ខេត្តកំពង់ស្ពឺ ៖ អគ្គិភ័យមួយបានឆាបឆេះកន្លែងស្តុកប្រេងម៉ាសុីន និងសម្ភារៈគ្រឿងបន្លាស់ម៉ូតូមួយកន្លែង តាំងពីកណ្តាលអធ្រាត្ររហូតដល់ភ្លឺទើបភ្លើងរលត់ ដោយអាចគ្រប់គ្រងស្ថានការណ៍បានទាំងស្រុង ។ យ៉ាងណា គេនៅមិនទាន់ដឹងពីទំហំនៃការខូចខាតនៅឡើយទេ ហើយចំពោះមូលហេតុនៃការឆេះនេះក៏ពុំទាន់ដឹងច្បាស់ផងដែរ…
ខេត្តកំពង់ស្ពឺ ៖ អគ្គិភ័យមួយបានឆាបឆេះកន្លែងស្តុកប្រេងម៉ាសុីន និងសម្ភារៈគ្រឿងបន្លាស់ម៉ូតូមួយកន្លែង តាំងពីកណ្តាលអធ្រាត្ររហូតដល់ភ្លឺទើបភ្លើងរលត់ ដោយអាចគ្រប់គ្រងស្ថានការណ៍បានទាំងស្រុង ។ យ៉ាងណា គេនៅមិនទាន់ដឹងពីទំហំនៃការខូចខាតនៅឡើយទេ ហើយចំពោះមូលហេតុនៃការឆេះនេះក៏ពុំទាន់ដឹងច្បាស់ផងដែរ ដោយអ្នកខ្លះថា អាចបណ្តាលមកពីឆ្លងចរន្តអគ្គិសនី ឯអ្នកខ្លះទៀតថា អាចបណ្តាលមកពីបញ្ហាផ្សេងៗ ។
ករណីអគ្គិភ័យនេះ កើតឡើងកាលពីវេលាម៉ោង២៣ និង៥០នាទីយប់ថ្ងៃទី២៤ ខែឧសភា ឆ្នាំ២០២២ មានម្ចាស់ផ្ទះឈ្មោះ កៅ ផេង ភេទប្រុស អាយុ៥២ឆ្នាំ ស្ថិតនៅភូមិសំណង់ សង្កាត់រការធំ ក្រុងច្បារមន ខេត្តកំពង់ស្ពឺ ។
លោកវរសេនីយ៍ត្រីធី ឆៃ មេបញ្ជាការកងរាជអាវុធហត្ថក្រុងច្បារមនបានអោយដឹងថា កម្លាំងមូលដ្ឋានកងរាជអាវុធហត្ថក្រុងច្បារមនចំនួន១០នាក់ សហការជាមួយកម្លាំងកងរាជអាវុធហត្ថខេត្តកំពង់ស្ពឺ ចំនួន១២នាក់ និងកម្លាំងនគរបាលជាច្រើនស្រុកបានចូលរួមពន្លត់អគ្គិភ័យនេះ ។ លោកធី ឆៃ បន្តថា អគ្គិភ័យឆាបឆេះផ្ទះល្វែង១ខ្នងសង់អំពីថ្មមានទំហំ៥ម៉ែត្រx១៨ម៉ែត្រ កំពស់០២ជាន់ ប្រក់ស័ង្កសី បណ្តាលអោយមានការខូចខាត ផ្ទះល្វែងមួយខ្នង សំបកកង់ម៉ូតូ គ្រឿងបន្លាស់ម៉ូតូ ប្រេងម៉ាស៊ីន និងសម្ភារះក្នុងផ្ទះមួយចំនួន។
នៅមិនទាន់ដឹងពីមូលហេតុនៅឡើយទេ (កំពុងស្រាវជ្រាវ) ករណីខាងលើនេះមិនបណ្តាលអោយគ្រោះថ្នាក់ដល់មនុស្សឡើយ។ លោកមេបញ្ជាការបានប្រាប់ទៀតថា កិច្ចប្រតិបត្តិការនេះសមត្ថកិច្ចទាំងអស់ប្រើប្រាស់រថយន្តពន្លត់អគ្គីភ័យរួមមាន៖
រថយន្តពន្លត់អគ្គីភ័យកងរាជអាវុធហត្ថខេត្ត០១គ្រឿង ប្រើប្រាស់ទឹកអស់១២ឡាន កម្លាំង២២នាក់
រថយន្តពន្លត់អគ្គីភ័យខេត្ត០១គ្រឿងប្រេីប្រាស់ទឹកអស់ ១០ឡាន កម្លាំង១០នាក់
រថយន្តពន្លត់អគ្គីភ័យក្រុងច្បារមន០១គ្រឿងប្រើប្រាស់ទឹកអស់១៥ឡានកម្លាំង២៥នាក់
រថយន្តពន្លត់អគ្គីភ័យស្រុកសំរោងទង០១គ្រឿងប្រើប្រាស់ទឹកអស់៧ឡានកម្លាំង០៥នាក់
រថយន្តពន្លត់អគ្គីភ័យស្រុកឧដុង្គ០១គ្រឿងប្រើប្រាស់ទឹកអស់០៩ឡានកម្លាំង០៥នាក់
រថយន្តពន្លត់អគ្គីភ័យស្រុកភ្នំស្រួច០១គ្រឿងប្រើប្រាស់ទឹកអស់០៦ឡានកម្លាំង០៧នាក់
រថយន្តពន្លត់អគ្គីភ័យស្រុកអង្គស្នួល០១គ្រឿងប្រើប្រាស់ទឹកអស់២ឡានកម្លាំង០៤នាក់
រថយន្តពន្លត់អគ្គីភ័យរបស់ ឧកញ្ញា ឈុន ទ្រី ០២គ្រឿងប្រើប្រាស់ទឹកអស់០៦ឡានប្រើប្រាស់កម្លាំង០៤នាក់។
សរុបបានប្រើប្រាស់រថយន្តពន្លត់អគ្គីភ័យចំនួន០៩គ្រឿង និងប្រើប្រាស់ទឹកអស់៦៧ឡាន និងកម្លាំង៨២នាក់ បានរលត់ទាំងស្រុងនៅវេលាម៉ោង០៦:៥០នាទីព្រឹក ៕
ចែករំលែកព័តមាននេះ