រដ្ឋមន្ត្រីក្រសួងកសិកម្ម ចេញសារាចរណែនាំស្តីពីការថែទាំស្រូវរដូវវស្សា ឆ្នាំ២០២២
រាជធានីភ្នំពេញ ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៧ ខែឧសភា…
រាជធានីភ្នំពេញ ៖ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៧ ខែឧសភា ឆ្នាំ២០២២នេះ បានចេញសារាចរ ណែនាំ ស្តីពីការថែទាំ ស្រូវរដូវវស្សា ឆ្នាំ២០២២ ។
នៅរដូវវស្សាឆ្នាំ២០២២ ដោយទឹកភ្លៀង បានចាប់ផ្ដើមធ្លាក់លឿនជាងបណ្តាឆ្នាំមុនៗ និងរាយប៉ាយស្ទើរគ្រប់តំបន់ដែលបានផ្តល់អំណោយផល ដល់ការដាំដុះដំណាំស្រូវដើមរដូវ ។
គិតត្រឹមថ្ងៃទី២៥ ខែឧសភា ឆ្នាំ២០២២នេះ កសិករសម្រេចដាំដុះដំណាំស្រូវវស្សា បានចំនួន ៥០២,៧៩៩ហិកតា ស្មើនឹង១៩,១៩% នៃផែនការ ២,៦១៩,៥០០ហិកតា ក្នុងនោះស្រូវស្រាលចំនួន ៣១៧,៦៦៣ហិកតា ស្រូវកណ្ដាលចំនួន ៩៩, ៣១១ហិកតា ស្រូវធ្ងន់ចំនួន ៧៩,០៤៥ហិកតា ស្រូវចម្ការចំនួន ៦៣៧ហិកតា និងស្រូវឡើងទឹកចំនួន ៦,១៤៣ហិកតា ។
បើប្រៀបធៀបនឹងឆ្នាំ២០២១ ក្នុងរយៈពេលដូចគ្នា ការដាំដុះដំណាំស្រូវវស្សា មានភាពយឺតជាង ព្រោះតំបន់មួយចំនួនលិចទឹក និងជោកជាំពេក មិនអាចភ្ជួររាស់កើត ។ ជាក់ស្តែង នៅក្នុងខេត្តបន្ទាយមានជ័យ និងខេត្តត្បូងឃ្មុំ បានជួបប្រទះនឹងគ្រោះជំនន់ទឹកភ្លៀងនៅដើមរដូវដែលធ្វើឱ្យប៉ះពាល់ដល់ដំណាំស្រូវប្រមាណ ៦,០១៦ហិកតា និងខូចខាតចំនួន ៣,៥១៣ហិកតា ក្នុងនោះខេត្តបន្ទាយមានជ័យមានផ្ទៃដីប៉ះពាល់ចំនួន៤,៦៦៤ហិកតានិងខូចខាតចំនួន២,៣៨០ហិកតា និងខេត្តត្បូងឃ្មុំមានផ្ទៃដីប៉ះពាល់ចំនួន១,៣៣៧ហិកតានិងផ្ទៃដីខូចខាតចំនួន១,១៣៣ហិកតា។
ក្នុងគោលបំណងធានាបាននូវសន្តិសុខស្បៀង និងឈានសម្រេចបានតាមគោលនយោបាយជំរុញផលិតកម្មស្រូវ និងការនាំចេញអង្កររបស់រាជរដ្ឋាភិបាលជាពិសេសដើម្បីឱ្យលទ្ធផល នៃការងារបង្កបង្កើនផលសម្រេចបានល្អប្រសើរទៅតាមផែនការគ្រោងទុកនោះ ក្រសួងកសិកម្ម រុក្ខាប្រមាញ់ និងនេសាទ សូមធ្វើការណែនាំដល់អង្គភាពក្រោមឱវាទក្រសួង មន្ទីរកសិកម្ម រុក្ខាប្រមាញ់ និងនេសាទ រាជធានីខេត្តទាំងអស់ និងអាជ្ញាធរមូលដ្ឋាន ត្រូវយកចិត្តទុកដាក់អនុវត្តនូវវិធានការចាំបាច់និងបន្ទាន់មួយចំនួនដូចខាងក្រោម ៖
១. ត្រូវចុះណែនាំកសិករឱ្យយកចិត្តទុកដាក់ពិនិត្យស្រែ និងត្រៀមលក្ខណៈរៀបចំដីស្រែជាពិសេស ត្រូវបិទភ្លឺ និងបូមទឹកចេញពីក្នុងស្រែ ករណីមានការលិចលង់ ដោយជំនន់ទឹកភ្លៀងដើមរដូវនេះ ។
២. ត្រូវចុះជំរុញឱ្យប្រជាកសិករចាប់ផ្ដើមដាំដុះស្រូវរដូវវស្សា ពឹងទឹកភ្លៀង នៅតំបន់ខ្ពស់ ដែលកសិករទម្លាប់ដាំដុះ ក្នុងខែកក្កដា ឬខែសីហា ឱ្យប្រញាប់ប្រញាល់ដាំដុះ ព្រោះឆ្នាំនេះ មិនមានកូនរដូវប្រាំងទេ ។
៣. ត្រូវចុះណែនាំបច្ចេកទេសថែទាំ ដំណាំស្រូវដូចជាការប្រើប្រាស់ជីបំប៉ន ថ្នាំកសិកម្ម និងការគ្រប់គ្រងសមាសភាពចង្រៃ ឱ្យបានទាន់ពេលវេលា និងមានប្រសិទ្ធភាព ។
៤. ត្រូវណែនាំកសិករឱ្យត្រៀមឧបករណ៍ សម្ភារៈ និងគ្រាប់ពូជស្រូវ សម្រាប់ដាំដុះស្តារឡើងវិញ ក្នុងករណីមានការខូចខាតដំណាំស្រូវ ដោយសារទឹកជំនន់ ហើយអង្គភាពក្រោមឱវាទក្រសួង និងមន្ទីរកសិកម្ម រុក្ខាប្រមាញ់ និងនេសាទរាជធានី ខេត្ត ត្រូវចុះពិនិត្យ និងវាយតម្លៃផលប៉ះពាល់ និងការខូចខាតដំណាំស្រូវដោយសារទឹកជំនន់ទឹកភ្លៀង ដោយសហការជាមួយស្ថាប័នពាក់ព័ន្ធ និងអាជ្ញាធរមូលដ្ឋាន សំដៅជួយអន្តរាគមន៍ ដល់កសិករក្រីក្រ និងអ្នកងាយរងគ្រោះ ដែលខ្វះលទ្ធភាពរកគ្រាប់ពូជស្រូវ ដើម្បីលើកសំណើសុំមកគណៈកម្មាធិការប្រព័ន្ធស្បៀងបម្រុងកម្ពុជា (ប.ស.ប.ក) ដូចមានចែងក្នុងអនុក្រឹត្យលេខ១២៤ អនក្រ.បក ចុះថ្ងៃទី៣០ ខែកក្កដា ឆ្នាំ២០២១ ស្តីពីការបង្កើតប្រព័ន្ធស្បៀងបម្រុងកម្ពុជា ៕
ចែករំលែកព័តមាននេះ