ចៅក្រមស៊ើបសួរ នៃសាលាដំបូងខេត្ត បានសម្រេចចេញដីកាបង្គាប់ឲ្យឃុំខ្លួនជាងផ្ទះម្នាក់ កាលពីល្ងាចថ្ងៃទី២៥ ខែឧសភា ឆ្នាំ២០២២ ក្រោយពីត្រូវសមត្ថកិច្ចឃាត់ខ្លួន ដែលជាប់សង្ស័យថា
ខេត្តបាត់ដំបង ៖ ចៅក្រមស៊ើបសួរ នៃសាលាដំបូងខេត្ត បានសម្រេចចេញដីកាបង្គាប់ឲ្យឃុំខ្លួនជាងផ្ទះម្នាក់ កាលពីល្ងាចថ្ងៃទី២៥ ខែឧសភា ឆ្នាំ២០២២ ក្រោយពីត្រូវសមត្ថកិច្ចឃាត់ខ្លួន ដែលជាប់សង្ស័យថា បានលួចយកប្រាក់ម្ចាស់ផ្ទះជាង១ម៉ឺនដុល្លារ ក្នុងអំឡុងពេលស៊ីឈ្នួលធ្វើផ្ទះឲ្យជនរងគ្រោះ (ម្ចាស់ប្រាក់)។
នាយការិយាល័យនគរបាលព្រហ្មទណ្ឌកំរិតស្រាល លោក ឈឿង គឹមសុង បានឲ្យដឹងថា ជនសង្ស័យខាងលើមានឈ្មោះ អុល ត្រឹង ភេទប្រុស អាយុ៣០ឆ្នាំ មានមុខរបរជាងផ្ទះ រស់នៅភូមិបាដាកជើង ឃុំរស្មីសង្ហា ស្រុករតនមណ្ឌល។ ជននេះត្រូវបានកម្លាំងអធិការស្រុករតនមណ្ឌល ឃាត់ខ្លួនកាលពីថ្ងៃទី២៤ ខែឧសភា ដែលជាប់សង្ស័យថា បានលួចប្រាក់ម្ចាស់ផ្ទះចំនួន១២០០០ដុល្លារ អំឡុងពេលខ្លួនទៅស្នាក់នៅធ្វើផ្ទះឲ្យម្ចាស់ប្រាក់នោះ។ ហើយនៅល្ងាចថ្ងៃទី២៥ ខែឧសភា ទើបត្រូវតុលាការសម្រេចឃុំខ្លួន ក្រោយតំណាងអយ្យការធ្វើការចោទប្រកាន់។
យោងលើព្រឹត្តិហេតុ នៃអំពើចោរកម្មនេះ គឺបានកើតឡើងកាលពីព្រឹកថ្ងៃទី១៧ ខែឧសភា ជនសង្ស័យឈ្មោះ អុល ត្រឹង ត្រូវបានសង្ស័យថា បានធ្វើសកម្មភាពលួចយកប្រាក់ចំនួន១២០០០ដុល្លារ របស់ម្ចាស់ផ្ទះឈ្មោះ ទេព ហៀង ភេទស្រី អាយុ៧៧ឆ្នាំ រស់នៅភូមិបាដាកជើង ឃុំរស្មីសង្ហា ខណៈដែលជននេះទៅស្នាក់នៅស៊ីឈ្នូលធ្វើផ្ទះឲ្យជនរងគ្រោះ។
សមត្ថកិច្ចមូលដ្ឋានក៏បាននាំខ្លួនជននេះភ្លាមៗទៅសួរនាំរឿងលួចប្រាក់នេះ ក្រោយពេលជនរងគ្រោះប្ដឹង តែជាងផ្ទះម្នាក់មិនសារភាពទេ បើទោះជាស្ត្រីម្ចាស់ផ្ទះអះអាងថា គាត់បានឃើញសកម្មភាពជាងផ្ទះម្នាក់នេះ បានលូកដៃលួចថង់ដាក់ប្រាក់គាត់ផ្ទាល់ភ្នែកក្ដី។ ប៉ុន្តែក្រោយពីមានការសង្ស័យកាន់តែខ្លាំង ហើយសមត្ថកិច្ចនាំជននេះទៅសួរនាំជាថ្មី ទើបជននេះទទួលស្គាល់ការពិត និងបានសារភាពថា ខ្លួនពិតជាបានលួចប្រាក់ជាង១ម៉ឺនដុល្លារដែលច្រកក្នុងថង់របស់ម្ចាស់ផ្ទះមែន។ ជាងផ្ទះម្នាក់នេះ បានសារភាពទៀតថា ខ្លួនបានលួចប្រាក់មួយថង់នោះពីក្នុងកន្ត្រកដាក់ស្លាម្លូររបស់ជនរងគ្រោះដែលទុកលើគ្រែ នៅពេលឃើញម្ចាស់ផ្ទះងើបដើរចេញផុតបន្តិច។
