រាជធានីភ្នំពេញ ៖ បន្ទាប់ពីវីដេអូឃ្លីបមួយត្រូវបានបង្ហោះក្នុងបណ្តាញសង្គមហ្វេសប៊ុកដែលមានស្ត្រីម្នាក់ បានបង្ហាញពីការពិសោធន៍លើប្រភេទទឹកបរិសុទ្ធជាច្រើនដែលកំពុងចរាចរនៅក្នុងប្រទេស ដែលមានទឹកបរិសុទ្ធខ្លះត្រូវបានអះអាងថា មានជាតិអាស៊ីតខ្ពស់ ដោយធ្វើការពិសោធន៍បែបសាមញ្ញ តាមរយៈឱសថម្យ៉ាងរួចមក បានធ្វើឲ្យមហាជនមានការខ្វល់ខ្វាយពីសុខភាពរបស់ពួកគេ ដោយសារតែទឹកសុទ្ធទាំងនោះកំពុងតែទទួលទានគ្រប់ៗគ្នា ។
ចំពោះវីដេអូឃ្លីបមួយនោះ បានបង្ហាញពីឥទ្ធិពលនៃឱសថពិសោធន៍ទឹកម្យ៉ាង ដែលគ្រាន់តែបន្តក់ទឹកចូលក្នុងទឹកសុទ្ធចាក់ក្នុងកែវទាំងអស់នោះភ្លាម ទឹកក៏បានផ្លាស់ប្តូរពណ៌ភ្លាមតែម្តង ដែលទឹកខ្លះបានប្រែជាពណ៌ខៀវ បៃតង និងលឿងជាដើម ។
កាលពីថ្ងៃទី១ វិច្ឆិកា គេហទំព័រហ្វេសប៊ុកផ្លូវការរបស់ទឹកសុទ្ធ វីតាល់ ក៏បានបង្ហោះវីដេអូមួយដែលបានបរិយាយឡើងដោយលោកជ័យ ថាវី ដែលជាសាស្ត្រាចារ្យផ្នែក
គីមីនិងជាសមាជិកនៃគណៈកម្មការស្តង់ដារកម្ពុជា បានធ្វើការបកស្រាយនូវកម្រិត PH ក្នុងទឹក ។
តាមសម្តីរបស់លោកសាស្ត្រាចារ្យរូបនោះ ក៏បានអំពាវនាវថា «កុំឲ្យបងប្អូនមានការភ្ញាក់ផ្អើល និងជ្រួលច្របល់ព្រោះថា ការយកធាតុមួយទៅចង្អុលថា ទឹកមួយនេះទឹកនោះអាចទទួលទានបាន ឬមិនបានវាជារឿងមួយដែលមិនត្រឹមត្រូវទាល់តែសោះ» ។ លោកសាស្ត្រាចារ្យ ជ័យ ថាវី ក៏បានសង្កត់ធ្ងន់ដែរថា «បើចង់ដឹងថាសារធាតុដែលយើងទទួលទាន មានជាតិអាស៊ីត ឬក៏អត់ គេត្រូវមើល PH បើ PH វាធំជាង១.២ វាមិនប៉ះពាល់ក្រពះនោះទេ» ។
មតិនានានិយាយថា ការជ្រួលច្របល់ពីទឹកសុទ្ធនេះ ការបង្ហាញត្រឹមតែក្នុងបណ្តាញហ្វេសប៊ុកមិនទាន់មានភាពទូលំទូលាយនោះ គឺជាការល្អ គប្បីមន្ត្រីជំនាញឬស្ថាប័នពាក់ព័ន្ធធ្វើជាសន្និសីទកាសែត ហើយប្រកាសផ្សព្វផ្សាយជាសាធារណៈនោះទើបល្អ ទើបមានការជឿកជាក់ពីមហាជន ។ ពិតណាស់ការបកស្រាយរបស់លោកសាស្ត្រាចារ្យ ជ័យ ថានី អាចរំងាប់ការភ័យខ្លាចបានមួយកម្រិត និងបង្ហាញថា ទឹកសុទ្ធដែលប្រើក្នុងប្រទេសគឺមានសុវត្ថិភាព ៕
ចែករំលែកព័តមាននេះ