រាជធានីភ្នំពេញ ៖ នៅថ្ងៃសៅរ៍ ទី៥ តុលា ខានស្អែកនេះ ព្រឹត្តិការណ៍ប្រដាល់ដណ្ដើមជើងឯកអន្តរជាតិរបស់ខារ៉ាបាវឈានដល់ទីបញ្ចប់ហើយ ដោយកីឡាករកម្ពុជា និងថៃ២រូបនឹងឡើងប្រកួតគ្នាស្លា.ប់រស់ ដើម្បី
រាជធានីភ្នំពេញ ៖ នៅថ្ងៃសៅរ៍ ទី៥ តុលា ខានស្អែកនេះ ព្រឹត្តិការណ៍ប្រដាល់ដណ្ដើមជើងឯកអន្តរជាតិរបស់ខារ៉ាបាវឈានដល់ទីបញ្ចប់ហើយ ដោយកីឡាករកម្ពុជា និងថៃ២រូបនឹងឡើងប្រកួតគ្នាស្លាប់រស់ ដើម្បីដណ្ដើមយកកៅអីជើងឯក ។ កីឡាករ ឌុម កែវដា និងកីឡាករថៃ ផា យ៉ាក់ឡេក គឺជាបេក្ខភាពដែលនឹងមានម្នាក់ក្លាយជាម្ចាស់ជើងឯកនៅវគ្គចុងក្រោយរបស់សង្វៀនទូរទស្សន៍អាស៊ីអាគ្នេយ៍ ។
លោក ញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានអះអាងថា ការប្រដាល់ដែលមានឈ្មោះថា «ការប្រកួតដណ្ដើមជើងឯកអន្តរជាតិខារ៉ាបាវ» ឆ្លងកាត់ការប្រកួតយ៉ាងស្វិតស្វាញនាពេលកន្លងមក គេរកឃើញកីឡាករ២រូបគឺ ឌុម កែវដា មកពីក្លិបមកុដរាជសីហ៍ និងកីឡាករថៃផា យ៉ាក់ឡេក ជាអ្នកឈានឡើងទៅប្រកួតក្នុងវគ្គផ្ដាច់ព្រ័ត្រ។ លោកថា ការប្រកួតនៅរសៀលថ្ងៃសៅរ៍ខានស្អែកនេះ នឹងក្លាយជាជំនួបដ៏សំខាន់បន្ទាប់ពីជើងខ្លាំងទាំងពីរបានពុះពារប្រកួតឡើងអស់សមត្ថភាពក្នុងការយកឈ្នះកីឡាករផ្សេងទៀតទម្រាំឈានដល់វគ្គនេះ។ ជើងខ្លាំងកម្ពុជា៣នាក់ត្រូវធ្លាក់ក្រោមដៃជើងខ្លាំងរបស់ថៃ ហើយជើងខ្លាំងថៃ៣នាក់ក៏ត្រូវធ្លាក់ដោយសារកីឡាករកម្ពុជារូបនេះ ទើបជាហេតុធ្វើឱ្យកីឡាករទាំងពីរបានឈានដល់វគ្គផ្ដាច់ព្រ័ត្រទាំងមោទនភាព។ ការប្រកួតមួយនេះ មានកីឡាករពីដំបូង៨នាក់គឺកម្ពុជា៤នាក់និងថៃ៤នាក់ក្នុងប្រភេទទម្ងន់៦៣,៥គីឡូក្រាម ដោយកីឡាករទាំង៨នាក់សុទ្ធតែមានឈ្មោះបោះសំឡេងនៅក្នុងវិស័យប្រដាល់ ។
ផ្អែកតាមការប្រកួត កីឡាករឌុម កែវដា មិនទាន់ប្រាកដថាបានកាន់ពានជើងឯកនោះទេ បើទោះជាគេធ្លាប់ឈ្នះកីឡាករថៃ ផា យ៉ាក់ឡេក កាលពីវគ្គប្រកួតជុំ ក៏ជ័យជម្នះនាពេលនោះហាក់ដូចជាសំណាងច្រើនជាងឈ្នះដោយបច្ចេកទេស ។ លោកថា កីឡាករថៃរូបនេះប្រកួតឈ្នះកីឡាករកម្ពុជាគ្រប់គ្នាក្នុងពេលប្រកួតជុំ ដោយចាញ់តែកីឡាករឌុម កែវដា ម្នាក់ប៉ុណ្ណោះ ប៉ុន្តែបើយើងក្រឡេកមើលពីលទ្ធភាពនៃការយកឈ្នះគឺដូចជារឿងភ្លាត់ច្រើនជាង ។ កីឡាករឌុម កែវដា អាចនឹងត្រូវប្រើកម្លាំងខុសពីការប្រកួតក្នុងជុំ ដោយសារតែការប្រកួតនៅវគ្គផ្ដាច់ព្រ័ត្រនេះ កីឡាករ ផា យ៉ាក់ឡេក ក៏មានបំណងដណ្ដើមយកតំណែងជើងឯកដោយមិនឱ្យរបូតដូចគ្នា ។ ការប្រកួតគូនេះនឹងទាក់ទាញអារម្មណ៍អ្នកស្នេហាការប្រដាល់ ភាគច្រើន ហើយលោករំពឹងថា នឹងធ្វើឱ្យអ្នកទស្សនាជាប់ចិត្តផងដែរមុននឹងពួកគេរកឃើញចាញ់ឈ្នះនៅវគ្គចុងក្រោយ ។
