក ពុទ្ធបរិស័ទចំណុះជើងវត្ត នឹងងាយស្រួលទៅមកធ្វើបុណ្យទាន នៅវត្តព្រះពន្លានេះ។
លោក ហ៊ឹល រ៉ាយ៉ា និងលោក សុក ចាន់ថា បានឲ្យដឹងថា តាមគម្រោងសាងសង់ស្ពានថ្មថ្មីនេះ អាចចំណាយពេលពី ២៤ ទៅ ៣០ខែ ព្រោះពេលនេះ ជារដូវវស្សា ហើយនិងទឹកជន់ឡើងផងដែរ។
ក្នុងនោះ ប្រជាពលរដ្ឋបានថ្លែងអំណរគុណដល់សម្តេចតេជោ ហ៊ុន សែន ជាប្រមុខដឹកនាំ ពិសេសលោកឧបនាយករដ្ឋមន្ត្រី កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យ និងលោកជំទាវ ម៉ៅ ម៉ាល័យ កែ គឹមយ៉ាន បានយកចិត្តទុកដាក់រួមសុខរួមទុក្ខកសាងស្ពានថ្មឡើងវិញ ជំនួសស្ពានឈើ ដែលបំផ្លាញដោយទឹកជំនន់ ដើម្បីលើកកម្ពស់ជីវភាពរបស់បងប្អូនប្រជាពលរដ្ឋ បង្កលក្ខណ:ងាយស្រួលដល់ ព្រះសង្ឃ និងពុទ្ធបរិស័ទឆ្លងទៅមកធ្វើបុណ្យទាន បានស្រួលផងដែរ៕ ណុប រក្សា
ចែករំលែកព័តមាននេះ