ខេត្តឧត្តរមានជ័យ៖ គ្រាប់យុទ្ធភ័ណ្ឌ និងកាកសំណល់ ដែលកប់ក្នុងដី មិនទាន់ផ្ទុះ សេសសល់កាលពីសម័យសង្គ្រាមជាច្រើនគ្រាប់ ត្រូវបានមជ្ឈមណ្ឌលជាតិបោសសំអាតមីន រកឃើញ និងរៀបចំពិធីកម្ទេចចោល កាលពីព្រឹកថ្ងៃទី២៣ ខែឧសភា ឆ្នាំ២០២២ នៅជើងភ្នំដងរែក ស្ថិតក្នុងភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ពិធីកម្ទេចគ្រាប់យុទ្ធភណ្ឌ និងកាកសំណល់មិនទាន់ផ្ទុះនេះ បានធ្វើឡើង ក្រោមអធិបតីភាពឯកឧត្តម នាយឧត្តមសេនីយ៍ គន់ គីម ទេសរដ្ឋមន្រ្តី ទទួលបន្ទុកបេសកម្មពិសេស និងជាប្រធានអនុគណៈកម្មការ ឯកឧត្តមសេនីយ៍ឯក ផល សាម៉ន សមាជិកអនុគណៈកម្មការបោសសំអាតមីន និងយុទ្ធភ័ណ្ឌមិនទាន់ផ្ទុះ ដោយមានការចូលរួមពីឯកឧត្តម ប៉ែន កុសល្យ អភិបាលខេត្តឧត្តរមានជ័យ លោកមេបញ្ជាការ លោកមេបញ្ជារង នាយទាហាន ពលទាហានទាំង ៣ប្រភេទ ជាច្រើនរូបទៀតផងដែរ។
លោកឧត្តមសេនីយ៍ឯក ផល សាម៉ន អគ្គនាយករង មជ្ឈមណ្ឌលជាតិរក្សាសន្តិភាព ទទួលបន្ទុកបោសសំអាតមីនយុទ្ធភ័ណ្ឌមិនទាន់ផ្ទុះ បានមានប្រសាសន៍រាយការណ៍ជូនគណៈអធិបតីថា ស្តូបអនុស្សាវរីយ៍វិមានឈ្នះឈ្នះ ត្រូវបានរៀបចំពិធីបញ្ចុះបឋមសិលា កាលពីថ្ងៃទី៩ ខែមីនា ឆ្នាំ២០២២ កន្លងទៅ។ ក្រុមការងារ បានស្រាវជ្រាវ រុករកគ្រាប់មិនទាន់ផ្ទុះ នៅបរិវេណតំបន់នេះ ដើម្បីធានាសុវត្តិភាពដល់ក្រុមការងារសាងសង់ស្តូបអនុស្សាវរីយ៍នយោបាយឈ្នះឈ្នះ នៅស្រុកអន្លង់វែង ដែលមានទំហំផ្ទៃដី ១៥៩ហិកតា និងហេដ្ឋារចនាសម្ព័ន្ធផ្លូវជុំវិញ ប្រវែង ២០គីឡូម៉ែត្រផងដែរ។
លោកបានបន្តថា ក្រុមការងារជំនាញបោសសំអាតមីន និងសំណល់ជាតិផ្ទុះ ដែលសេសសល់ពីសម័យសង្គ្រាម បានបើកប្រតិបត្តិការលើផ្ទៃដីសរុបចំនួន ១.៦៨០.៩០០ម៉ែត្រការ៉េ នៅការដ្ឋាននេះ ដោយបានរកឃើញគ្រាប់មីនថ្មើរជើង ចំនួន ៨៩គ្រាប់ គ្រាប់យុទ្ធភ័ណ្ឌមិនទាន់ផ្ទុះ ចំនួន ៧គ្រាប់ អំបែងចំនួន ១០.២២៦ បំណែក ជម្រូងដែកចំនួន ១០៨គីឡូក្រាម។ គ្រាប់ទាំងនេះ ត្រូវបានរៀបចំពិធីកម្ទេចចោល។
ក្រោយពីបានសំណេះសំណាល និងបានស្តាប់នូវរបាយការណ៍រួច លោកនាយឧត្តមសេនីយ៍ គន់ គីម ទេសរដ្ឋមន្រ្តីទទួលបន្ទុកបេសកកម្មពិសេស និងជាប្រធានអនុគណៈកម្មការ បានមានប្រសាសន៍ កោតសរសើរកងកំលាំងបោសសំអាតមីន និងយុទ្ធភ័ណ្ឌមិនទាន់ផ្ទុះ ដែលបានយកចិត្តទុកដាក់ខិតខំប្រឹងប្រែងអស់រយៈពេលកន្លងមក និងបន្តការងារនេះ ឱ្យកាន់តែមានប្រសិទ្ធភាពបន្តទៀត៕ ឱម សារឿន
ចែករំលែកព័តមាននេះ