មានបុរសម្នាក់បានបើករថយន្តសេរីទំនើបមួយគ្រឿងមកបា.ញ់រះចំនួន៤គ្រា.ប់បង្កឱ្យភ្ញាក់ផ្អើលដល់ក្មេងៗរត់ចែកជើងគ្នា ហើយត្រូវបងប្អូនប្រជាពលរដ្ឋ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មានបុរសម្នាក់បានបើករថយន្តសេរីទំនើបមួយគ្រឿងមកបាញ់រះចំនួន៤គ្រា.ប់បង្កឱ្យភ្ញាក់ផ្អើលដល់ក្មេងៗរត់ចែកជើងគ្នា ហើយត្រូវបងប្អូនប្រជាពលរដ្ឋប្តឹងសមត្ថកិច្ចភ្លាមៗ បង្កឱ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ ថ្ងៃទី២៤ ខែឧសភា ឆ្នាំ២០២២ នៅចំណុចផ្លូវបេតុងជាប់របងសាលារៀនបឋមសិក្សាវត្ត តិត្ខបញ្ញោ ស្ថិតក្នុងភូមិតិបញ្ញោ សង្កាត់សំរោងក្រោម ខណ្ឌពោធិ៍សែនជ័យ ។
តាមប្រភពព័ត៌មានពីក្មេងៗ និងបងប្អូនប្រជាពលរដ្ឋនៅកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញរថយន្ដសេរីទំនើបម៉ាក FORD RAPTOR ពណ៌ខ្មៅ មិនចាំស្លាកលេខ បានធ្វើដំណើរតាមបណ្ដោយផ្លូវបេតុង ជាប់របងសាលារៀនបឋមសិក្សាវត្តតិត្ខបញ្ញោ លុះមកដល់ចំណុចកន្លែងស្ងាត់ ក៏ស្រាប់តែមានបុរសម្នាក់ចុះពីលើរថយន្ត រួចដកកាំភ្លើងខ្លីមិនចាំម៉ាកបាញ់រះចំនួន៤គ្រាប់ រួចក៏ឡើងលើរថយន្តបើកគេចខ្លួនបាត់ បណ្តាលឲ្យក្មេងតូចៗចំនួន៤នាក់ដែលជិះកង់លេងនៅជិតកន្លែងកើតហេតុនោះ ភ័យខ្លាចជិះកង់រត់ទៅប្រាប់ប្រជាពលរដ្ឋនៅជិតកន្លែងកើតហេតុ ដើម្បីប្តឹងទៅសមត្ថកិច្ច និងអាជ្ញាធរចុះមកកន្លែងកើតហេតុភ្លាមៗផងដែរ។
ប្រភពព័ត៌មានពីកន្លែងកើតហេតុបានបន្តទៀតថា ខណៈកម្លាំងសមត្ថកិច្ចនគរបាលប៉ុស្តិ៍មកដល់ ក៏បានរកឃើញសំបកកាទុសចំនួន៤គ្រាប់នៅនឹងកន្លែងកើតហេតុ ហើយក៏បានទាក់ទងទៅសមត្ថកិច្ចនគរបាលជំនាញខណ្ឌពោធិ៍សែនជ័យ ភ្លាមៗផងដែរ ។
ដោយឡែកប្រភពពីប្រជាការពារភូមិ ក៏បានបញ្ជាក់ប្រាប់ដែរថា រថយន្តជនសង្ស័យខាងលើ ម៉ាក FORD RAPTOR ពណ៌ខ្មៅ បានបាញ់នៅចំណុចកន្លែងកើតហេតុខាងលើចំនួន៤គ្រាប់ ហើយបានធ្វើដំណើរចេញពីកន្លែងកើតហេតុ ទៅបាញ់បន្តទៀតនៅម្តុំវត្តត្រពាំងឈូក ចំនួន២គ្រាប់ទៀត ទើបរថយន្តនោះរត់គេចខ្លួនបាត់ ។
ក្រោយពេលកើតហេតុ កម្លាំងនគរបាលប៉ុស្តិ៍បានរើសសំបកកាំភ្លើងទុក ដើម្បីស្រាវជ្រាវ និងតាមចាប់ជនសង្ស័យខាងលើ យកមកផ្តល់ផ្តន្ទាទោសតាមច្បាប់ ៕
ចែករំលែកព័តមាននេះ