រាជធានីភ្នំពេញ ៖ សម្រាប់ការបោះឆ្នោតឃុំសង្កាត់អាណត្តិទី៥នេះក្រសួងការងារ និងបណ្ដុះបណ្ដាលវិជ្ជាជីវៈបានឲ្យដឹងថា រាល់ការឈប់សម្រាករបស់កម្មករនិយោជិតក្នុងឱកាសបោះឆ្នោតជ្រើសរើសក្រុមប្រឹក្សាឃុំ-សង្កាត់ ពេលត្រឡប់មកវិញមិនតម្រូវឲ្យបង្ហាញឯកសារពាក់ព័ន្ធផ្សេងៗ ដល់ថៅកែរោងចក្រ ឬសហគ្រាសនោះឡើយ ។
យោងតាមសេចក្ដីជូនដំណឹងរបស់ឯកឧត្តមអ៊ិតសំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈចេញផ្សាយ នៅថ្ងៃទី២៤ ខែឧសភានេះបានបញ្ជាក់ថា ដើម្បីបង្កលក្ខណៈងាយស្រួលដល់កម្មករនិយោជិតក្នុងការចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ ដែលនឹងប្រព្រឹត្តទៅនៅថ្ងៃអាទិត្យ ទី៥ ខែមិថុនា ឆ្នាំ២០២២ ម្ចាស់ ឬនាយករោងចក្រ សហគ្រាសត្រូវអនុវត្តឲ្យកម្មករនិយោជិតបានឈប់សម្រាក ១ថ្ងៃមុនថ្ងៃបោះឆ្នោត និង១ថ្ងៃ ក្រោយថ្ងៃបោះឆ្នោត ដោយរក្សាប្រាក់ឈ្នូល និងអត្ថប្រយោជន៍ផ្សេងៗ ។
ឯកឧត្តមរដ្ឋមន្ត្រីក្រសួងការងារបានបញ្ជាក់ថា«រាល់ការឈប់សម្រាកដូចមានកំណត់ខាងលើ កម្មករនិយោជិតពុំតម្រូវឲ្យបង្ហាញឯកសារពាក់ព័ន្ធផ្សេងៗ នៅពេលត្រឡប់មកវិញឡើយ» ។
លោករដ្ឋមន្ត្រីក៏បានលើកឡើងថា ចំពោះកម្មករនិយោជិត ដែលអវត្តមានហួសពីច្បាប់អនុញ្ញាតដូចមានកំណត់ខាងលើត្រូវអនុវត្តតាមបទបញ្ជាផ្ទៃក្នុងរបស់រោងចក្រ សហគ្រាស និងបទប្បញ្ញត្តិជាធរមាន ។
ដោយឡែក និយោជកត្រូវខិតខំបើកប្រាក់ឈ្នួលជូនកម្មករនិយោជិត ឲ្យបានមុនថ្ងៃទៅបោះឆ្នោត ។ បើពុំមានលទ្ធភាពបើកប្រាក់ឈ្នួលទាន់ពេលទេ សូមអនុញ្ញាតឲ្យកម្មករនិយោជិតខ្ចីប្រាក់ឈ្នួលមួយភាគ (បុរេប្រទាន) ជាមុនសិន ។
សូមបញ្ជាក់ថា រាជរដ្ឋាភិបាលកម្ពុជាបានសម្រេចយល់ព្រមឲ្យកម្មករនិយោគជិតឈប់សម្រាក១ថ្ងៃមុនថ្ងៃបោះឆ្នោត និង១ថ្ងៃក្រោយថ្ងៃបោះឆ្នោត ដើម្បីទៅបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ដែលធ្វើឡើងនៅថ្ងៃទី៥ ខែមិថុនា ឆ្នាំ២០២២ ដោយរក្សាប្រាក់ឈ្នួល និងអត្ថប្រយោជន៍ផ្សេងៗ ៕
ចែករំលែកព័តមាននេះ