ខេត្តបាត់ដំបង៖ ប្រជាពលរដ្ឋម្នាក់បានដឹកគ្រាប់យុទ្ធភណ្ឌមិនទាន់ផ្ទុះ (គ្រាប់៦០មម) ចំនួនជិត២០គ្រាប់ រួមទាំងគ្រឿងផ្ទុះដទៃមួយចំនួនទៀត យកទៅប្រគល់ជូនសមត្ថកិច្ច កាលពីរសៀលថ្ងៃទី ២៥ ឧសភា នៅប៉ុស្ដិ៍រដ្ឋបាល ឃុំមុខរាណ៏ ស្រុករុក្ខគិរី ក្រោយពីគាត់ជីកដំឡូមីនៅក្នុងចម្ការប្រទះឃើញ។
នាយប៉ុស្តិ៍រដ្ឋបាលឃុំមុខរាណ៍ លោកឆែម ឆើត បានរាយការណ៍ថា គ្រាប់យុទ្ធភណ្ឌទាំងនោះ ត្រូវបានប្រជាកសិករឈ្មោះ យិល យ៉ម ភេទប្រុស អាយុ៥៩ឆ្នាំ ប្រទះឃើញកាលពីកន្លះខែមុន ពេលគាត់ទៅគាស់ដំឡូងមីនៅក្នុងចម្ការគាត់ ។ លោកបានបញ្ជាក់ថា ដោយសារផ្លូវចេញចូលទៅតំបន់នោះមានការលំបាកខ្លាំង ទើបនាំឲ្យមានភាពយឺតយ៉ាវក្នុងការផ្ដល់ព័ត៌មាន និងពិបាកដល់មន្រ្តីជំនាញក្នុងការចុះទៅពិនិត្យ ។
ប៉ុន្តែដោយសារតែគាត់មិនអាចរក្សាទុកយូរបាន ទើបនៅរសៀលថ្ងៃទី ២៥ ឧសភា គាត់ក៏សម្រេចវេចខ្ចប់ដឹកជញ្ជូនគ្រាប់យុទ្ធភ័ណ្ឌទាំងនោះមកប្រគល់ជូនបុស្ដ៏រដ្ឋបាលមុខរាណ៍តែម្ដង។ តាមការស្រង់សំដី លោក យិល យ៉ម បានប្រាប់សមត្ថកិច្ចថា ដីចំការរបស់គាត់បានដាំដំណាំដំឡូងមីជាប្រចាំ តែមិនធ្លាប់ភ្ជូរដោយត្រាត់ទ័រ ឬ គោយន្តម្ដងណាទេ ព្រោះដីនោះជាប្រភេទដីភ្នំ មានថ្មច្រើន តែគាត់ដាំដោយប្រើវិធីដោតឬដំដើមដំឡូងចូលក្នុងដី ។
គាត់និយាយថា ពេលដាំម្ដងៗ គាត់មិនធ្លាប់ប្រទះឃើញគ្រាប់កាំភ្លើងបែបនេះទេ លុះដល់ថ្ងៃទៅគាស់ដំឡូង ក៏ស្រាប់តែប្រទះឃើញកំណប់គ្រាប់នេះគរលើគ្នាតែម្ដង ធ្វើឲ្យគាត់ភ័យព្រលឹងចុងសក់។ ពេលឃើញដូច្នេះ គាត់ក៏ប្រមូលទុកមួយកន្លែងជាបណ្ដោះអាសន្ន ដើម្បីរាយការ៍ទៅ
អាជ្ញាធរ តែដោយសារផ្លូវលំបាក ទើបមានភាពយឺតយ៉ាវក្នុងការជូនដំណឹង និង ដឹកជញ្ជូនចេញ។
នៅក្នុងរបាយការណ៍សមត្ថកិច្ច គ្រាប់យុទ្ធភណ្ឌទាំងនោះមាន៖ គ្រាប់កាំភ្លើងត្បាល់ធុន៦០មម ចំនួន១៧គ្រាប់ ក្បាលគ្រាប់៦០មម (ក្បាលគីបបំបែក) ចំនួន១៨គ្រាប់ និង គីបភ្លើងចំនួន៩គ្រាប់។ លោក ឆែម ឆើត មេប៉ុស្ដ៏ឃុំមុខរាណ៏ បានប្រាប់ថា បើតាមការពិនិត្យគ្រាប់ទាំងនេះទំនងជាខូចគុណភាពខ្លះ នៅមានគុណភាពខ្លះ។ ពេលនេះ លោកបានទទូលយកមករក្សាទុកនៅក្នុងបុស្ដិ៍រដ្ឋបាល ដើម្បីរង់ចាំប្រគល់បន្តទៅអង្គភាពស៊ីម៉ាក់យកទៅកំទេចចោល ៕
ចែករំលែកព័តមាននេះ