ភ្លៀងមួយមេធំ ដើមក្ងោកដ៏ធំមួយរលើងទាំងឬសដួលសង្កត់លើរថយន្ត
- ភ្នំពេញ
ភ្លៀងធ្លាក់មួយមេលាយឡំជាមួយនឹងខ្យល់កន្ត្រាក់ បានធ្វើឲ្យដើមក្ងោកដ៏ធំមួយដើម រលើងទាំងឬសដួលរលំសង្កត់ទៅលើរថយន្ត
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ភ្លៀងធ្លាក់មួយមេលាយឡំជាមួយនឹងខ្យល់កន្ត្រាក់ បានធ្វើឲ្យដើមក្ងោកដ៏ធំមួយដើម រលើងទាំងឬសដួលរលំសង្កត់ទៅលើរថយន្ត TOYOTA Vitz មួយគ្រឿង ដែលឈប់ចតស្ងៀមនៅលើចិញ្ចើមផ្លូវ បណ្តាលឱ្យរងការខូចខាតយ៉ាងដំណំតែម្តង បង្កឱ្យមានការភ្ញាក់ផ្អើលកាលពីវេលាម៉ោង៦និង៤០នាទីយប់ ថ្ងៃទី២៥ខែឧសភា ឆ្នាំ២០២២ នៅត្រង់ចំណុចខាងមុខអាហារដ្ឋាន «យ៉ាំមី» តាមបណ្តោយផ្លូវកម្ពុជាក្រោម ស្ថិតក្នុងសង្កាត់ទឹកល្អក់ទី១ ខណ្ឌទួលគោក។
តាមប្រភពព័ត៌មានពីស្ត្រីម្នាក់ដែលជាម្ចាស់រថយន្តរងគ្រោះ បានអោយដឹងថា នៅមុនពេលកើតហេតុ គាត់បានបើករថយន្តមួយគ្រឿងម៉ាក TOYOTA Vitz ពណ៌ទឹកប្រាក់ ពាក់ស្លាកលេខ ភ្នំពេញ2BK-2865 បើកទៅឈប់ចតក្បែរដើមក្ងោកដ៏ធំមួយដើមនោះ រួចក៏បានចូលទៅញ៉ាំអាហារនៅក្នុងអាហារដ្ឋានខាងលើ ។
ស្ត្រីម្ចាស់រថយន្តបន្តថា លុះបន្តិចក្រោយមក ក៏ស្រាប់តែមានមេឃបានធ្លាក់ភ្លៀងមួយមេលាយឡំជាមួយនឹងខ្យល់កន្ត្រាក់ បានបោកបក់យ៉ាងខ្លាំងធ្វើឲ្យដើមក្ងោកដ៏ធំមួយដើមនោះ ក៏បានរលើងទាំងឬសដួលរលំសង្កត់លើរថយន្តរបស់គាត់ បណ្តាលឲ្យរថយន្តរងការខូចខាតយ៉ាងដំណំតែម្តង។
ក្រោយពេលកើតហេតុ ក៏មានអាជ្ញាធរមូលដ្ឋានបានចុះមកធ្វើការអន្តរាគមន៍ និងបានកាត់លះមែកដើមក្ងោកនោះយកចេញពីលើរថយន្ត ដើម្បីឲ្យម្ចាស់រថយន្តយករថយន្តទៅជួសជុលដោយខ្លួនឯង ដោយមិនទទួលបានសំណងអ្វីទាំងអស់ ៕
ចែករំលែកព័តមាននេះ