យកចង្ហាន់ទៅវត្ត ដូចយកមាសទៅដូរយកសំណ
ខេត្តកំពត ៖ ស្ត្រីម្នាក់ខណៈត្រឡប់មកពីយកចង្ហាន់ប្រគេនព្រះសង្ឃនៅវត្តព្រែកក្រឹសវិញ ស្រាប់តែជួបស្ត្រី២នាក់បានប្រើល្បិចទម្លាក់យោងដូរយកមាសអស់រលីងពីខ្លួន …
ខេត្តកំពត ៖ ស្ត្រីម្នាក់ខណៈត្រឡប់មកពីយកចង្ហាន់ប្រគេនព្រះសង្ឃនៅវត្តព្រែកក្រឹសវិញ ស្រាប់តែជួបស្ត្រី២នាក់បានប្រើល្បិចទម្លាក់យោងដូរយកមាសអស់រលីងពីខ្លួន ។ ហេតុការណ៍នេះកើតឡើងកាលពីព្រឹកថ្ងៃទី០៣ ខែវិច្ឆិកា ឆ្នាំ២០១៦ នៅភូមិព្រែកក្រឹង ឃុំព្រែកក្រឹស ស្រុកកំពង់ត្រាច ខេត្តកំពត ។
ប្រភពពីសមត្ថកិច្ចបានឲ្យដឹងថា ស្រីរងគ្រោះឈ្មោះ ម៉ាញ ប្រូយ អាយុ៥០ឆ្នាំ រស់នៅភូមិកើតហេតុ ។
ប្រភពបន្តថា នៅព្រឹកកើតហេតុ ស្ត្រីរងគ្រោះបានយកចង្ហាន់ទៅប្រគេនព្រះសង្ឃនៅវត្តព្រែកក្រឹស ខណៈធ្វើដំណើរត្រឡប់មកផ្ទះវិញស្រាប់តែស្ត្រីមិនស្គាល់អត្តសញ្ញាណ២នាក់បានដើរពីមុខដោយម្នាក់បានធ្វើជាជ្រុះថង់ក្រហម ភ្លាមៗនោះស្ត្រីម្នាក់ទៀតដែលដើរទន្ទឹមនាងក៏រើសយកមកបង្ហាញស្ត្រីរងគ្រោះ ដោយប្រាប់ថាកុំមាត់ខ្ញុំរើសបានមាស៣០តម្លឹង ឥឡូវដោះមាសនៅខ្លួនឲ្យខ្ញុំសិនមកចាំខ្ញុំចែកឲ្យច្រើន ។ ភ្លាមៗនោះស្ត្រីរងគ្រោះបានដោះខ្សែដៃមាស៥ជី និងខ្សែកមាស៥ជីទៅឲ្យស្ត្រីនោះ ហើយស្ត្រីនោះបានបោះថង់ក្រហមនោះមកឲ្យស្ត្រីរងគ្រោះ រួចប្រញាប់ប្រញាល់ជិះម៉ូតូចេញទៅបាត់ ។
សមត្ថកិច្ចបន្តថា បន្ទាប់ពីស្ត្រីសង្ស័យទាំង២នាក់ចេញទៅបាត់ ស្ត្រីរងគ្រោះបានបើកថង់ក្រហមនោះមើលឃើញសុទ្ធតែសំណ ទើបដឹងថាខ្លួនចាញ់បោកគេ ក៏រត់មកប្តឹងសមត្ថកិច្ចឲ្យជួយអន្តរាគមន៍តាមចាប់ខ្លួនស្ត្រីសង្ស័យទាំង២នាក់យកមកផ្តន្ទាទោសតាមច្បាប់ ប៉ុន្តែមិនដឹងជាយ៉ាងណាទេ ព្រោះស្ត្រីសង្ស័យទាំង២នាក់បានរត់គេចខ្លួនបាត់ទៅហើយ ។
សូមបញ្ជាក់ថា ករណីទម្លាក់យោង(ទម្លាក់សំណដូរយកមាស)នេះកើតឡើងជាហូរហែរ ប៉ុន្តែសមត្ថកិច្ចកម្រនឹងចាប់បានជនសង្ស័យឆបោកទាំងនោះណាស់ ៕
ចែករំលែកព័តមាននេះ