អូស្ត្រាលីប្រាប់ចិនឱ្យទម្លាក់ចោលទណ្ឌកម្មពន្ធ បើចង់ស្តារទំនាក់ទំនងឡើងវិញ
អូស្ត្រាលី ៖ រដ្ឋមន្ត្រីសេដ្ឋកិច្ចអូស្ត្រាលី នៅថ្ងៃពុធ ទី២៥ ឧសភា នេះបានអំពាវនាវឲ្យចិនទម្លាក់ចោល
អូស្ត្រាលី ៖ រដ្ឋមន្ត្រីសេដ្ឋកិច្ចអូស្ត្រាលី នៅថ្ងៃពុធ ទី២៥ ឧសភា នេះបានអំពាវនាវឲ្យចិនទម្លាក់ចោលការដាក់ទណ្ឌកម្មពន្ធពាណិជ្ជកម្មលើអូស្ត្រាលី ប្រសិនចិនចង់ស្តារទំនាក់ទំនងវិញ។ ការអំពាវនាវរបស់អូស្ត្រាលីកើតឡើងក្រោយពេលទីក្រុងប៉េកាំងបានផ្ញើសារអបអរនាយករដ្ឋមន្ត្រីថ្មីរបស់អូស្ត្រាលី ដោយបង្ហាញសញ្ញាថាខ្លួនត្រៀមខ្លួនជាស្រេចក្នុងការធ្វើឲ្យទំនាក់ទំនងល្អប្រសើរឡើងវិញ។
ចិន ដែលជាដៃគូពាណិជ្ជកម្មដ៏ធំបំផុតរបស់អូស្ត្រាលី បានកំណត់ពន្ធ និងធ្វើឲ្យប៉ះពាល់ដល់ផលិតផលឧស្សាហ៍កម្មសំខាន់ៗរបស់អូស្ត្រាលីដូចជា ស្រា ស្រូវសាលី និងធ្យូងថ្ម ខណៈដែលទំនាក់ទំនងរវាងប្រទេសទាំងពីរធ្លាក់ចុះខ្លាំងក្នុងរយៈពេល ២ឆ្នាំចុងក្រោយនេះ។
រដ្ឋធានីកង់បេរ៉ា (Canberra) បានធ្វើឲ្យទីក្រុងប៉េកាំងខឹងសម្បារយ៉ាងខ្លាំងដោយសារតែអូស្ត្រាលីបានអំពាវនាវឲ្យមានការស៊ើបអង្កេតឯករាជ្យដើម្បីស្វែងរកប្រភពដើមនៃវីរុសកូរ៉ូណា និងធ្វើការហាមឃាត់ក្រុមហ៊ុនបច្ចេកវិទ្យាយក្សរបស់ចិន Huawei មិនឲ្យបង្កើតប្រព័ន្ធ 5G។
ហេរញ្ញិក Jim Chalmers បាននិយាយថា អូស្ត្រាលីមានអារម្មណ៍ឈឺចាប់ចំពោះការគាបសង្កត់ផ្នែកពាណិជ្ជកម្មរបស់ចិន និងបានអំពាវនាវឲ្យមានការដកទណ្ឌកម្មឲ្យបានឆាប់តាមតែអាចធ្វើបាន។
លោកបានថ្លែងប្រាប់សារព័ត៌មាន ABC ដូច្នេះថា «ពួកគេបំផ្លាញសេដ្ឋកិច្ចរបស់យើង។ ពួកគេធ្វើឲ្យជីវិតកាន់តែលំបាកសម្រាប់និយោកជិក និងកម្មករមួយចំនួននៅក្នុងប្រទេសអូស្ត្រាលី»។
សូមបញ្ជាក់ថា នាយករដ្ឋមន្ត្រីចិនលោក Li Keqiang បានផ្ញើសារលិខិតអបអរសាទរដល់នាយករដ្ឋមន្ត្រីថ្មីរបស់អូស្ត្រាលីគឺលោក Anthony Albanese នៅក្នុងសប្តាហ៍នេះ ដែលជាទំនាក់ទំនងកម្រិតខ្ពស់បំផុតរវាងទីក្រុងប៉េកាំង និងកង់បេរ៉ាក្នុងរយៈពេល ២ឆ្នាំចុងក្រោយ៕ (យោងតាមប្រភព៖ AFP)
ចែករំលែកព័តមាននេះ