រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសម្នាក់ជាប្ដីបានជិះម៉ូតូឌុបប្រពន្ធនិងកូនតូចទៅលេងប្អូនស្រីដែលជិតគ្រប់ខែឆ្លងទន្លេ ហើយខណៈពេលកំពុងតែឆ្លងផ្លូវនោះ ស្រាប់តែត្រូវបានរថយន្តកុងតឺន័របើកក្នុងល្បឿនយ៉ាងលឿនមកបុកពីក្រោយ ធ្វើឱ្យធ្លាក់ប្រពន្ធ និងកិនស្លា.ប់ភ្លាមៗនៅនឹងកន្លែងកើតហេតុតែម្តង ចំណែកប្ដីនិងកូនតូចវិញ រងរបួសស្រាល បង្កឱ្យមានការភ្ញាក់ផ្អើលកាលពីវេលាម៉ោង៦និង៤០នាទីយប់ ថ្ងៃទី២៣ ខែឧសភា ឆ្នាំ២០២២ នៅតាមបណ្ដោយផ្លូវជាតិលេខ៤ ស្ថិតក្នុងភូមិព្រៃបឹង សង្កាត់កន្ទោក ខណ្ឌកំបូល ។
សេចក្តីរាយការណ៍បន្តថា ស.ពជនរងគ្រោះខាងលើមានឈ្មោះ ជុំ ស្រីណាត ភេទស្រី អាយុ២៧ឆ្នាំ មុខរបរកម្មកររោងចក្រ ស្នាក់នៅផ្ទះជួលផ្សារអូដឹម ក្នុងសង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅភូមិស្វាយក្រោម ឃុំស្វាយខ្សាច់ភ្នំ ស្រុកស្រីសន្ធរ ខេត្តកំពង់ចាម។ ចំណែកប្ដីឈ្មោះ គង់ វិសាល អាយុ២៨ឆ្នាំ មុខរបរជាងជួសជុលរថយន្ត ស្នាក់នៅជាមួយគ្នា មានស្រុកកំណើតនៅភូមិក្របែក ឃុំស្វាយជ្រុំ ស្រុកស្វាយជ្រុំ ខេត្តស្វាយរៀង និងមានកូនស្រីតូចអាយុតែបានពីរជាង២ខួបតែប៉ុណ្ណោះ។
បើតាមប្រភពព័ត៌មានបានបញ្ជាក់អោយដឹងថា មុនពេលកើតហេតុ ជនរងគ្រោះបានជិះម៉ូតូម៉ាកហុងដាឌ្រីម ស៊េរី២០០៥ ពណ៌ខ្មៅ ពាក់ស្លាកលេខ ភ្នំពេញ1C-4037 បើកបរឌុបប្រពន្ធនិងកូនតូចរបស់គាត់ចេញពីផ្ទះជួលនៅផ្សារអូដឹម តាមបណ្ដោយផ្លូវជាតិលេខ៤ ទិសដៅពីកើតទៅលិច ក្នុងគោលបំណងទៅសួរសុខទុក្ខប្អូនស្រីដែលជិតគ្រប់ខែសម្រាលកូននៅឯសង្កាត់កន្ទោក ខណ្ឌកំបូល ។
ប្រភពដដែលបន្តថា ខណៈពេលជិះមកដល់ត្រង់ចំណុចត្រង់ផ្លូវបំបែកជាបី ជនរងគ្រោះក៏បានបត់ម៉ូតូ ដើម្បីឆ្លងផ្លូវ លុះពេលឆ្លងជិតផុតទៅហើយនោះ ស្រាប់តែមានរថយន្តកុងតឺន័រមួយគ្រឿង ពណ៌ទឹកសមុទ្រ ពាក់ស្លាកលេខ ភ្នំពេញ3D-4550 បើកបរស្របទិសគ្នាពីកើតទៅលិចក្នុងល្បឿនយ៉ាងលឿន បានទៅបុកម៉ូតូជនរងគ្រោះពេញទំហឹងចំពីក្រោយ បណ្ដាលឲ្យជនរងគ្រោះជាប្រពន្ធធ្លាក់ពីលើម៉ូតូ ក៏ត្រូវបានរថយន្តបង្កកិនស្លា.ប់ភ្លាមៗនៅនឹងកន្លែងកើតហេតុតែម្តង ចំណែកឯប្ដីនិងកូនតូចវិញ បានដួលបោកទៅនឹងផ្លូវ ធ្វើឱ្យកូនតូចបែកក្បាល និងឪពុករលាត់ដៃជើង។ ភ្លាមៗនោះដែរ តៃកុងរថយន្តត្រូវបានប្រជាពលរដ្ឋឃាត់ខ្លួន រួចប្រគល់ទៅសមត្ថកិច្ចយកទៅសួរនាំនៅប៉ុស្តិ៍នគរបាលកន្ទោកផងដែរ ។
ក្រោយពេលកើតហេតុ សមត្ថកិច្ចមូលដ្ឋាន និងផ្នែកជំនាញការិយាល័យចរាចរណ៍ផ្លូវគោក បានចុះទៅធ្វើការវាស់វែងយកម៉ូតូរងគ្រោះ និងរថយន្តបង្ក ព្រមទាំងតៃកុងទៅផ្នែកជំនាញចរាចរណ៍ផ្លូវគោក ដើម្បីរង់ចាំការដោះស្រាយបន្តនៅថ្ងៃក្រោយបន្ត ។ ចំណែកស.ពស្ត្រីរងគ្រោះវិញ ត្រូវបានជំនាញធ្វើលិខិតប្រគល់ស.ពទៅអោយក្រុមគ្រួសារ ដើម្បីដឹកយកទៅធ្វើបុណ្យតាមប្រពៃណីនៅឯស្រុកកំណើត ទាំងមានការសោកសង្រេងជាទីបំផុត ៕
ចែករំលែកព័តមាននេះ