រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីបានសម្រេចឲ្យមន្ត្រីជំនាញចុះសិក្សាធ្វើការឆ្វៀលដីនៅក្នុងបឹងទន្លេសាបរបស់ប្រជាពលរដ្ឋរស់នៅរយៈពេលយូរឆ្នាំទុកអាស្រ័យផល ។
សម្តេចតេជោ ហ៊ុន សែន នាយករដ្ឋមន្ត្រីបានថ្លែងសារពិសេសស្តីពីបឹងទន្លេសាបនា ព្រឹកថ្ងៃទី២៧ ខែឧសភា ឆ្នាំ២០២២ បានឲ្យមានការកែសម្រួលការបោះបង្គោលព្រំប្រទល់ដីនៅក្នុងបឹងទន្លេសាបដោយតំបន់ណាដែលប្រជាពលរដ្ឋរស់នៅយូរយ៉ាងហោច១០ឆ្នាំឡើងលើ ឬអាចតិចជាងហ្នឹងតាមប្រភេទដី ដើម្បីទុកឲ្យប្រជាពលរដ្ឋអាស្រ័យផល ។
សម្តេចតេជោ បានលើកឡើងថា ការធ្វើកែសម្រួលនេះ បើពាក់ព័ន្ធនឹងភូមិរបស់ប្រជាពលរដ្ឋត្រូវធ្វើការឆ្វៀលចេញពីតំបន់ពីរ (អាស្រ័យផល) ឬតំបន់បី (ហាមឃាត់) មានន័យថា ការឆ្វៀលនេះ គឺមានភូមិរបស់ប្រជាពលរដ្ឋដែលមានតាំងពីការកំណត់តំបន់មួយ (តំបន់ ទទួលបានកម្មសិទ្ធិ) តំបន់ពីរ (តំបន់អាស្រ័យផល) និងតំបន់បី (តំបន់ហាមឃាត់) ។
សម្តេចបញ្ជាក់ថា៖«យើងត្រូវតែឆ្វៀលចេញ ដោយផ្តល់លទ្ធភាពជូនពួកគាត់សម្រាប់ការរស់នៅទីនោះជាអចិន្ត្រៃយ៍ដែលរាប់ទាំងការអាស្រ័យផល និងការផ្តល់កម្មសិទ្ធិទៀតផង ។ ចំណុចនេះ សូមឲ្យពិចារណាពីព្រោះថា នៅតំបន់នោះមានកន្លែងត្រូវផ្តល់កម្មសិទ្ធិ និងតំបន់គ្រាន់តែអាស្រ័យផល និងតំបន់ហាមឃាត់» ។
សម្តេចក៏បានលើកឡើងជាសំណួរថា សម្រាប់ភូមិដែលរស់នៅរាប់ជំនាន់មនុស្សហើយ គឺត្រូវដោះស្រាយជាកម្មសិទ្ធិជារៀបណា? ឬត្រឹមគោលការណ៍អាស្រ័យផលនេះជាចំណុចត្រូវពិចារណា ប៉ុន្តែចំណុចសំខាន់មួយទៀត គឺទាក់ទិនជាមួយនឹងការសម្រួលនឹងតំបន់ឡើងវិញសម្រួលអនុក្រឹត្យ និងសម្រួលបង្គោលតែម្តង ។
រូបតំណាង
សម្តេចថា កាសម្រួលបង្គោលគឺប្រជាពលរដ្ឋដែលបានបង្ករបង្កើនផលយូរមកហើយត្រូវពិនិត្យចុះទៅក្នុងនោះមានអភិបាលខេត្ត អភិបាលស្រុក មេឃុំនៅកន្លែងត្រូវសិក្សា ឧទាហរណ៍ ៖ គាត់ធ្វើ៥០០ហិកតា ដោយយើងពិចារណាថា តើអាចដកបង្គោលចេញទាំង៥០០ហិកតា យើងដកបង្គោលចេញទាំង៥០០ហិកតា ឬបន្តឲ្យគាត់បន្តធ្វើទៀត ។
សម្តេចបានអះអាថា ការអ្វីដែលសម្តេចនិយាយនោះ គឺសំដៅដល់ប្រជាពលរដ្ឋដែលធ្វើការបង្កបង្កើនផលជាយូរមកហើយ មិនសំដៅចំពោះអ្នកដែលទៅទន្ទ្រានរយៈពេល២ ឬ៤ឆ្នាំនោះទេ គឺផ្ទៃទាំងនោះត្រូវដកហូត ។ ប៉ុន្តែតំបន់នៅទីនេះ ត្រូវបោះបង្គោលមកជាតំបន់ពីរដោយទុកឲ្យប្រជាពលរដ្ឋអាស្រ័យផលនៅទីនោះ ។
សម្តេចលើកឡើងថា តំបន់ពីរខ្លះដែលប្រជាពលរដ្ឋបង្កបង្កើនផលយូរហើយ ត្រូវដាក់ទៅក្នុងតំបន់មួយតែម្តង ដោយប្រគល់កម្មសិទ្ធិឲ្យប្រជាពលរដ្ឋ ។
សម្តេចថា៖«ចំណុចនេះត្រូវតែមើលឲ្យបានច្បាស់ និងថ្លឹងថ្លែងវរាងបញ្ហាផលប្រយោជន៍ដែលត្រូវការពារសម្រាប់ប្រទេសជាតិ និងផលប្រយោជន៍ដោយឡែកសម្រាប់ប្រជាពលរដ្ឋ ដើម្បីរស់រានមានបន្តទៀត ដោយមានផ្ទៃដីបង្កបង្កើនផល» ។
ជាមួយគ្នានោះដែរ សម្តេចក៏បានទទូចដល់ប្រជាពលរដ្ឋដែលបានទទួលសិទ្ធិបន្តការធ្វើទទួលផល និងប្រជាពលរដ្ឋកាត់ចេញពីតំបន់ពីរ(តំបន់ទទួលបានអាស្រ័យផល) ចូលទៅក្នុងតំបន់មួយ (តំបន់ទទួលបានកម្មសិទ្ធិ) សូមកុំឲ្យមានការទន្ទ្រានយកដីបន្តផងដែរ ។
យ៉ាងណាក្តី សម្តេចតេជោ ក៏បានលើកឡើងថា ការកែសម្រួលដកបង្គោលរហូតដល់ឲ្យផ្តល់ឲ្យមានការអាស្រ័យផល និងផ្តល់ភាពស្របច្បាប់ដល់ប្រជាពលរដ្ឋក៏ទាមទារឲ្យមានការកែសម្រួលអនុក្រឹត្យដែលឯកឧត្តមលឹម គានហោ រដ្ឋមន្ត្រីក្រសួងធនធានទឹកត្រូវធ្វើកិច្ចការនេះ ក្រោមការដឹកនាំរបស់ឯកឧត្តម ជា សុផារ៉ា ឧបកនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ៕
ចែករំលែកព័តមាននេះ