ជននេះបានបញ្ជាក់ថា ពេលលួចបាន ខ្លួនយកប្រាក់ទៅលាក់ទុកក្នុងគុម្ពឬស្សីក្រោយផ្ទះម្ចាស់ប្រាក់ ដោយមិនអាចរំដោះប្រាក់នោះចេញពីគុម្ពឬស្សីបានទេ ព្រោះត្រូវបែកការណ៍ ហើយត្រូវម្ចាស់ផ្ទះសង្ស័យតាមឃ្លាំមើលសកម្មភាពខ្លួនរហូតមក លុះដល់ថ្ងៃឃាត់ខ្លួន ទើបខ្លួនត្រូវសមត្ថកិច្ចនាំទៅយកប្រាក់នោះ។
ដោយឡែកបើតាមការបំភ្លឺពីជនរងគ្រោះឈ្មោះ ទេព ហៀង វិញ បានប្រាប់សមត្ថកិច្ចថា ប្រាក់ទាំងនោះ គឺគាត់បានមកពីការលក់ដី។ ក្រោយពីលក់ដីបានប្រាក់ គាត់បានយកប្រាក់មួយចំនួនដែលសេសសល់ពីការចែកទៅសាងសង់ផ្ទះ គ្រាន់ស្នាក់នៅក្នុងវ័យជរា។ គាត់និយាយថា ពេលសាងសង់ផ្ទះនេះ គាត់បានជួលជាងមួយក្រុមនៅក្នុងភូមិឲ្យធ្វើផ្ទះគាត់ ក្នុងនោះមានឈ្មោះ អុល ត្រឹង ដែលលួចប្រាក់គាត់នេះផង។
គាត់បានបញ្ជាក់ថា នៅព្រឹកថ្ងៃបាត់ប្រាក់នោះ គាត់បានដកថង់ដាក់ប្រាក់នោះចេញពីក្នុងអាវ រួចយកមកទុកក្នុងកន្ត្រកស្លា ហើយទុកកន្ត្រកស្លានៅលើគ្រែ។ ពេលនោះគាត់បានដកឃ្លាដើរទៅរោងខាងក្រោយបន្តិច តែពេលគាត់ងាកមកមើលកន្ត្រកដាក់ប្រាក់ ស្រាប់តែឃើញជាងឈ្មោះ អុល ត្រឹង ដើរមកក្បែរ រួចលូកដៃយកថង់ប្រាក់របស់គាត់ រួចដើរចេញបាត់។
ម្ចាស់ប្រាក់រូបនេះនិយាយថា ពេលនោះគាត់ដើរមកមើលឃើញបាត់ថង់ប្រាក់ តែគាត់មិនហ៊ានមាត់ ហើយក៏មិនបានចោទជាងចោរនោះដែរ ព្រោះគាត់គ្មានភស្ដុតាង តែគាត់បានប្ដឹងទៅសមត្ថកិច្ចឲ្យជួយអន្តរាគមន៍។
សមត្ថកិច្ចបានហៅជនសង្ស័យជាជាងម្នាក់នេះ ទៅសួរនាំច្រើនលើកច្រើនសារ តែជននេះមិនព្រមសារភាពទេ។ លុះនៅថ្ងៃទី២៤ ខែឧសភា ក្រោយពីសង្ស័យទៅលើជននេះកាន់តែខ្លាំង សមត្ថកិច្ចក៏បានសួរនាំជននេះជាថ្មី ទើបជននេះសារភាព ហើយបាននាំសមត្ថកិច្ចទៅយកថង់ប្រាក់នោះ។ ពេលនេះ សមត្ថកិច្ចបានដកហូតប្រាក់ពីជនសង្ស័យ និងបានប្រគល់ជូនជនរងគ្រោះគ្រប់ចំនួនហើយ។
លោក ឈឿង គឹមសុង បានបញ្ជាក់ដែរថា តាមពិតជនសង្ស័យបានព្យាយាមរំដោះថង់ប្រាក់នោះចេញពីគុម្ពឬស្សីដែរ តែគ្មានឱកាស ព្រោះត្រូវម្ចាស់ផ្ទះ និងកូនចៅតាមដានសកម្មភាពជននេះរហូត។ ប៉ុន្តែយ៉ាងណា ចាត់ទុកជាសំណាងម្ចាស់ផ្ទះ ដែលត្រូវសមត្ថកិច្ចប្រមូលបានប្រាក់ត្រឡប់មកវិញគ្រប់ចំនួន តែបើជនសង្ស័យលួចបានយកទៅបាត់ ប្រហែលជាគ្មានវាសនាបានឃើញស្រមោលប្រាក់ជាង១ម៉ឺនដុល្លានោះទេ៕
ចែករំលែកព័តមាននេះ