ខេត្តបាត់ដំបង ៖ សមត្ថកិច្ចបានរាយការណ៍ថា មានជនម្នាក់បានចូលទៅរកទិញនាឡិកាដៃ ដែលមានតម្លៃថ្លៃនៅក្នុងហាងមួយកន្លែង លុះម្ចាស់យកនាឡិកាឱ្យមើល ស្រាប់តែកាន់រត់ឡើងជិះម៉ូតូគេចខ្លួនបាត់ ដែលហេតុការណ៍នេះកើតឡើង កាលពីវេលាម៉ោង០២ និង៣០នាទីរសៀលថ្ងៃទី០៤ វិច្ឆិកា ស្ថិតនៅភូមិ២០ឧសភា ក្នុងសង្កាត់ស្វាយប៉ោ ក្រុងបាត់ដំបង ។
សេចក្ដីរាយការណ៍បន្តឱ្យដឹងថា ជនសង្ស័យបានចូលទៅបន្លំយកនាឡិកានៅក្នុងហាងលក់វែនតា និងនាឡិកា យីហោ «ហុងទ្រី
អុបទិច» ស្ថិតក្នុងភូមិ-សង្កាត់ខាងលើ ដែលសកម្មភាពជនសង្ស័យ ក៏បានថតជាប់ក្នុងកាមេរ៉ាសុវត្ថិភាពរបស់ម្ចាស់ហាងដែរ ។
បើតាមការពិនិត្យលើរូបភាពដែលជាប់ក្នុងកាមេរ៉ាសុវត្ថិភាព ជនសង្ស័យមិនពាក់មួកសុវត្ថិភាពទេ តែពាក់អាវយឺតដៃខ្លីពណ៌ខ្មៅ ជិះម៉ូតូម៉ាកហុងដាឌ្រីមសេ១២៥ ពណ៌ក្រហម ស៊េរីឆ្នាំ២០១៣ ។
ប្រភពពីសមត្ថកិច្ចបានឲ្យដឹងថា ជននេះជិះម៉ូតូមកឈប់ខាងមុខហាង រួចចុះមកសួររកទិញនាឡិកា ដែលមានតម្លៃថ្លៃ ។ លុះម្ចាស់ហាងយកនាឡិកាម៉ាក ដែលមានតម្លៃ៤០០ដុល្លារហុចឱ្យមើល ស្រាប់តែជននេះ កាន់រត់ឡើងជិះម៉ូតូគេចខ្លូនបាត់ បង្កការភ្ញាក់ផ្អើលតែម្ដង។
សមត្ថកិច្ចបានចុះទៅកាន់កន្លែងកើតហេតុភ្លាមៗដែរ ដើម្បីពិនិត្យសកម្មភាពជនសង្ស័យនៅក្នុងកាមេរ៉ាសុវត្ថិភាព តែមិនទាន់ដឹងថា សមត្ថកិច្ចកំណត់យ៉ាងណា ចំពោះមុខសញ្ញាជនសង្ស័យរូបនេះនោះទេ ។
ចែករំលែកព័តមាននេះ