ខេត្តស្វាយរៀង ៖ ឈ្មួញលួចដេញក្របីជិត២០០ក្បាលឆ្លងដែនទៅប្រទេសវៀតណាម ដោយគ្មានរំខានដល់សមត្ថកិច្ចណាឡើយ ។ ឈ្មួញលួចដេញក្របីឆ្លងដែននេះ កើតឡើងកាលពីវេលាម៉ោង៣និង៣០នាទីរសៀលថ្ងៃទី២៤ ឧសភា ២០២២ ស្ថិតនៅចំណុចស្លាបស្តាំនៃប៉ុស្តិ៍ច្រករបៀងក្រសាំងជ្រំ ក្នុងភូមិក្រសាំងជ្រំ ឃុំគ្រួស ស្រុកស្វាយជ្រំ ។
បើតាមអ្នកស៊ីឈ្មួលដេញក្របីបានឲ្យដឹងថា ពួកគេរស់នៅក្នុងភូមិក្រសាំងជ្រំ ប្រកបរបរស៊ីឈ្នួលដេញក្របីគេរាល់ថ្ងៃ មានគ្នា៤នាក់ ក្នុងពេលដេញម្តងមានក្របីចាប់ពី១៥០ ទៅ២០០ក្បាល គឺដេញគៀងក្របីចេញពីភូមិក្រាំងលាវឃុំស្វាយធំ ស្រុកស្វាយជ្រំ កាត់តាមវាលស្រែ ឆ្ពោះមកព្រំដែនស្ថិតនៅភូមិក្រសាំងជ្រំ ឃុំគ្រួស ស្រុកស្វាយជ្រំពេលដល់ព្រំដែន គឺខាងវៀតណាមគេចាំទទួល ដូច្នេះ ពួកគេដេញក្របីឲ្យចុះព្រែកឆ្លងដែនចូលទៅប្រទេសវៀតណាមតែម្តង ។
ប្រភពបន្តថា ការបង់សេវា សមត្ថកិច្ចព្រំដែន ស្ថាបន័នគយ ឬពេទ្យសត្វដែរឬទេ ? ពួកគេនិយាយថា អត់ដឹងទេ គឺក្រុមហ៊ុនគេជាអ្នករត់ការ ហើយម្ចាស់ក្របីប្រាប់ថា ឲ្យដេញក្របីតាមវាលស្រី ធ្វើដូចជាដេញក្របីទៅឃ្វាល ។ ហើយជាទូទៅពួកគេដេញក្របីពីភូមិក្រាំងលាវមកគឺវេលាម៉ោង១២ថ្ងៃត្រង់ ឬម៉ោង១រសៀល ពេលមកដល់ព្រំដែនគឺម៉ាង៣ជាង ឬម៉ាង៤រសៀល គេឲ្យថ្លៃឈ្នួលដេញក្របីម្នាក់១០ម៉ឺនរៀល។
ទាក់ទិនករណីនេះដែរ សមត្ថកិច្ចវរការពារព្រំដែនប៉ុស្តិ៍ច្រករបៀងក្រសាំងជ្រំបាននិយាយថា អត់បានដឹងទេ ជាធម្មតាឃើញប្រជាពលរដ្ឋឃ្វាលគោក្របី នៅតាមវាលស្រែ ជិតព្រំដែនពេលល្ងាចពួកគេដេញទៅផ្ទះវិញ ជាធម្មតា ចំពោះមានឈ្មួញបន្លំដេញក្របី មកឃ្វាលតាមវាលស្រែហើយលួចដេញឆ្លងដែនទៅប្រទេសវៀតណាមនោះ គឺមិនបានដឹងទេ។
ចំពោះមន្ត្រីពេទ្យសត្វវិញបានឲ្យដឹងថា គោក្របីប្រជាពលរដ្ឋដែលរស់នៅតាមព្រំដែន គេចិញ្ចឹម ពេលគេលក់ដូរទៅប្រទេសជិតខាង គឺជាធម្មតា ការដោះដូរទំនិញ ដូចជាស្រូវ បន្លែបង្ការជាដើម មន្ត្រីជំនាញមិនអាចគ្រប់គ្រងបានទេ ហើយកន្លងមក ក៏មានប្រជាជនវៀតណាមដេញគោក្របីឆ្លងដែនមកឃ្វាលនៅប្រទេសខ្មែរយើងដែរ ដូច្នេះ ពិបាកគ្រប់គ្រង ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