កីឡាករ ឌុម កែវដា ត្រូវគេឃើញប្រឹងប្រែងយ៉ាងខ្លាំងក្នុងពេលការប្រកួតកាន់តែកៀកជិតមកដល់។ ការហ្វឹកហាត់ពង្រឹងសមត្ថភាពក៏ត្រូវធ្វើឡើងដោយការប្រឹងប្រែងផងដែរ ដោយសារតែគេមានបំណងចង់ជាប់ជើងឯកនៅក្នុងព្រឹត្តិការណ៍នេះ ។ អ្នកស្នេហាការប្រដាល់ភាគច្រើនហាក់មានជំនឿចិត្តថា កីឡាករឌុម កែវដា នឹងក្លាយជាម្ចាស់ជើងឯកខារ៉ាបាវ ដោយយោងតាមកីឡាកររូបនេះប្រកួតមិនធ្លាប់ចាញ់ទាល់តែសោះ បូករួមទាំងជាមួយកីឡាករថៃដែលឡើងប្រកួតជាមួយគេនៅវគ្គផ្ដាច់ព្រ័ត្រនេះផង ។ ម្យ៉ាងមកពីកីឡាកររូបនេះមានបច្ចេកទេសល្អ និងមានកែងមុតស្រួចនោះផង ទើបការយកឈ្នះលើកីឡាករ ផា យ៉ាក់ឡេក មិនមែនជារឿងពិបាក។ ទោះបីយ៉ាងណា គេមិនទាន់ដឹងថាកីឡាករកម្ពុជារូបនេះ នឹងមានសំណាងដូចពេលប្រកួតជុំឬយ៉ាងណានោះទេ ក្នុងពេលដែលកីឡាករថៃក៏ត្រូវគេប៉ាន់ស្មានថានឹងមិនអាចបណ្ដោយឱ្យចាញ់ងាយៗ ។ កីឡាករថៃល្អកែង និងទាត់បានរហ័សគួរឱ្យញញើតផងដែរទើបការប្រកួតចាញ់កីឡាករឌុម កែវដា លើកនេះអាចមិនងាយស្រួល ។
លោក ថៃ អ៊ូ អ្នកដឹកនាំកីឡាករថៃមកប្រកួតបានអះអាងថា ការប្រកួតលើកនេះ កីឡាករ ឌុម កែវដា មិនគិតថាកីឡាករថៃ ផា យ៉ាក់ឡេក ចាញ់ដោយស្រួលដូចការប្រកួតវិលជុំទេ ។ លោកថា កីឡាកររបស់លោកបានប្រឹងប្រែងប្រកួតល្អណាស់ ហើយបើមើលពីសមត្ថភាពរបស់គេក៏លោកជឿជាក់ណាស់ដែរ ។ ថ្វីដ្បិតតែលោកយល់ថា កីឡាករម្ខាងៗសុទ្ធតែមានចំណុចខ្លាំងរៀងខ្លួន ប៉ុន្តែលោកយល់ថា លទ្ធផលអ្នកឈ្នះនឹងត្រូវពឹងលើសំណាងមួយផ្នែកធំ ។ លោកថា ការប្រកួតប្រដាល់មិនខុសពីបាល់មូលនោះទេ ដែលមានន័យថា អ្នកភ្លាត់គឺចាញ់ ហើយអ្នកមានសំណាងនឹងកាន់ពាន ។ ប៉ុន្តែអ្នកទាំងពីរនឹងមានលទ្ធផលរួមមួយគឺនៅក្រោយការប្រកួតនឹងឈឺខ្លួនដូចគ្នា ដោយសារតែកីឡាករកម្ពុជាក៏លោកថាមិនបន្ធូរដៃ ហើយកីឡាករថៃក៏មិនលាក់បច្ចេកទេស ដែលលោកហៅថាមិនដូចការប្រកួតក្នុងជុំ ។
នៅក្នុងព្រឹត្តិការណ៍ដណ្ដើមជើងឯកនេះដែរ កីឡាករជើងខ្លាំងអ៊ុំ ចំរើន មកពីក្លិបតាឡីដំរីមានរឹទ្ធិ ក៏នឹងឡើងប្រកួតជាមួយកីឡាករថៃឈ្មោះ ឈាង ក្រៃ ក្នុងនាមជាគូមិត្តភាពផងដែរ៕
ចែករំលែកព័តមាននេះ