រាជធានីភ្នំពេញ ៖ ដោយសារតែអំណាចថ្នាំញៀន បានធ្វើឱ្យបុរសម្នាក់លែងដឹងខុសត្រូវទាំងអស់ ដោយដាក់គន្លឹះទ្វារផ្ទះ ហើយប្រមូលខោអាវនិងរបស់របរដុត បណ្តាលឱ្យឆេះផ្អើលគេឯង រួច បានឡើងទៅអង្គុយលើដំបូលផ្ទះអស់រាប់ម៉ោងទៀត ហេតុការណ៍នេះកើតឡើង កាលពីវេលាម៉ោង៩ព្រឹកថ្ងៃទី០៣ វិច្ឆិកា ២០១៦ ស្ថិតនៅចំណុចភូមិអណ្តូង៤ សង្កាត់គោករកា ខណ្ឌព្រែកពៅ រាជធានីភ្នំពេញ រហូតដល់វេលារសៀលថ្ងៃដដែលនេះ ជននោះមិនទាន់ចុះពីលើដំបូលផ្ទះឡើយ ។
បុរសបែកថ្នាំដុតផ្ទះខ្លួនឯង ឈ្មោះប៉ន ស្រស់ អាយុ៣៨ឆ្នាំ ជាអ្នកលក់ចាប់ហួយ ស្នាក់នៅភូមិកន្លែងកើតហេតុខាងលើ មានប្រពន្ធនិងមានកូនប្រុស៣នាក់ ។
បើតាមបងប្រុសសាច់ថ្លៃឱ្យដឹងថា បុរសរូបនោះបានប្រើប្រាស់គ្រឿងញៀនជាច្រើនឆ្នាំមកហើយ ដោយបំផ្លិចបំផ្លាញ និងប្រើហិង្សានៅក្នុងគ្រួសារ ហើយត្រូវក្រុមគ្រួសារបញ្ជូនទៅមណ្ឌលកែប្រែចំនួន៤លើកមកហើយ។
តាមព័ត៌មានឱ្យដឹងទៀតថា នៅព្រឹកថ្ងៃកើតហេតុ ជននោះបានរករឿងវាយប្រពន្ធ ហើយត្រូវប្រពន្ធរត់គេចទៅនៅផ្ទះម្តាយ នៅសល់តែម្នាក់ឯង ក៏បានដាក់គន្លឹះទ្វារ ដោយប្រមូលខោអាវ និងរបស់របរនៅក្នុងផ្ទះដុតឆេះផ្សែងហុយទ្រលោម បង្កឱ្យមានការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ។
នៅព្រឹកនោះ នគរបាលបានហៅរថយន្តមួយគ្រឿងទៅអន្តរាគមន៍បាញ់ពន្លត់ទាន់ ពុំបណ្តាលឱ្យឆេះរាលដាលទៅលំនៅឋាននៅក្បែរនោះឡើយ ។ បន្ទាប់ពីដុតបំផ្លាញទ្រព្យសម្បត្តិជនដែលបែកថ្នាំ ក៏បានឡើងទៅអង្គុយលើដំបូលផ្ទះ ហើយត្រូវសមត្ថកិច្ចនិងក្រុមគ្រួសារលួងលោមអោយចុះ តែបុរសរូបនោះពុំស្តាប់ឡើយ ។
ចែករំលែកព័តមាននេះ