ភ្នំពេញ៖ ក្រសួងការងារ បានប្រកាសថា នៅថ្ងៃទី២៥ ខែឧសភានេះ មានអតីតបុគ្គលិកក្រុមហ៊ុន ណាហ្គា វើលដ៍ ៥នាក់ទៀត បានព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារ។ គិតមកដល់ថ្ងៃនេះ មានអតីតបុគ្គលិក សរុប ១៩២នាក់ ក្នុងចំណោម ៣៧៣នាក់ បានទទួលយកនូវប្រាក់បំណាច់បញ្ចប់កិច្ចសន្យាការងារ ដែលធ្វើឱ្យអតីតបុគ្គលិក ដែលមិនព្រមទទួលយកសំណង នៅសល់ត្រឹម ១៨១នាក់។
ក្រសួងការងារ ក៏បានប្រកាសថា ទីភ្នាក់ងារជាតិមុខរបរ និងការងារ នៃក្រសួងការងារ បានទទួលប្រវត្តិរូបសង្ខេបពីអតីតបុគ្គលិកទាំងនោះ ហើយក៏បាន និងកំពុងជួយស្វែងរកឱកាសការងារថ្មី សម្រាប់បងប្អូនអតីតបុគ្គលិកក្រុមហ៊ុនណាហ្គាវើលដ៍ ផងដែរ។
សូមរម្លឹកថា ការតវ៉ាជំទាស់នឹងការបញ្ឈប់បុគ្គលិកនៅក្រុមហ៊ុនណាហ្គាវើលដ៍ បានកើតឡើងយូរខែមកហើយ ចាប់តាំងពីខែធ្នូ ឆ្នាំ២០២១។ ការប្រមូលផ្តុំធ្វើបាតុកម្មតវ៉ាទាំងនោះ ក៏កើតអំពើហិង្សា ចាប់អតីតបុគ្គលិក និងមេដឹកនាំសហជីពក្រុមហ៊ុនណាហ្គាវើលដ៍ ដាក់ពន្ធនាគារ ហើយក៏ត្រូវបានដោះលែងមកវិញ និងបើកការចរចាច្រើនលើករួចមកហើយ តែមកដល់ពេលនេះ នៅមិនទាន់ត្រូវរ៉ូវគ្នានៅឡើយទេ៕
ចែករំលែកព័តមាននេះ