រាជធានីភ្នំពេញ ៖ មហោស្រពភាពយន្តជប៉ុននៅកម្ពុជាឆ្នាំ២០១៦ រៀបចំឡើងជាលើកទី២ កាលពីរាត្រីថ្ងៃទី៤ ខែវិច្ឆិកា ឆ្នាំ២០១៦ នៅរោងភាពយន្តMajor Cineplex ស្ថិតនៅផ្សារទំនើបអុីអនម៉លរាជធានីភ្នំពេញ ។
ពិធីនោះក្រោមអធិបតីភាពលោកជំទាវភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ លោកខៀវ កាញារីទ្ឋ រដ្ឋមន្ត្រីក្រសួងព័ត៌មាន ព្រមទាំងមានការចូលខ្លួនពីលោកហូរីណូអ៊ុឈិ ហ៊ីដេហ៊ីសា ឯកអគ្គរាជទូតជប៉ុនប្រចាំនៅកម្ពុជា និងទស្សនិកជនច្រើនកុះករ ។
លោកជំទាវភឿង សកុណា ថ្លែងថា អតីតកាលក៏ដូចជាបច្ចុប្បន្នវិស័យភាពយន្តត្រូវបានចាត់ទុកជាថា មានការទាក់ទងទាំងលើផ្នែកប្រវត្តិសាស្ត្រ វប្បធម៌ សង្គម និងការពិចារណាគ្រប់ជ្រង់ជ្រោយ ផ្សេងៗ ។ ក្នុងន័យនេះភាពយន្តពិតជាមានសារសំខាន់ក្នុងកាលៈទេសៈដែលជាឧបករណ៍កំដរអារម្មណ៍ផង និងសម្រាប់ពិចារណាផង ។ សម្តេចព្រះបាទនរោត្ត មសីហនុ ព្រះបរមរតនកោដ្ឋបានលះបង់ព្រះកាយពល ព្រះបញ្ញាញាណ ព្រះរាជទ្រព្យ ផលិតខ្សែភាពយន្តខ្នាតខ្លី និងខ្នាតវែងដែលមានការចាប់អារម្មណ៍ពីទស្សនិកជននៅគ្រប់មជ្ឈដ្ឋានជាតិ និងអន្តរជាតិ ។ ស្នាព្រះហស្តរបស់ព្រះអង្គនៅតែដក់ជាប់ជានិច្ចក្នុងអារម្មណ៍របស់ទស្សនិកជនកម្ពុជាគ្រប់រូប ។ ជាមួយនេះដែរការបើកសម្ពោធមហោស្រពខ្សែភាពយន្ដជប៉ុននៅកម្ពុជាឆ្នាំ២០១៦ លើកទី២នេះជាព្រឹត្តិការណ៍រំលឹកខួបអនុស្សាវរីយ៍ចំណងការទូតកម្ពុជា-ជប៉ុនដែលមានរយៈពេលដ៏វែងកន្លងមក ។ នេះក៏ជាការបង្កើតការទាក់ទងការិយាល័យមជ្ឈមណ្ឌលអាស៊ីជប៉ុននៅរាជធានីភ្នំពេញ ។
មហោស្រពភាពយន្តជប៉ុននៅឆ្នាំនេះមានខ្សែភាពយន្តចំនួន១០រឿង ដាក់បញ្ចាំងរយៈពេល៥ថ្ងៃ ។ រំពឹងថា កម្មវិធីភាពយន្តនេះនឹងផ្តល់ព័ត៌មានដល់យុវវ័យកម្ពុជា ពិចារណាលើភាពត្រឹមត្រូវរកហេតុផលល្អក្នុងការដឹកនាំជីវិតឆ្ពោះទៅរកភាពជោគជ័យ ។ សាច់រឿងបង្ហាញពីទឹកចិត្តតស៊ូអត់ធ្មត់ព្យាយាមម៉ឺងមាត់ ។
ឯកអគ្គរាជទូតជប៉ុនប្រចាំនៅកម្ពុជា លោកហូរីណូ អ៊ុឈិ ហ៊ីដេហ៊ីសា មានប្រសាសន៍ថា រយៈពេល៥ថ្ងៃនៃមហោស្រពនឹងមានភាពយន្តជប៉ុនចំនួន១០រឿងរួមមានទាំងរឿងAnime បញ្ចាំងនៅភ្នំពេញ និងសៀមរាប ។ ទស្សនិកជននឹងស្គាល់ពីប្រទេស និងប្រជាជនជប៉ុនតាមរយៈភាពយន្តទាំងនេះ ។ ក្នុងកម្មវិធីបើកមហោស្រពចាក់បញ្ចាំងខ្សែភាពយន្តមួយមានចំណងជើងថា «សណ្តែកក្រហម» ដែលដឹកនាំឡើងដោយលោកស្រីKawase Naomi ជាផលិតករល្បីឈ្មោះមួយរូបនៅប្រទេសជប៉ុន ។
អ្នកចូលរួមទស្សនាអាចឈ្នះដំណើរកម្សាន្តទៅកាន់ប្រទេសជប៉ុន និងសំបុត្រចូលរួមទស្សនាមហោស្រពអន្តរជាតិតូក្យូបូករួមទាំងថ្លៃស្នាក់នៅផង ដោយគ្រាន់តែវាយតម្លៃទៅលើខ្សែភាពយន្ត និងកម្មវិធីមហោស្រពភាពយន្តជប៉ុននៅកម្ពុជា ។ ភាពយន្តដែលសម្រិតសម្រាំងទាំងអស់រួមមានភាពយន្តគំនូរជីវចល ភាពយន្តបែបមនោសញ្ចេតនា ភាពយន្តឯកសារ ភាពយន្តបែបស៊ើបអង្កេត ហើយក្នុងនោះមានខ្សែភាពយន្តខ្លះធ្លាប់បានទទួលពានរង្វាន់ ។ ភាពយន្តទាំងនោះឆ្លុះបញ្ចាំងអំពីជីវិតរស់នៅរបស់ជនជាតិជប៉ុន និងវប្បធម៌ជប៉ុន ។ មហោស្រពនេះផ្តល់ឱកាសដល់អ្នកទស្សនាចូលរួមដោយសេរី ៕
ចែករំលែកព័តមាននេះ