ខេត្តត្បូងឃ្មុំ ៖ ទោះបីជាលោកអភិបាលខេត្តត្បូងឃ្មុំ បានធ្វើការណែនាំដល់អ្នកបើកបររថយន្តតូចធំ ដឹកខ្សាច់មិនគ្របដែលដឹកគ្រួស-ខ្សាច់កំពប់ហៀរលើផ្លូវជាតិលេខ៧ យ៉ាងណាក្តីក៏រថយន្តមួយចំនួននូវតែផ្គើនប្រព្រឹត្តនូវទង្វើខុសដដែល ហាក់បីដូចជាមិនខ្លាចបន្តិចណាសោះ ។ លោក ជា ចាន់តារា ប្រធានមន្ទីរមន្ទីររ៉ែ និងឋាមពលខេត្ត បានឲ្យដឹងនៅរសៀលថ្ងៃទី៦ វិច្ឆិកា ២០១៦នេះថា ក្រោយពីមានការណែនាំរបស់លោកអភិបាលខេត្តរួចមក រូបលោកបានដាក់កម្លាំង ចេញអនុវត្តដោយបានកំពុងតែចាប់ផ្តើមធ្វើ ចំពោះរថយន្តដែលមិនបានស្តាប់តាមការណែនាំរបស់អាជ្ញាធរខេត្ត រាល់ពេលដែលដឹកខ្សាច់ត្រូវតែគ្របឲ្យបានជិត ចៀសវាងការជ្រុះខ្សាច់រាយប៉ាយតាមផ្លូវថ្នល់នោះ ដែលកំពុងតែអនុវត្តដំបូងគេផ្តើមចេញពីស្រុកមេមត់ ។
លោក ជា ចាន់តារា ប្រធានមន្ទីររ៉ែ និងឋាមពលខេត្ត បានប្រាប់បន្តថា បន្ទាប់មកនឹងចុះបន្តទៀតតាមផែនការដែលបានគ្រោងទុកគឺ ចុះមកក្រុងសួង និងចុងក្រោយនៅឃុំទន្លេបិទ ស្រុកត្បូងឃ្មុំ ក្នុងករណីដែលបានរកឃើញថាមានរថយន្តដឹកខ្សាច់មិនបានគ្របឲ្យជិត ដឹកចេញពីដេប៉ូខ្សាច់ណាមួយនោះនឹងកន្លែងនោះ ហើយត្រូវបានបិទមិនឲ្យធ្វើអាជីវកម្ម១សប្តាហ៍។ លោកវរសេនីយ៏ឯក ឈឹម គឹមហុង ស្នងការរង នគរបាលខេត្ត ទទួលផែនសណ្តាប់ធ្នាប់ប្រាប់ឲ្យដឹងដែរថា ដោយទទួលបានការណែនាំពីលោក ប្រាជ្ញ ចន្ទ អភិបាលខេត្តត្បូងឃ្មុំ នោះមន្ត្រីនគរបាលចរាចរណ៍នៅតាមបណ្តាស្រុក ក្រុងដែលនៅជាប់នឹងផ្លូវជាតិលេខ៧ បានកំពុងតែអនុវត្តច្បាប់ចរាចរណ៍ផ្លូវគោកចំពោះរថយន្តដឹកខ្សាច់ដែលមិនបានគ្រប ក្នុងជំហានដំបូងត្រូវបានទទួលការណែនាំសិន។
តែបើកលើក្រោយនូវតែផ្គើនដឹកមិនគ្របនោះ ត្រូវតែទទួលការផាកពិន័យតាមច្បាប់ រូបលោកបានទទួលស្គាល់ការណែនាំចំពោះរថយន្តដឹកខ្សាច់ ដែលមិនគ្រប់នោះមានជាច្រើនគ្រឿង។ ហើយក្នុងពេលខាងមុខនេះនឹងមានកិច្ចសហការជាមួយនឹងមន្ទីរសាធារណៈ និងដឹកជញ្ជូនខេត្ត ដើម្បីចុះអនុវត្តយានយន្តទាំងឡាយណា ដែលកំពុងតែធ្វើចរាចរណ៍ តាមដងផ្លូវ ដោយបានកែច្នៃខុសពីបទដ្ឋានបច្ចេក ត្រូវតែកាត់ទ្រុងចេញ ដើម្បីឲ្យត្រឹមត្រូវតាមបទដ្ឋានដើម ចៀសវាងកុំឲ្យផ្លូវរងការខូចខាត៕
ចែករំលែកព័តមាននេះ